بولاشاقتا قورعاس ۇلكەن شاھارعا اينالادى - ەلباسى

اقتاۋ. قازاقپارات - مەملەكەت باسشىسى نۇرسۇلتان نازاربايەۆ «قورعاس» پەن «قۇرىق» پورتتارى قۇرىلىسىنا جۇمىلدىرىلعان قۇرىلىسشىلارعا العىسىن ايتتى، دەپ حابارلايدى قازاقپارات.

ايتا كەتەيىك، بۇگىن ماڭعىستاۋ وبلىسىندا قۇرىق پورتىنداعى كولىك حابىن تانىستىرۋعا ارنالعان سالتاناتتى شارا ءوتتى. ونىڭ اياسىندا ۇيىمداستىرىلعان تەلەكوپىر بارىسىندا قۇرىق پورتىمەن «اقجىگىت - بەينەۋ» رەسپۋبليكالىق اۆتوجولىنىڭ قۇرىلىسشىلارى جانە «قورعاس - شىعىس قاقپاسى» ارنايى ەكونوميكالىق ايماقتاعى قۇرعاق پورتتىڭ جۇمىسكەرلەرى بايلانىسقا شىقتى.

«قازىرگى ساتتە «قورعاس» قۇرعاق پورتى تۇراقتى كونتەينەرلىك پويىزداردى «قۇرىق» پورتى باعىتىنا، سونداي- اق ارى قاراي ترانسكاسپييلىك دالىزبەن ەۋروپاعا جونەلتپەك. اتالعان لوگيستيكالىق تىزبەك قىتاي، كاۆكاز جانە ەۋروپا ءۇشىن تارتىمدى بولىپ وتىر. وسى ورايدا ءبىرقاتار ەلدەردىڭ مۋلتيمودالدىق باعدارلارىن بايلانىستىراتىن پويىزدىڭ جۇرۋىنە رۇقسات بەرىڭىز»، - دەدى «قورعاس- شىعىس قاقپاسى» ا ە ا  ب ك» ا ق باس ديرەكتورى مۇرات بايمۇحانبەتوۆ.

 

ءوز كەزەگىندە ەلباسى اتالعان تۇراقتى كونتەينەرلىك پويىزدىڭ قوزعالىسىن باستاۋعا رۇقسات بەردى.

«ءبىراز ۋاقىتتان بەرى «قورعاستى» تولىق قۋاتىنا قوسۋ ءۇشىن جۇمىس ىستەپ كەلەمىز. بولاشاقتا قورعاس ۇلكەن شاھارعا اينالادى جانە جۇك وتكىزۋدە اۋقىمدى توراپ بولادى. مەنىڭ ويىمشا، قىتاي پروۆينسيالارى وسى پورت ارقىلى جۇكتەرىن تاسىمالدايدى. سايكەسىنشە، ءبىزدىڭ ورتالىق ازياداعى بارلىق كورشىلەرىمىز بەن رەسەي بۇل پورتتى پايدالانۋ مۇمكىندىگىنە يە. اتقارعان جۇمىستارىڭىز ءۇشىن العىسىمدى بىلدىرەمىن»، - دەدى مەملەكەت باسشىسى.

 

بۇدان بۇرىن حابارلانعانداي، ق ر پرەزيدەنتى وزبەكستان مەن قازاقستان اراسىنداعى جولدى اشۋعا رۇقسات بەردى.