بانان، فيكۋس، اپەلسين - استاناداعى بوتانيكالىق باقتا نە وسەدى

استانا. قازاقپارات - ءبىر اي بۇرىن استاناداعى بوتانيكالىق باق اشىلىپ، قالا تۇرعىندارىنىڭ سەرۋەندەيتىن سۇيىكتى دەمالىس ورنىنا اينالدى.

بۇل باقتىڭ اۋماعى ساياباق ايماعى جانە بوتانيكالىق ايماق ايماعى بولىپ ەكىگە بولىنەدى. اتى ايتىپ تۇرعانداي، بوتانيكالىق ايماقتا ورانجەرەيالار بار. كليماتروندار ازىرگە كەلۋشىلەر ءۇشىن اشىلعان جوق، دەپ جازادى ەلوردا ينفو.

بوتانيكالىق باقتىڭ جىلىجايلارى سوڭعى ۇلگىدەگى زاماناۋي تەحنولوگيالارمەن جابدىقتالعان. استانالىق باقتىڭ ورانجەرەيالارىنا ورناتىلعان جۇيەلەر ت م د اۋماعىنداعى بوتانيكالىق باقتاردىڭ بىرىندە جوق.

«تامشىلاپ سۋارۋ، ىلعالداتقىش، كليمات-باقىلاۋ - ءبارى كومپيۋتەرمەن باسقارىلادى. كەيبىر بەلگىلى باقتاردا وسىمدىكتەر ءالى كۇنگە دەيىن لەيكامەن سۋارىلادى. بىزگە مينسك قالاسىنداعى 80 جىلعا جۋىق تاريحى بار بوتانيكالىق باقتا پالمالاردىڭ قالاي سۋارىلاتىنىن ايتىپ بەردى. باقتىڭ جۇمىسشىسى ۆەنتيلياتوردى قوسىپ، شلانگىمەن سۋدى شاشادى. قازىرگى باقتاردا قولمەن ىستەيتىن جۇمىس كوپ. بۇل تۇرعىدان العاندا ءبىزدىڭ باق وتە دامىعان»، - دەدى BI Civil Construction كومپانياسىنىڭ ديرەكتورى ۆيكتور بوگما.

ىلعالدىندىرۋ جۇيەسى تۇراقتى اۋا تەمپەراتۋراسى مەن ىلعالىن ساقتاپ تۇرادى. ەگەر عيماراتتىڭ ءىشىن سالقىنداتۋ كەرەك بولسا، تۇمان بولادى. ءار وسىمدىككە تامشىلاپ سۋارۋ جۇيەسى تارتىلعان.

ازىرگە وسىمدىكتەردىڭ كۇتىمىمەن بىرنەشە مامان اينالىسىپ جاتىر. ونىڭ بىرەۋى - مينسك قالاسىنان شاقىرىلعان. ول وسىمدىكتەردىڭ اۋرۋىنىڭ الدىن الۋمەن اينالىسادى.

«بۇل وسىمدىكتەر استاناعا الەمنىڭ تۇكپىر-تۇكپىرىنەن اكەلىندى. جەتكىزۋشىلەر نەگىزىنەن يسپانيا، گوللانديا مەن گەرمانيادان. سەبەبى، ەۋروپادا ول نارىق جاقسى دامىعان. وسىمدىكتەر ءارتۇرلى جىلىجايدان اكەلىندى ءارى قانداي دا ءبىر اۋرۋ تاراتپاسى ءۇشىن مۇقيات تەكسەرىلدى. ولاردى جەتكىزۋ كەزىندە ەشقانداي قيىندىق بولعان جوق، تەك پالما اعاشىن اكەلۋ قيىنعا سوقتى»، - دەدى ۆيكتور بوگما.

بوتانيكالىق باقتىڭ ورانجەرەياسىنىڭ بىرىنە فيكۋس، ليمون، دراتسەن، اپەلسين، پاپورتونيك، پالما جانە ت. ب. تروپيكالىق مەملەكەتتەردەن اكەلىنگەن 1100 وسىمدىك وتىرعىزىلدى. ەكىنشى كليماتروندى 960 سۋككۋلەنت «يەلەندى» . ولاردىڭ اراسىندا الەمدە سيرەك كەزدەسەتىن كوللەكتسيالىق كاكتۋستار مەن گيبريدتەر بار.

سىرتتان كەلگەن بۇل وسىمدىكتەردىڭ ءوسىپ، بۇرشاق جارۋى ءۇشىن بىرنەشە جىل كەرەك. مامانداردىڭ ايتۋىنشا، كەيبىر وسىمدىك ءبىر جىلدا - 2 سانتيمەتر، ال ەندى ءبىرى ءارى كەتسە - 10 سانتيمەتر عانا ءوسۋى مۇمكىن.

«ازىرگە استانالىق باقتىڭ ورانجارەياسى قاپتاعان كوبەلەكتەرى نەمەسە ەرەكشە قۇستارىمەن ماقتانا المايدى. الايدا، ول ۋاقىتتىڭ ەنشىسىندەگى نارسە»، - دەيدى ماماندار.

بوتانيكالىق باق تەك تۇرعىندار سەرۋەندەپ دەمالاتىن جەر عانا ەمەس، بولاشاقتا سەلەكتسيالىق جۇمىستار جۇرگىزىلەتىن زەرتتەۋ ورتالىعىنا اينالادى.