ەلباسى ماڭعىستاۋ وبلىسىنىڭ دامۋى جونىندە كەڭەس وتكىزدى
جيىندى اشقان مەملەكەت باسشىسى كاسپي ماڭى ايماعىنىڭ تاريحي، مادەني، رۋحاني- يدەولوگيالىق، گەوساياسي ماڭىزىن ەرەكشە اتاپ ءوتتى.
نۇرسۇلتان نازاربايەۆ ەلىمىزدىڭ مۇناي ءوندىرۋ يندۋسترياسىن، ينفراقۇرىلىم جانە كولىك- لوگيستيكا الەۋەتىن دامىتۋ ىسىندە ماڭعىستاۋ وبلىسىنىڭ ۇلتتىق ەكونوميكاعا ەلەۋلى ۇلەس قوسىپ وتىرعانىن ايتتى.
«بۇل وبلىس «نۇرلى جول» باعدارلاماسىنىڭ ارقاسىندا ءىرى كولىك- لوگيستيكا ورتالىعىنا اينالىپ وتىر. مۇندا اۋە، اۆتو، تەمىر جول، پاروم جانە تەڭىز كولىكتەرىنىڭ جەلىسى توعىسقان. اتاپ ايتقاندا، حالىقارالىق اۋەجاي، «جەزقازعان- بەينەۋ» جانە «وزەن- تۇرىكمەنستاننىڭ مەملەكەتتىك شەكاراسى» تەمىرجولدارى، «اتىراۋ- اقتاۋ» اۆتوموبيل جولى سالىنىپ، زاماناۋي اقتاۋ تەڭىز پورتى جانە قۇرىق پاروم كەشەنى ىسكە قوسىلدى. بۇل جوبالار ءوڭىر ەكونوميكاسىنىڭ دامۋىنا تىڭ سەرپىن بەرەتىن بولادى» ، - دەدى قازاقستان پرەزيدەنتى.
مەملەكەت باسشىسى بەسىنشى كاسپي سامميتىنە دايىندىق جۇرگىزۋ جانە ونى وتكىزۋ ماسەلەلەرىنە ايرىقشا توقتالدى.
«ەرتەڭ مۇندا كاسپي ماڭىنداعى بەس مەملەكەتتىڭ باسشىلارى جينالىپ، تاريحي قۇجات - كاسپييدىڭ قۇقىقتىق مارتەبەسى تۋرالى كونۆەنتسياعا قول قويادى. اتالعان قۇجات 20 -جىلدان استام ۋاقىت بويى دايىندالدى»، - دەدى ەلباسى.
ماڭعىستاۋ وبلىسىنىڭ اكىمى ەرالى توعجانوۆ ءوڭىردىڭ الەۋمەتتىك- ەكونوميكالىق دامۋ بارىسى جونىندەگى ەسەبىندە بيىلعى 6-ايدىڭ قورىتىندىسى بويىنشا ءوڭىر ەكونوميكاسىنىڭ ءوسۋ قارقىنى تۇراقتى ەكەنىن ايتتى.
«جالپى وڭىرلىك ءونىم كولەمى 2017 -جىلدىڭ وسى كەزەڭىمەن سالىستىرعاندا 99,2 پايىزدان 104,4 پايىزعا ءوستى. ونەركاسىپتىڭ نەگىزگى يندەكسى 101,2 پايىزدى قۇراپ وتىر. نەگىزگى كاپيتالعا سالىنعان ينۆەستيتسيا ۇلەسى 6 پايىزعا ارتىپ، 256 ميلليارد تەڭگەگە جەتتى»، - دەدى وبلىس اكىمى.
ەرالى توعجانوۆ يندۋستريالاندىرۋ كارتاسى جۇزەگە اسىرىلا باستاعالى وبلىستا 42 جوبا ىسكە قوسىلىپ، 392 ميلليارد تەڭگە كولەمىندە تىكەلەي ينۆەستيتسيا تارتىلعانىن، سونداي-اق بۇگىندە جالپى قۇنى 418 ميلليارد تەڭگە بولاتىن 89 جوبا ورىندالىپ جاتقانىن مالىمدەدى.
