وزگە عالامشارلىقتار تاجىريبەسى: ارگەنتيناداعى سيىرلار ءولىمى

 استانا. قازاقپارات - ارگەنتينانىڭ سانتا- فە پروۆينتسياسىندا بىرنەشە ايدان بەرى فەرمەرلەردىڭ سيىرلارىنا قاتىستى جۇمباق وقيعا ورىن الىپ كەلەدى. جەرگىلىكتى تۇرعىنداردىڭ ايتۋىنشا، ولار بىرىنەن كەيىن ءبىرى بەلگىسىز جاعدايدا قىرىلىپ جاتىر.

وقيعا جەرگىلىكتى حالىققا زيان كەلتىرىپ، تاۋىپ وتىرعان نەسىبەسىنەن ايىرىپ جاتىر. ءتىپتى كەيبىر ادامداردىڭ بۇكىل سيىرىن ءبىر تۇندە جاپپاي ءولتىرىپ كەتكەن كەزى دە بولعان. جەرگىلىكتى پوليتسيا قىزمەتكەرلەرى قىلمىسكەردى انىقتاي العان جوق. ال ادامداردىڭ ايتۋىنشا، بۇل وزگە عالامشارلىقتاردىڭ جەردەگى جانۋارلار ۇستىندەگى تاجىريبەسى. سەبەبى، بارلىق سيىرلار وتە دالدىكپەن ءبىر جەرىنەن لازەر سىندى وتكىر قۇرالمەن كەسىلگەن جانە بىردە- ءبىر قان تامشىسى جوق. بارلىق سيىردىڭ جاق تەرىلەرىن سىپىرىپ الىپ كەتەدى ەكەن. تاعى دا ايتا كەتەرلىگى ولگەن سيىرلارعا نە شىبىن، نە ولەكسە جەيتىن يت- قۇس تا جاقىندامايدى.

 فەرمەرلەر مۇنى وزگە عالامشارلىقتار نەمەسە اڭىز جانۋار چۋپاكابرا ىستەگەنىنە سەنىمدى. سونداي فەرمەرلەردىڭ ءبىرى نوربەرتو بەريدىڭ جاقىندا عانا التى سيىرىن وسىلاي ءولتىرىپ كەتكەن. «سيىرلارىمنىڭ ءتىلى مەن جاعى جوق. تەرىگە پىشاق ءىزى تۇسپەگەن. ونى لازەر سىندى وتكىر قۇرالمەن كەسكەن سياقتى. سەبەبى، ولگەن سيىرلاردان ءبىر تامشى دا قان شىقپاعان جانە بارلىعى ءبىر جەردەن، وتە دالدىكپەن باۋىزدالعان. مەنىڭشە، بۇل ادامداردىڭ قولىنان كەلمەيتىن ءىس»، -  دەيدى ول.

پوليتسيانىڭ دا بۇل سوزگە سەنۋدەن باسقا امالدارى جوق. ولار قىلمىس ۇستىندە قانشا ىزدەستىرۋ جاساعىنىمەن، ەشقانداي بەلگى نەمەسە قىلمىسكەردەن قالاتىن ءىز تاپپاعان. جەرگىلىكتى تۇرعىندار مۇنداي جاعداي بۇرىن دا ورىن العانىن ايتادى. وقيعادان بۇرىن اسپاندا قىزىل ءتۇستى شارلار كورىنەدى ەكەن. ال، فەرمەرلەر بۇل قۇپيا اسكەري ۇيىمنىڭ نەمەسە وزگە عالامشارلىق پەن چۋپاكابرانىڭ ءىسى ەكەنىنە سەنەدى. 

Massaget.kz