بەس ەلدىڭ باسشىلارى كاسپيدىڭ قۇقىقتىق مارتەبەسى تۋرالى كونۆەنسياعا قول قويدى
اتاپ ايتقاندا، قۇجات ءبىرقاتار ەرەجەلەردى قامتيدى. قۇجاتتى قازاقستان، ازەربايجان، رەسەي، يران جانە تۇرىكمەنستان پرەزيدەنتتەرى بەكىتتى.
«بارلىقتارىڭىزدى ماڭىزدى قۇجاتقا قول قويىلۋىمەن قۇتتىقتايمىن. ءبىز ارىپتەستەرىمىزبەن بىرگە كاسپي تەڭىزىنىڭ قۇقىقتىق مارتەبەسىن رەتتەۋ بويىنشا كوپ جىلدىق جۇمىستىڭ قورىتىندىسىن جاسادىق»، - دەدى ق ر پرەزيدەنتى نۇرسۇلتان نازاربايەۆ.
وسى ورايدا ەلباسى بارلىق بەس مەملەكەت تە تەڭىزدىڭ قۇقىقتىق رەجيمىن ايقىنداۋعا كۇش- جىگەر سالعانىن قاداپ ايتتى.
«كونۆەنسيانى دايارلاۋ پروتسەسىندە بارلىق ەلدەر ساياسي تۇراقتىلىقتى قامتاماسىز ەتۋ، كاسپي ءوڭىرىن دامىتۋ، ونىڭ تابيعي بايلىعىن ساقتاۋ سياقتى مۇددەنى ۇستاندى. كونۆەنسيا - كاسپي تەڭىزىنىڭ كونستيتۋتسياسى ىسپەتتى. ول تەڭىز ماڭى ەلدەرىنىڭ قۇقىقتارى مەن مىندەتتەمەلەرىنە قاتىستى ماسەلەلەردىڭ بارلىق كەشەنىن رەتتەۋگە نەگىزدەلگەن. سونداي-اق، قۇجات جالپى ءوڭىر قاۋىپسىزدىگىنىڭ، تۇراقتىلىعىنىڭ جانە گۇلدەنۋىنىڭ كەپىلگەرى بولۋعا ارنالعان»، - دەپ ناقتىلادى قازاقستان پرەزيدەنتى.
ايتا كەتەيىك، رەسەي پرەزيدەنتى ۆلاديمير پۋتين اتالعان كونۆەنسيا كونسەنسۋس پەن مۇددەلەردى ءوزارا ەسكەرە وتىرىپ، زاماناۋي ءارى تەڭدەستىرىلگەن حالىقارالىق قۇجات ەكەنىن اتاپ ءوتتى.
«كونۆەنسيا قاجەتتى جىكتەۋ شارالارىن، كەمەنىڭ ءجۇزۋى مەن بالىق اۋلاۋ رەجىمدەرىن ايقىن رەگلامەنتتەيدى، قاتىسۋشى ەلدەردىڭ اسكەري-ساياسي ءوزارا ءىس- قيمىلىنىڭ ۇستانىمدارىن بەلگىلەيدى. سونىمەن قاتار، كاسپيدى تەك بەيبىت ماقساتتاردا پايدالانۋعا كەپىلدىك بەرىلگەن»، - دەدى ر ف باسشىسى.