«نۇرلى جول» جانە «نۇرلى جەر» مەملەكەتتىك باعدارلامالارىنىڭ جۇزەگە اسىرىلۋى ءوڭىر ەكونوميكاسىنىڭ دامۋىنا سەرپىن بەردى. سونىڭ اياسىندا رەسپۋبليكالىق جانە جەرگىلىكتى ماڭىزى بار 600 شاقىرىم جول سالىندى جانە قايتا جوندەلدى. سونداي-اق، 1,8 ميلليون شارشى مەتر تۇرعىن ءۇي سالىندى»، - دەدى ءوڭىر باسشىسى.
جاسالعان باياندامادان سوڭ، ەلباسى وبلىستاعى الەۋمەتتىك-ەكونوميكالىق كورسەتكىشتەردىڭ تۇراقتى ەكەنىن اتاپ ءوتىپ، ودان ءارى پىسىقتاۋدى قاجەت ەتەتىن ءبىرقاتار ماسەلەگە توقتالدى.
«ەكونوميكانىڭ تۇراقتى دامۋىنا قول جەتكىزۋ كەرەك. ول ءۇشىن ەكونوميكانى ديۆەرسيفيكاتسيالاپ، قىزمەت كورسەتۋ مەن وڭدەۋ سەكتورىن دامىتۋدى قامتاماسىز ەتۋ قاجەت. مىسالى، مۇندا جالپى كولەمى 2 مىڭ گەكتار بولاتىن «مورپورت اقتاۋ» ارنايى ەكونوميكالىق ايماعى جۇمىس ىستەيدى. مەملەكەت ونىڭ ينفراقۇرىلىمىن دامىتۋعا قاجەتتى قاراجات ءبولدى. ەندى ونىڭ جۇمىسىن جانداندىرىپ، جاڭا جۇمىس ورىندارىن اشۋ كەرەك»، - قازاقستان پرەزيدەنتى.
نۇرسۇلتان نازاربايەۆ ماڭعىستاۋ وبلىسىنىڭ تۋريستىك الەۋەتىنىڭ زور ەكەنىن ايتىپ، وبلىستىڭ گەوگرافيالىق جانە مادەني ارتىقشىلىقتارىن، سونىڭ ىشىندە ءوڭىردىڭ تەڭىز جاعاسىندا ورنالاسقانىن، سونداي- اق مۇندا جالپىۇلتتىق جانە حالىقارالىق ءمانى زور كوپتەگەن تاريحي ەسكەرتكىشتەردىڭ بار ەكەنىن اتاپ ءوتتى.
جيىن سوڭىندا مەملەكەت باسشىسى اكىمدىككە ۇكىمەتپەن بىرلەسىپ، ءوڭىردىڭ كولىك- لوگيستيكالىق الەۋەتىن ودان ءارى پايدالانۋ، شاعىن جانە ورتا بيزنەستى دامىتۋ، جاڭا جۇمىس ورىندارى اشۋ، سونداي- اق وندىرىسكە جاڭعىرتىلاتىن ەنەرگيا كوزدەرىن ەنگىزۋ جونىندە تاپسىرما بەردى.
سونىمەن قاتار، مەملەكەت باسشىسى بيىل پايدالانۋعا بەرىلگەن اقتاۋ قالاسىنداعى دوستىق ءۇيىنىڭ قىزمەتىمەن تانىستى.
دوستىق ۇيىندە «قوعامدىق كەلىسىم» مەملەكەتتىك مەكەمەسى، وڭىردەگى 20 ەتنومادەني بىرلەستىك، وبلىستىق انالار كەڭەسى، ماڭعىستاۋ وبلىسىنىڭ قازاقستان حالقى اسسامبلەياسى جانىنداعى عىلىمي- ساراپتامالىق توپ، وبلىستىق ارداگەرلەر كەڭەسى ورنالاساتىن بولادى.
ارالاپ كورۋ بارىسىندا قازاقستان پرەزيدەنتىنە وبلىستىڭ ينۆەستيتسيالىق جوبالارى تانىستىرىلدى. اتاپ ايتقاندا، ءجىپ يىرەتىن جانە ماتا وندىرەتىن زاۋىت، جاڭاوزەن قالاسىنداعى گازتۋربينا ەلەكتروستانتسياسى، قۇرىق سەلوسىنداعى اۋىزسۋ زاۋىتى، «م ا ە ك قازاتومپروم» ج ش س-نىڭ اۋماعىنداعى بۋ-گازدى قوندىرعى، ءتۇپقاراعان اۋدانىنداعى جەل ەلەكتروستانسياسى، اقتاۋ ەكوقالاسى جانە باسقا دا نىساندار.