ماجارستاندا «تۇران» تۇركى حالىقتارىنىڭ دۇنيەجۇزىلىك قۇرىلتايى باستالدى

بۋداپەشت. قازاقپارات - «تۇران» تۇركى حالىقتارىنىڭ دۇنيەجۇزىلىك قۇرىلتايىنا قاتىسۋشىلار ماجارستان پارلامەنتىندە قوناق بولدى، دەپ حابارلايدى قازاقپارات.

 ماجارستاننىڭ حالىقتىق جيىنىنىڭ ۆيتسە- سپيكەرى شاندور لەجاك تۇركى قۇرىلتايىنا كەلگەن قازاقستاندىق دەلەگاتسيا - ق ر مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ، حالىقارالىق تۇركى اكادەمياسىنىڭ پرەزيدەنتى دارحان قىدىرالى جانە «قازاقپارات» ح ا ا باس ديرەكتورى اسقار ۋماروۆپەن كەزدەستى. ۆيتسە- سپيكەر شاندور لەجاك «تۇران» قۇرىلتايى حالىقتاردى بىرىكتىرىپ، مادەني- گۋمانيتارلىق بايلانىس ورناتۋعا مۇمكىندىك بەرەتىن ماڭىزدى شارا ەكەندىگىن اتاپ ءوتتى. پارلامەنتتەگى كەزدەسۋدە ماجارستانداعى «ماديار تۇران» قورىنىڭ جەتەكشىسى، ماجارلىق انتروپولوگ اندراش بيرو قۇرىلتايدىڭ تاريحىنا توقتالا وتىرىپ، اۋقىمدى شارانىڭ ۇيىمداستىرىلىپ كەلە جاتقانىنا بيىل 10 جىل تولعانىن ەسكە سالا كەتتى. ول قۇرىلتايدى ۇيىمداستىرۋداعى قازاقستاننىڭ قوسقان ۇلەسىن ءسوز ەتتى. كەزدەسۋدەن سوڭ 30 دان استام تۇركى ەلدەرى وكىلدەرىنىڭ قاتىسۋىمەن وتكەن ماجارستان پارلامەنتىندەگى كەڭەيتىلگەن جيىندا شاندور لەجاك پەن اندراش بيرو ءسوز سويلەپ، «تۇران» حالىقتارىنىڭ فەستيۆالىن اشىق دەپ جاريالادى. سونداي- اق، ول تۇركى حالىقتارىنىڭ باسىن قوساتىن قۇرىلتايدىڭ بولاشاعىنا قاتىستى ماسەلەلەردى دە ءسوز ەتتى.

ايتا كەتۋ كەرەك، «تۇران» حالىقارالىق قۇرىلتايى ەكى جىلدا ءبىر رەت وتكىزىلەدى. وعان بۇكىل ەۋروپا ەلدەرىنەن 300 مىڭنان استام تۋريست جينالادى. ەسكە سالا كەتسەك، قۇرىلتايعا قاتىسۋشىلار ماجارستان استاناسىنداعى اباي قۇنانبايەۆتىڭ ەسكەرتكىشىنە گۇل شوقتارىن قويدى.