اقتاۋ سامميتى: رەسەي مەن يران پرەزيدەنتتەرى ۇلتتىق مۇددە تۋرالى پىكىر ءبىلدىردى
«بۇل حالىقارالىق كەلىسىم (كونۆەنسيا) ءبىزدىڭ ورتاق قۇندىلىعىمىز بولىپ وتىرعان كاسپيدى پايدالانۋ مەن ساقتاۋ تۇرعىسىندا تىڭعىلىقتى ءارى كولەمدى ەرەجەلەر مەن مىندەتتەمەلەر جيىنتىعىن قامتىپ وتىر. وسى ارقىلى كاسپي بەستىگىنىڭ ءوزارا ءىس- قيمىلى زاماناۋي زاڭدى نەگىزگە قول جەتكىزدى. ەڭ باستىسى، قۇجات تەڭىزدىڭ بەيبىت مارتەبەسىن قامتاماسىز ەتۋدە»، - دەپ توقتالدى ۆ. پۋتين.
ونىڭ سوزىنە قاراعاندا، كونۆەنسيادا قامتىلعان تالاپتاردى كاسپي ماڭى مەملەكەتتەرى كوپ جىلدان بەرى پىسىقتاپ كەلدى.
«وسى ستراتەگيالىق قۇجات اياسىندا بەس ەلدىڭ كوپتەگەن ۆەدومستۆولارىنىڭ اۋقىمدى كەلىسسوزدەرى جۇرگىزىلدى. بۇل رەتتە ساراپشىلىق ءارى ىسكەر توپتار دا نازاردان تىس قالمادى. كاسپي ماڭى ەلدەرى كوشباسشىلارىنىڭ ءوزارا تۇسىنىستىگىنىڭ ارقاسىندا بارلىعىنىڭ مۇددەلەرى ەسكەرىلگەن ۋاعدالاستىققا قول جەتكىزدىك»، - دەدى ر ف باسشىسى.
ونىڭ پايىمىنشا، اقتاۋ سامميتىندە قول قويىلعان كونۆەنسيا بەس ەلدىڭ اراسىنداعى قاتىناستاردا جاڭا كەزەڭدى اشىپ وتىر.
«الدىمىزدا كۇردەلى ءارى قىزىقتى ماقساتتار مەن مىندەتتەر تۇر. ءبىز بۇل ماسەلەلەردى دايەكتى تۇردە شەشۋگە نيەتتىمىز. جالپى، ەلەۋلى جۇمىستارى ءۇشىن قازاقستان تاراپىنا العىسىمىزدى جەتكىزەمىز. بارلىق ارىپتەستەرىمدى ءسامميتتىڭ تابىستى وتۋىمەن قۇتتىقتايمىن»، - دەدى ۆلاديمير پۋتين.
ءوز كەزەگىندە يران پرەزيدەنتى حاسان رۋحاني كونۆەنسيانى بەكىتۋ - كاسپي ماڭى مەملەكەتتەرى ءۇشىن ماڭىزدى ەكەنىن ءمالىم ەتتى.
«ءبىزدىڭ قاتىناستار دوستىق نەگىزدە جالعاسىپ جاتىر. سوندىقتان بۇل قارىم- قاتىناستارىمىز ۋاعدالاستىققا قول جەتكىزۋدىڭ باستى فاكتورى بولدى»، - دەدى ول.
مۇنىمەن قوسا، يران باسشىسى بارلىق ەلدەردىڭ ۇلتتىق مۇددەلەرى ەسكەرىلگەنىن قاداپ ايتتى.
بۇدان بۇرىن حابارلانعانداي، اقتاۋ سامميتىنە قاتىسقان بەس ەلدىڭ باسشىلارى كاسپيدىڭ قۇقىقتىق مارتەبەسى تۋرالى كونۆەنسياعا قول قويدى.
كاسپي ماڭى مەملەكەتتەرىنىڭ بەسىنشى سامميتىنەن كەيىن ەلباسى نۇرسۇلتان نازاربايەۆ كاسپي تەڭىزىنىڭ قۇقىقتىق مارتەبەسى تۋرالى كونۆەنسيانىڭ ماڭىزدىلىعىن ءتۇسىندىردى.
اۆتور: رۋسلان عابباسوۆ