كوزى ناشار كورەتىن مۇگەدەك سوتتا فورتە بانكتى جەڭىپ شىقتى
مەدەۋ اۋداندىق سوتى اناتولي ميگايدىڭ ەكىنشى دەڭگەيلى بانككە قارسى تالابىن قاناعاتتاندىرىپ، مورالدىق نۇقسان كەلتىرگەنى ءۇشىن Forte bank-تەن 350 مىڭ تەڭگە ءوندىرۋ تۋرالى شەشىم شىعاردى.
«بانك وكىلدەرى قارسى ءۋاج ايتا المادى. ميگاي مىرزا دا شىققان ناتيجەگە ريزا، ول ءتىپتى وتەماقى تۋرالى ويلاماعان دا ەدى. ءبىز ءۇشىن بانكتەردىڭ كوزى ناشار كورەتىن ادامداردىڭ قۇقىعىن تاپتاماۋى ماڭىزدى. بۇل ماسەلەنى سوتقا دەيىن تىندىرۋدى كوزدەگەن بولاتىنبىز. الايدا بانك وتىنىشىمىزگە قۇلاق اسقان دا جوق»، - دەيدى ادام قۇقىعى جونىندەگى بيۋرو زاڭگەرى اننا سميرنوۆا.
ونىڭ ايتۋىنشا، ەگەر بانك قاجەت دەپ تاپسا، 2 اي ىشىندە شەشىمدى اپپەللياتسياعا بەرە الادى. بۇل سوت مۇگەدەك جانداردىڭ ءوز مۇمكىندىكتەرىن تولىق پايدالانۋعا حاقىسى بار ەكەنىن ايقىنداپ بەردى. بۇگىندە قازاقستاندا 20 مىڭعا جۋىق كوزى ناشار كورەتىن ادامدار بار. ولاردىڭ كوبى وسىنداي ماسەلەگە تاپ بولعان.
ەسكە سالا كەتسەك، اتالعان بانك كليەنتتىڭ دەپوزيتتىك شوتىن ءوز بەتىمەن پايدالانۋ قۇقىعىن شەكتەگەن. ەسەسىنە سەنىمدى ادامنىڭ كومەگىنە جۇگىنۋىن سۇراعان.
الايدا مۇنداي سەرىگى جوق ءارى مۇنىمەن ءوزى اينالىسقىسى كەلگەن كليەنت پەن بانك اراسىندا قايشىلىق تۋىندايدى.
ال مەملەكەتىمىزدىڭ زاڭىندا كوزى ناشار كورەتىن قوعام مۇشەلەرىنە جەكە شوتىن باسقارۋعا تىيىم جوق.