كوكشەتاۋلىق تۇرعىن شوقاننىڭ ءمۇسىنىن ساۋداعا شىعاردى

كوكشەتاۋ. قازاقپارات - ش. ءۋاليحانوۆ ءمۇسىنىن بيەگە ايىرباستايمىن! كوكشەتاۋلىق تۇرعىن الەۋمەتتىك جەلىدە وسىنداي حابارلاندىرۋ جاسادى، دەپ حابارلايدى قازاقپارات ءتىلشىسى.

حابارلاندىرۋدا كورسەتىلگەندەي، جارناما يەسى مەيرامحان قويشىبايەۆ ەسىمدى تۇرعىن قازاقتىڭ ۇلى عالىمىنىڭ مۇسىنىنە 420 مىڭ تەڭگە نەمەسە ءبىر بيە سۇراپ وتىر.

جارناماداعى تەلەفون ارقىلى حابارلاسقانىمىزدا مەيرامحان ءوزىن ءمۇسىنشى، سۋرەتشى رەتىندە تانىستىردى. ونىڭ سوزىنشە، ءمۇسىننىڭ جاسالعانىنا 40  جىل بولعان.

«بۇل ەسكەرتكىشتى (شوقان ءۋاليحانوۆ ءبيۋستى) 1978 -جىلى دوسىمىز ەكەۋىمىز جاساپ، شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ الدىنا ورناتتىق. كەيىن ونىڭ ورنىنا باسقا جاڭاسى ورناتىلىپ، بۇل ەسكەرتكىش الىنىپ تاستالدى. دوسىمنىڭ قايتىس بولعانىنا ءبىراز جىل ءوتتى. ەسكەرتكىش جاي تۇر. سوندىقتان، ونى ساتۋدى شەشتىم. بالكىم بىرەۋلەر الىپ، ءتيىستى جەرىنە ورناتادى دەپ ۇمىتتەنەمىن» ، - دەيدى مەيرامحان قويشىبايەۆ.

سونىمەن قاتار، مۇسىنشىدەن سۇراعانىمىزدا بيىكتىگى 1 مەتردەن اساتىن ءبيۋستىڭ ەشقانداي قۇجاتتارىنىڭ جوقتىعىن انىقتادىق. وسى تۋرالى اقمولا وبلىستىق تاريحي- مادەني مۇرانى قورعاۋ جانە پايدالانۋ ورتالىعىنا حابارلاسقانىمىزدا ونداعىلار «تاريحي ەسكەرتكىشتەردى سالۋ جانە ورناتۋ ءۇشىن ق ر مادەنيەت جانە سپورت مينيسترلىگىنىڭ ارنايى ليتسەنزياسى بولۋى قاجەت» ەكەنىن ايتۋدا. ال، قالالىق اكىمدىكتەگىلەر بولسا، اتالمىش ءمۇسىندى قالا اۋماعىندا ورناتىلعان ەسكەرتكىشتەر تىزىلىمىندە جوق دەپ وتىر.

 «قالالىق اكىمدىك قالا اۋماعىنداعى ورناتىلعان، ەسكەرتكىشتەر رەەستىرىنە تىركەلگەن ەسكەرتكىشتەر ءۇشىن جاۋاپتى. ناقتىراق ايتقاندا قۇجاتتاردى راسىمدەۋ، جەر تەلىمىن ءبولۋ، اعىمداعى جانە كۇردەلى جوندەۋ جۇمىستارى. قولدانىستاعى زاڭناماعا سايكەس، قالالىق اكىمدىك، جەكە تۇلعادان ساتاتىن تاۋاردى تاركىلەپ الا المايدى، جانە ساتۋ- ساتىپ الۋ وپەراتسياسىن بولدىرماۋعا قۇزىرى جوق. دەگەنىمەن اتالعان جاعداي قالا اكىمدىگىنىڭ نازارىنا الىندى» ، - دەپ ءتۇسىندىردى كوكشەتاۋ قالاسىنىڭ باسپا ءسوز قىزمەتىنەن.

حابارلاندىرۋ 23 - شىلدەدە جاريالانعان.