ق ر پرەزيدەنتى وزبەكستان مەن قازاقستان اراسىنداعى جولدى اشۋعا رۇقسات بەردى

اقتاۋ. قازاقپارات - بۇگىن ەلباسى نۇرسۇلتان نازاربايەۆ قۇرىق پورتىنداعى كولىك حابىن تانىستىرۋعا ارنالعان شارا اياسىندا ۇيىمداستىرىلعان تەلەكوپىر كەزىندە «بەينەۋ- اقجىگىت- وزبەكستان شەكاراسى» جولىنىڭ ءبىرىنشى كەزەڭىن اشۋعا رۇقسات بەردى، دەپ حابارلايدى قازاقپارات.

اتاپ ايتقاندا، تەلەكوپىر بارىسىندا قۇرىق پورتى مەن «اقجىگىت - بەينەۋ» رەسپۋبليكالىق اۆتوجولىنىڭ قۇرىلىسشىلارى جانە «قورعاس - شىعىس قاقپاسى» ارنايى ەكونوميكالىق ايماقتاعى قۇرعاق پورتتىڭ جۇمىسكەرلەرى بايلانىسقا شىقتى.

«نۇرلى جول» باعدارلاماسىن جۇزەگە اسىرۋ اياسىندا «بەينەۋ- اقجىگىت» اۆتوجولىن قايتا سالۋ جۇمىستارى ءجۇرىپ جاتىر. بۇل جول قۇرىق پورتى ارقىلى ءترانزيتتى ارتتىرىپ، ترانسكاسپييلىك ءدالىزدىڭ وزبەكستانمەن جانە ورتالىق ازيانىڭ باسقا دا ەلدەرىمەن بايلانىسىن قامتاماسىز ەتەدى. جولدىڭ وتكىزۋ مۇمكىندىگى تاۋلىگىنە قازىرگى 1 مىڭنان 7 مىڭ كولىككە دەيىن جەتكىزىلەدى. سونىمەن قاتار، قازاقستان- وزبەكستان شەكاراسىنداعى «تاجەن» شەكارا بەكەتىن جاڭعىرتۋ جۇمىستارى ءجۇرىپ جاتىر. ونداعى وتكىزۋ مۇمكىندىگى ەكى ەسە جوعارىلايدى. «بەينەۋ- اقجىگىت- وزبەكستان شەكاراسى» جولىنىڭ ءبىرىنشى كەزەڭى ىسكە قوسىلۋعا دايىن. قوزعالىستى باستاۋعا رۇقسات سۇرايمىز» ، - دەدى «قازاۆتوجول» ۇلتتىق كومپانياسىنىڭ باسشىسى ەرمەك قيزاتوۆ.

ءوز كەزەگىندە مەملەكەت باسشىسى اتالعان جول ۋچاسكەسىندە قوزعالىستى اشۋعا رۇقسات بەردى.

«وزبەكستان پرەزيدەنتى شاۆكات ميرزيەيەۆتىڭ سۇراۋىمەن جول قۇرىلىسى تەزدەتىلىپ جاتىر. بۇل جول وزبەكستاندى قازاقستانمەن قوسىپ، اتالعان ەلدىڭ جۇگىن كاسپيگە الىپ كەلۋگە جانە ءبىزدىڭ پورتتاردىڭ جۇمىسىن جانداندىرۋعا ۇلكەن ىقپالىن تيگىزەدى. سوندىقتان، اتقارعان جۇمىستارىڭىز ءۇشىن زور ريزاشىلىعىمدى بىلدىرەمىن»، - دەدى ق ر پرەزيدەنتى.