تۇركىستان وبلىسىنداعى جىلىجايلاردى دامىتۋ ىسىنە تۇرىك كاسىپكەرلەرى اتسالىسادى

  استانا. قازاقپارات - تۇركىستان وبلىسىنداعى جىلىجايلاردى دامىتۋ ىسىنە تۇرىك كاسىپكەرلەرى اتسالىسادى. بۇل تۋرالى بۇگىن تۇركىستان وبلىسىنىڭ اكىمى جانسەيىت تۇيمەبايەۆتىڭ تۇرىك كاسىپكەرى دجەمالەتتين شەكەرمەن كەزدەسۋىندە بەلگىلى بولدى.

تۇركيالىق Dal Holding Investment CO. كومپانياسى جەتەكشىسىنىڭ قازاقستانداعى ورىنباسارى جانە باس كەڭەسشىسى بولىپ تابىلاتىن د. شەكەرمەن جۇزدەسۋدە وبلىس ايماعىندا، ونىڭ ىشىندە، تۇركىستان مەن كەنتاۋ قالالارىندا قۇرامداستىرىلعان جىلىجاي كەشەنىن سالۋ جوباسى ءسوز بولىپ، ونى جۇزەگە اسىرۋ جايى ايتىلدى. 200 گەكتاردان استام جەردە جىلىجاي شارۋاشىلىعىن دامىتىپ، وندا وسىرىلگەن ءونىمنىڭ 80 پايىزىن ەكسپورتقا شىعارۋدى جوسپارلاپ قويعان ينۆەستورلار قالعان كوكونىستەردى ىشكى نارىقتا ساۋدالاۋدى ويلاپ وتىر.

شەتەلدىك كومپانيانىڭ ەلىمىزدەگى وكىلىنىڭ تانىستىرىلىمىن مۇقيات تىڭداعان ايماق باسشىسى وبلىستاعى جاۋاپتى سالا باسشىلارىنا ءتيىستى قولداۋلاردى كورسەتۋدى تاپسىردى. اسىرەسە، جانسەيىت قانسەيىت ۇلى جىلىجاي كەشەنىن سالۋشىلاردىڭ كوگىلدىر وتىن، ەلەكتر قۋاتى سىندى قاجەتتىلىكتەرىنىڭ ءتاريفىن قىمباتتاتپاي، وڭتايلى شەشىپ بەرۋدى جۇكتەدى.

تۇركيالىق Dal Holding Investment CO. كومپانياسى نەگىزىن 1985 -جىلى ىستامبۇلدا قالاعان. دۇنيە ءجۇزى بويىنشا 2 مىڭنان استام قىزمەتكەرى بار الدىڭعى قاتارلى ينجەنەرلىك جانە ونەركاسىپتىك توپقا جاتاتىن سەرىكتەستىك جوعارى تاۋار اينالىمىمەن جانە ۇلەسىمەن ەرەكشەلەنەدى. كومپانيا جوعارى تەحنولوگيالىق ونەركاسىپتىك قوندىرعىلاردى جوبالاۋ، ءوندىرۋ جانە مونتاجداۋ سىندى جۇمىستارمەن اينالىسادى. سونىمەن بىرگە، ونەركاسىپكە قاجەتتى كەز كەلگەن قۇرىلعىنى ورناتىپ بەرەدى. حولدينگ جۇمىسىن باستاعان 33 جىل ىشىندە سەمەنت، تاۋ- كەن ءوندىرۋ، ەلەكتروموتور سالاسى، اۆتوماتيزاتسيا، ماشينا جاساۋ جانە ەنەرگەتيكا سالالارىندا ايتارلىقتاي جەتىستىكتەرگە جەتكەن.

ايتا كەتۋ كەرەك، تۇركىستان وبلىسىندا بۇگىنگى تاڭدا 1250 گەكتاردان استام جىلىجايلار بار. ونىڭ 50 پايىزىنان كوبى سارىاعاش اۋدانىندا ورنالاسقان.

تۇركىستان وبلىسى اكىمىنىڭ باسپا ءسوز قىزمەتى