ەلورداعى «بەكىرە كوپىر» قالاي سالىندى؟

استانا. قازاقپارات - ەلوردانىڭ ەسىل وزەنى ۇستىمەن وڭ جانە سول جاعالاۋلارىن قوساتىن جاياۋ جۇرگىنشىلەر مەن ۆەلەسيپەدشىلەرگە ارنالعان جاڭا كوپىرىنىڭ قالاي سالىنعاندىعىن بەينەلەيتىن ۆيدەو جاريالاندى.

ول BI Group كومپانياسىنىڭ Facebook الەۋمەتتىك جەلىسىندەگى پاراقشاسىندا، دەپ حابارلايدى قازاقپارات ءتىلشىسى.

كومپانيا مالىمەتىنشە، كوپىردىڭ قۇرىلىس جۇمىستارى 181 كۇنگە سوزىلعان. ونى سالۋعا 300 قۇرىلىسشى مەن 100 كولىك قۇرالى (كران، ەكسكاۆاتور، بۋلدوزەر، جۇك ماشيناسى، جۇك كوتەرەتىن تەحنيكالار، تىرەۋ قاعاتىن ماشينا) جۇمىلدىرىلعان. ەسىل وزەنىنىڭ ۋاقىتشا بوگەۋ جانە كوپىر سالۋ ءۇشىن بوگەت تۇرعىزۋ ءۇشىن 30 مىڭ تەكشە مەتر تاۋ تىنىستارى جەتكىلگەن.

كوپىردىڭ رەسمي اشىلۋىنا ءتورت كۇن قالعان كەزدە ەلوردا نوسەر جاۋىننىڭ استىندا قالادى. جاياۋ جۇرگىنشىلەر مەن ۆەلەسيپەد تەپكەن ادامدارعا ارنالعان جولاق جابىندىسىن توسەۋ ءۇشىن قۇرىلىسشىلارعا كوپىر قۇرىلىمىن تولىقتاي 6 مىڭ مەترلىك پوليەتيلەن ۇلپەكپەن جابۋىنا تۋرا كەلگەن.

ەسىل وزەنى ارناسىمەن سۋدىڭ كەدەرگىسىز ءوتۋىن قامتاماسىز ەتۋ ءۇشىن ارنايى تۇرعىزىلعان بوگەتتىڭ استىنا 7 سۋ وتكىزەتىن قۇبىر توسەلگەن.

ايتا كەتەيىك، ەلوردانىڭ 20 جىلدىق مەرەيتويىنا وراي اتىراۋ وبلىسى تارتۋ ەتكەن نىساننىڭ جالپى ۇزىندىعى - 313,5 مەتر، ەنى - 10,5 مەتر. كوپىردە جاياۋ جۇرگىنشىلەرگە ارنالعان التى مەترلىك جولاق، ۆەلوسيپەدشىلەرگە ارنالعان ءۇش مەترلىك جولاق، سونداي-اق ەنى 0,5 مەتر بولاتىن قاۋىپسىزدىك جولاعى جانە 0,5 مەترلىك شارباقتى قورشاۋعا ارنالعان ەكى جولاق بار.

كوپىر جابىندىسى ءۇشىن ليتاكريل پايدالانىلعان. بۇل نىسان اۋا رايى جاعدايى ەسكەرىلە وتىرىپ سالىنعان. ونى جوبالاعاندا جەلدىڭ اسەرى دە ەسەپكە الىنعان. سالماعى - 1920 توننا.