تۇركيانىڭ تەلەارناسىندا قازاق فيلمدەرى كورسەتىلمەك
كەزدەسۋدە تۇركيالىق وكىل كورپوراتسيا باسشىلىعىنىڭ كينوستۋديا كارتينالارىن تۇرىك تەلەارناسىندا كورسەتۋگە نيەتتى ەكەنىن ءبىلدىردى.
«TRT» تەلەراديوكورپوراتسياسى - بىرنەشە راديوستانتسيالار نەگىزىندە 1964-جىلى قۇرىلعان. قازىرگى ۋاقىتتا كورپوراتسياعا ونداعان حالىقارالىق جانە ايماقتىق تەلە-راديو ارنالار كىرەدى جانە ولار بىرنەشە تىلدە حابار تاراتادى.
قازاقستاندا دا كورپوراتسيانىڭ بولىمشەسى اشىلعان. ەندى ءبىزدىڭ كورپوراتسياعا تيەسىلى «TRT Avaz» تەلەارناسىندا اپتاسىنا ءبىر رەت تۇركىتىلدەس ەلدەردىڭ كينولارىن كورسەتۋدى جوسپارلاپ وتىرمىز. وسى ورايدا، ءبىز «قازاق فيلمگە» كەلىپ وتىرمىز، ويتكەنى بۇل كينوستۋديا قازاقستانداعى باستى جانە ءتۇرلى جانرداعى ساپالى كينو ءوندىرۋشى بولىپ سانالادى. ءبىزدىڭ قازىرگى ماقساتىمىز - سىزدەردىڭ فيلمدەرىڭىزبەن تانىسىپ، تاريحىڭىز بەن مادەنيەتىڭىزدى كورسەتەتىن تۋىندىلاردى تاڭداپ الۋ»، - دەدى كەزدەسۋ بارىسىندا ابدۋلحاميت اۆشار.
ءوز كەزەگىندە «قازاق فيلم» كينوستۋدياسىنىڭ اۋديوۆيزۋالدى جوبالار باسشىسى ولجاباي مۇسابەكوۆ كينوستۋديا شىعارعان فيلمدەر كاتالوگىن بەرۋگە دايىن ەكەنىندىگىن جەتكىزدى.
«2009-جىلعا دەيىن تۇسىرىلگەن فيلمدەر پلەنكادا ساقتالعان. الايدا قازاق عىلىمي-زەرتتەۋ مادەنيەت ينستيتۋتىنىڭ كومەگىمەن ساندىق جۇيەگە وتكىزدىك. ەسكى جانە جاڭا فيلمدەردى سىزدەرگە قاجەتتى فورماتتا بەرۋگە دايىنبىز»، - دەدى ولجاباي مۇسابەكوۆ.
ايتا كەتەيىك، ش. ايمانوۆ اتىنداعى «قازاق فيلم» كينوستۋدياسىنىڭ تاريحى 1934-جىلدان باستاۋ الادى. ءدال وسى جىلى الماتى كينوحرونيكا ستۋدياسى قۇرىلدى، ال 1941-جىلى الماتى كوركەم فيلمدەر ستۋدياسى دەپ وزگەرتىلىپ، كينوستۋديانىڭ وندىرىستىك نەگىزى بارىنشا نىعايا ءتۇستى. 1960 -جىلى «قازاق فيلم» اتاۋىنا يە بولىپ، 1984-جىلى كينوستۋدياعا ۇلتتىق كينەماتوگرفيانىڭ كورنەكتى قايراتكەرى شاكەن ايمانوۆتىڭ ەسىمى بەرىلدى. بۇگىندە ش. ايمانوۆ اتىنداعى «قازاق فيلم» ا ق - كوركەم، دەرەكتى، انيماتسيالىق كينو وندىرىسىمەن اينالىساتىن قازاقستانداعى نەگىزگى كينوكومپانيا.