10:09, 13 - تامىز 2018 | GMT +6
بەس ەلدىڭ پرەزيدەنتتەرى بەكىرە تۇقىمداس بالىقتاردى تابيعي ورتاعا جىبەرۋ شاراسىنا قاتىستى
استانا. قازاقپارات - كەشە قازاقستان پرەزيدەنتى نۇرسۇلتان نازاربايەۆ بەكىرە تۇقىمداس بالىقتاردى تابيعي ورتاعا جىبەرۋ شاراسىنا قاتىستى، دەپ حابارلايدى اقوردانىڭ رەسمي سايتى.
نۇرسۇلتان نازاربايەۆ ازەربايجان رەسپۋبليكاسىنىڭ پرەزيدەنتى يلحام اليەۆپەن، يران يسلام رەسپۋبليكاسىنىڭ پرەزيدەنتى حاسان رۋحانيمەن، رەسەي فەدەراتسياسىنىڭ پرەزيدەنتى ۆلاديمير پۋتينمەن، تۇرىكمەنستان پرەزيدەنتى گۋربانگۋلى بەردىمۇحامەدوۆپەن بىرگە اقتاۋ قالاسىنىڭ تەڭىز جاعالاۋى ارقىلى وتەتىن جاڭا نىساندى - «جارتاس جولىن» ارالاپ كوردى.
بۇل كورىكتى جەردە پەتروگليفتەر بەينەلەگەن، سونداي- اق مۇندا جاياۋ جۇرگىنشىلەرگە ارنالعان ورىندار، تەڭىز كورىنىسىن تاماشالاۋعا ارنالعان الاڭدار مەن تابيعي ۇڭگىر ورنالاسقان.
سونىمەن قاتار، مەملەكەتتەر باسشىلارى بىرلەسىپ، قولدان وسىرىلگەن 500 اقسەركە بالىعىن تەڭىزگە جىبەردى.
سونداي- اق، ەلدەر كوشباسشىلارى شىعىس ەرتەگىلەرىنىڭ جەلىسىندەگى تەاترلاندىرىلعان بي قويىلىمىن تاماشالادى.