سەمەيدە «اباي ەلى - رۋحانيات مەككەسى» اتتى كونفەرەنسيا ءوتتى
جيىنعا اباي اۋدانى اكىمى باستاعان جيىرماعا جۋىق دەلەگات، ءبىر كەزدەرى اباي اۋدانىنىڭ ەكونوميكاسى مەن مادەنيەتىنىڭ گۇلدەنۋىنە ءوز ەڭبەگىن سىڭىرگەن، كيەلى مەكەندە ءار جىلدارى قىزمەت ەتكەن ازاماتتار، قالاداعى ءبىرقاتار وقۋ ورىندارىنىڭ باسشىلارى قاتىستى. سونداي- اق، بالقاش، پاۆلودار، استانا قالالارىنان شاكارىمنىڭ ۇرپاقتارى ارنايى كەلدى.
كونفەرەنسيا بارىسىندا ءسوز العان اباي اۋدانىنىڭ اكىمى جارقىنبەك بايسابىروۆ اباي اۋدانىندا جىل باسىنان بەرى شاكارىمنىڭ 160 جىلدىعىنا وراي اتقارىلعان ءبىرقاتار شارالارعا توقتالدى. جىل سايىن ءداستۇرلى تۇردە وتەتىن كوركەمونەرپازدار بايقاۋى دا اقىننىڭ مەرەيتويىمەن ورايلاستىرىلىپ، وعان مىڭ جارىمنان استام ادام قاتىسقان ەكەن. سونىمەن قاتار قاراۋىل اۋىلىنداعى شاكارىم الاڭىنا اعىمداعى جوندەۋ جۇمىستارى جۇرگىزىلىپ، اباتتاندىرىلىپ، كوگالداندىرىلعان. بيىل العاش رەت ايماقتىڭ ءتۇرلى ەتنوس جاستارى اراسىندا «شاكارىم وقۋلارى» بايقاۋىن اباي ەلىندە وتكىزۋ جوسپارلانىپ وتىر. تاعى ءبىر ايتا كەتەر ماڭىزدى ماسەلە، وسى جىلى «نۇرلى جول» باعدارلاماسى ارقىلى ۇلىلار مەكەنىنە باراتىن جولعا 2 ميلليارد 487 ميلليون تەڭگە ءبولىنىپ، 28,8 شاقىرىمىنا جوندەۋ جۇمىستارى جۇرگىزىلۋدە.
«اۋداندىق قوعامدىق كەڭەس مۇشەلەرىمەن توي قارساڭىندا وسكەمەن قالاسىنان ءبىر كوشە بەرۋ جونىندە باستاما كوتەرىلگەن- ءدى. ۇسىنىس وبلىس باسشىلىعىنىڭ، ءماسليحات دەپۋتاتتارىنىڭ قولداۋىنا يە بولىپ، وسكەمەندەگى بۇرىنعى ۆوروشيلوۆ كوشەسى شاكارىم داڭعىلى بولىپ وزگەرتىلدى. ءار زەيىندى ازامات رۋحاني كۇش- جىگەرمەن ۇلى دانىشپاندارىمىزدى ۇلىقتاۋعا اتسالىساتىن بولسا، جان دۇنيەسى تازارىپ، كوڭىلى وسەتىندىگىنە سەنەمىز. ۇلىلارعا قىزمەت ەتۋ - ادامزاتقا قىزمەت ەتۋ» ، - دەدى ج. بايسابىروۆ.
سونىمەن قاتار جيىندا شاكارىم قۇدايبەردى ۇلىنىڭ ۇرپاقتارىنىڭ ءبىرى - قۇرالاي ۋاقبايەۆا ءسوز الدى. رەسپۋبليكالىق كونفەرەنتسياعا ول پاۆلودار قالاسىنان كەلگەن.
«انام ەشقانداي تۋىسىن كورە الماي، دۇنيەدەن ءوتتى. ءالى ەسىمدە، ول كەزدە، 1961 -جىلى 8-سىنىپتا وقيمىن، احات ناعاشىم انامدى ىزدەپ كەلىپتى. ەكەۋى ءبىر ساعاتتاي سويلەستى. اۋىلدان كەتەرىندە: «ازىرگە ءتىس جارماڭدار، كەيىن ۇلكەيتىپ الىڭدار» دەپ شاكارىم اتامنىڭ سۋرەتىن بەرىپ، اتامنىڭ «بۇل ءان بۇرىنعى اننەن وزگەرەك» ءانى مەن ءوزىنىڭ شىعارعان ولەڭىن ايتىپ، ۇيرەتىپ كەتكەن بولاتىن. قازىر احات ناعاشىم امانات ەتىپ كەتكەن سۋرەتى تورىمىزدە ءىلىنىپ تۇر، اندەرىن دە ايتىپ جۇرەمىز» ، - دەيدى قۇرالاي ۋاقبايەۆا.
بيىل اقىننىڭ 160 جىلدىعى قارساڭىندا پاۆلودار قالاسىنىڭ ورتا ءبىلىم بەرەتىن مەكتەپتەرىنىڭ بىرىندە «شاكارىم تانۋ» ورتالىعىنىڭ اشىلعانىن قۋانىشپەن جەتكىزدى قۇرالاي ۋاقبايەۆا. ورتالىقتا شاكارىمنىڭ ەڭبەكتەرى قويىلعان، سەمەيدەن ارنايى جۋرنالدار دا اكەلىنگەن ەكەن.
- وتكەن جىلدىڭ اقپان ايىندا ورتالىق اشۋدىڭ العاشقى جۇمىستارىن قولعا العان ەدىك. ءبىر جىل كولەمىندە قاجەتتى قۇجاتتار مەن ماتەريالداردى جينادىق. سەمەيدەگى شاكارىم اتىنداعى ۋنيۆەرسيتەت پەن جيدەبايداعى اباي مۇراجايىندا بولىپ، كوپتەگەن دەرەكتەر مەن كىتاپتاردى الىپ كەلدىم. وسكەلەڭ ۇرپاقتى ۇلاعاتتى ەتىپ تاربيەلەۋگە، دانالار ءسوزىن بويلارىنا سىڭىرۋگە بۇل ورتالىقتىڭ ءبىر پايداسى تيەدى دەپ سەنەمىن، - دەيدى شاكارىم قۇدايبەردى ۇلىنىڭ ۇرپاعى.