ماجارستاندا «تۇران» حالىقتار قۇرىلتايى ءوتىپ جاتىر
شاراعا 30 دان استام ەل جانە حالىقتاردىڭ دەلەگاتسياسى قاتىسىپ جاتىر. قۇرىلتايدىڭ اشىلۋ سالتاناتىندا ەجەلگى «تۇران» اسكەري شەرۋى ءوتتى.
ماجارستان پارلامەنتىنىڭ سپيكەرى لاسلو كيەۆەر قۇرىلتاي قاتىسۋشىلارىن اۋقىمدى شارانىڭ اشىلۋىمەن قۇتتىقتادى.
اقتوبە وبلىسىنىڭ اكىمى بەردىبەك ساپاربايەۆ مىنبەرگە شىعىپ، قىزىقتى ءارى جوعارى دەڭگەيدە ۇيىمداستىرىلعان شارا ءۇشىن ۇيىمداستىرۋشىلار القاسىنا العىس ءبىلدىردى. ول قۇرىلتايعا قازاقستان مەن ماجارستان اراسىنداعى جىل وتكەن سايىن نىعايىپ كەلە جاتقان تاريحي، مادەني جانە ەكونوميكالىق بايلانىستاردى ەسكەرە وتىرىپ، قازاقستان پرەزيدەنتىنىڭ تاپسىرماسىمەن كەلگەنىن ايتتى. نۇرسۇلتان نازاربايەۆتىڭ ماجارستانعا، ماجارستان پرەمەر-ءمينيسترى ۆيكتور ورباننىڭ استاناعا جاساعان ساپارلارى ەكى ەل اراسىنداعى ىنتىماقتىڭ بەكي تۇسكەنىن ايعاقتايدى.
بەردىبەك ساپاربايەۆ قازاقستاندا تۇركىستان وبلىسىنىڭ قۇرىلعانى - تاريحي تۋريزم بازاسىن قۇرۋعا كەڭ مۇمكىندىكتەر ەسىگىن اشاتىنىن، بۇل ءوز كەزەگىندە، «تۇران» حالىقتار فەستيۆالىنە قاتىسۋشىلاردى ەرەكشە قىزىقتىراتىنىن تىلگە تيەك ەتتى. بۇدان تىس، اكىم قازاقستاندا عۇنداردىڭ تاريحىن، ونەرى مەن مادەنيەتىن زەرتتەۋ ورتالىعىنىڭ اشىلۋى تۋرالى ايتىپ، كەلەسى قۇرىلتايدى قازاقستاندا وتكىزۋدى ۇسىندى. ال اقتوبە وبلىسى «ماديار تۇران» قورىنا قازاقى كيىز ءۇيدى سىيعا تارتتى.
قۇرىلتايدا جەبە تارتۋ جارىسى، ۇلتتىق مۋزىكا كونسەرتى، شامان اندەرىنىڭ كەشى، عىلىمي كونفەرەنتسيالار ءوتىپ جاتىر.
قۇرىلتاي اياسىندا ۇيىمداستىرىلعان دوڭگەلەك ۇستەلگە حالىقارالىق تۇركى اكادەمياسىنىڭ پرەزيدەنتى دارحان قىدىرالى، «قاسيەتتى قازاقستان» عىلىمي-زەرتتەۋ ورتالىعىنىڭ باسشىسى بەرىك ءابدىعالي ۇلى، گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ايبولات كوشكىمبايەۆتار قاتىستى.
دوڭگەلەك ۇستەلدە تۇركى اكادەمياسىنىڭ پرەزەنتاتسياسى ءوتىپ، «رۋحاني جاڭعىرۋ» باعدارلاماسى اياسىندا قۇرىلىپ جاتقان «قاسيەتتى قازاقستان» ورتالىعى تانىستىرىلدى.
دارحان قىدىرالى ماجار ساراپشىلارى مەن عالىمدارىنا شيۆەەت ۇلاان العاشقى تۇركى حرامىنىڭ ورنىندا جۇرگىزىلگەن قازبا جۇمىستارىنىڭ ناتيجەسىن ۇسىندى. بەرىك ءابدىعالي ۇلى «قاسيەتتى قازاقستان» كىتابىن تانىستىرىپ، استانا ماڭىنداعى كونە بوزوك قالاسى، ونىڭ عۇندارمەن بايلانىسى تۋرالى ايتتى.
«تۇران» حالىقتار قۇرىلتايىنىڭ نەگىزىن قالاۋشى ءارى يدەيالىق دەم بەرۋشى اندراش بيرو حالىقارالىق تۇركى اكادەمياسىنىڭ التىن مەدالىمەن ناگرادتالدى. حالىقارالىق تۇركى اكادەمياسى مەن «ماديار تۇران» قورىنىڭ قاتىسۋىمەن وتكەن دوڭگەلەك ۇستەلدە ىنتىماقتاستىق مەموراندۋمىنا قول قويىلدى.
قۇرىلتاي ەكى كۇنگە جالعاسادى. وندا ۇلان-عايىر جەردى الىپ جاتقان تاريحي تۇران ولكەسىن مەكەندەگەن حالىقتاردىڭ اسا باي مادەني-تاريحي مۇرالارى كورسەتىلەدى.
