قىزىلوردالىق عالىمدار جوعارى ءونىمدى قاۋىن سورتىن شىعارماق

قىزىلوردا. قازاقپارات - قىزىلوردا قالاسىنداعى ى. جاقايەۆ اتىنداعى قازاق كۇرىش شارۋاشىلىعى عىلىمي- زەرتتەۋ ينستيتۋتىنىڭ عالىمدارى كەزىندەگى «كۇلابى» قاۋىنى سەكىلدى جوعارى سورتتى قاۋىن ءوسىرىپ شىعارۋعا دەن قويىپ وتىر.

مامانداردىڭ ايتۋىنشا، 1 گەكتاردان 50-60 تونناعا دەيىن ءونىم الۋعا بولادى، دەپ حابارلايدى قازاقپارات ءتىلشىسى.

ينستيتۋتتىڭ باس ديرەكتورى سەرىكباي ءومىرزاقوۆ اتالمىش مەكەمە ماماندارى تەك كۇرىش سورتتارىن عانا ەمەس، باقشا ونىمدەرىنە دە ءمان بەرىپ كەلە جاتقانىن ايتادى. ماسەلەن، جەرگىلىكتى عالىمدار سوڭعى ءۇش جىلدان بەرى قاۋىننىڭ 60-قا جۋىق سورتىن تامشىلاتىپ سۋارۋ ادىسىمەن تاجىريبەدەن وتكىزۋدە.

«رەسەي، وزبەكستان، ۋكراينا جانە يراندىق سورتتارمەن قاتار جەرگىلىكتى عالىمدار وزدەرى اشقان جاڭا سورتتار دا سىناقتان ءوتىپ جاتىر. «باستى ماقسات - ونىمدىگىلى جوعارى، ساپالى تۇقىم سورتىن دايىنداۋ» ، - دەدى باس ديرەكتوردىڭ ورىنباسارى، اۋىل شارۋاشىلىعى عىلىمدارىنىڭ دوكتورى اسەت توقتامىسوۆ.

بۇگىندە ينستيتۋتتىڭ ارنايى تاجىريبە الاڭىندا 500 گەكتارداي ەگىستىك القاپ بار. وندا كۇرىشتىڭ 17 سورتى وسىرىلۋدە. مۇنداعى ماقسات - نارىقتا سۇرانىسقا يە، ەكسپورتقا شىعارىلاتىن ءونىم تۇرلەرىن وندىرىسكە ەنگىزۋ. وسى باعىتتا يران، وزبەكستان، رەسەي ەلدەرىنەن اكەلىنگەن كۇرىش سورتتارىن جەرگىلىكتى جەردىڭ ەرەكشەلىگىنە ساي بەيىمدەۋ.

ايتا كەتەيىك، اتالعان ينستيتۋت عالىمدارىنىڭ «مارجان» سورتى ەلىمىزدەگى كۇرىش ەگىسىنىڭ جارتىسىنان استامىنا ەگىلىپ، شەت ەلدەردە دە كەڭىنەن تانىلعان. سىردىڭ تۇزدى توپىراعىنا ءتوزىمدى كۇرىش سورتىنا ءالى دە سۇرانىس بار. سونداي- اق، سوڭعى جىلدارى شىعارىلعان «اي كەرىم» ، «سىر سۇلۋى» كۇرىشى جانە «التىن اراي»، «زارينا» اتالاتىن بيداي سورتتارى وزگە سورتتارعا قاراعاندا بىركەلكى، بيىك ءارى تىعىز وسەدى.