ورالمانداردىڭ ەڭبەك ءوتىلىن ەسەپتەۋ ماسەلەسى قالاي شەشىلەدى
ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆانىڭ ايتۋىنشا، بۇگىندە قىتاي سياقتى ەلدەردەن كەلەتىن قانداستارىمىز وزدەرىنىڭ ەڭبەك ءوتىلىن دالەلدەي الماي جۇرەدى. سەبەبى اتالعان مەملەكەتتە ەڭبەك ءوتىلىن راسىمدەۋدىڭ ءبىرىڭعاي جۇيەسى جوق، ءتىپتى ەڭبەك كىتاپشاسى دا جۇرگىزىلمەيدى. ال ەڭبەك ءوتىلىن دالەلدەي الماعاننان كەيىن زەينەتاقىنىڭ تولىق مولشەرىن الۋ قيىن.
«نەگىزى، ونداي ماسەلەلەر ەكىجاقتى حالىقارالىق كەلىسىمدەرمەن رەتتەلەدى. وندايدى «ەڭبەك ءوتىلىن ءوزارا تانۋ» دەپ اتايدى. قازاقستان ءبىرقاتار مەملەكەتتەرمەن وسى ىسپەتتى كەلىسىمدەردى راسىمدەگەن. ءبىز قىتايعا دا ەڭبەك ءوتىلىن ءوزارا تانۋدى ۇسىندىق. بىلايشا ايتقاندا، ءبىز شەتەلدەن كەلەتىن قانداستىرمىزدىڭ ەڭبەك ءوتىلىن تولىعىمەن سانايمىز. ولار دا سويتەدى. دەگەنمەن، قىتاي جاق وعان كەلىسەمىز دەگەن نيەتىن بىلدىرگەن جوق. سول سەبەپتى ءبىز ءوزىمىز ەڭبەك ءوتىلىن ءبىرجاقتى تانۋعا دايىنبىز. سەبەبى قانداستارىمىزدىڭ ءبىراز بولىگى سول جاقتان كەلىپ جاتادى»، - دەدى م. ءابىلقاسىموۆا قازاقپارات تىلشىسىنە.
ونىڭ سوزىنە قاراعاندا، ەندىگى ماسەلە - ەڭبەك ءوتىلىن دالەلدەيتىن قۇجاتتاردى انىقتاۋ. ول ەڭبەك كىتاپشاسى بولا ما، جۇمىس بەرۋشىنىڭ رەسمي حاتى بولا ما، وسى جاعىن رەتتەپ الۋ قاجەت.
«قازىرگى كەزدە ارنايى ساراپشىلار توبى قىتاي مەن موڭعوليا بويىنشا جۇمىس ىستەپ جاتىر. سەبەبى اتالعان ەكى مەملەكەتتەگى جاعداي ۇقساس. ساراپشىلار ەڭبەك ءوتىلىن دالەلدەۋدىڭ فورمالارىن پىسىقتاپ جاتىر. الداعى ۋاقىتتا ءتيىستى زاڭناماعا ورالمانداردىڭ ەڭبەك ءوتىلىن ەسەپتەۋگە قاتىستى وزگەرىستەر ەنگىزىلەدى»، - دەپ اتاپ كورسەتتى م. ءابىلقاسىموۆا.
ايتا كەتەيىك، بۇعان دەيىن مينيستر م. ءابىلقاسىموۆا ورالمانداردىڭ ەڭبەك ءوتىلىن ەسەپتەۋگە قاتىستى ارنايى حاتتى قىتايعا جىبەرگەنى جايىندا ايتقان بولاتىن. ونىڭ ايتۋىنشا، ورالمانداردىڭ ەڭبەك ءوتىلىن ەسەپتەۋ ماسەلەسى شەشىلسە، بازالىق زەينەتاقى جانە تاعى باسقا الەۋمەتتىك تولەمدەردىڭ ۇلعايعان مولشەرىن الۋعا مۇمكىندىك بولادى. «ورالمانداردىڭ كوبىسى موڭعوليادان، قىتايدان، وزبەكستاننان، رەسەيدەن، ءتىپتى گەرمانيادان كەلىپ جاتىر»، - دەيدى م. ءابىلقاسىموۆا.
اۆتور: ارمان اسقاروۆ