20:37, 10 - تامىز 2018 | GMT +6
بىشكەكتىڭ ورتالىعىندا جارىلىس بولدى
بىشكەك. قازاقپارات - بۇگىن بىشكەكتىڭ ورتاسىنداعى رىسقۇلوۆ كوشەسىنىڭ قيىلىسىنداعى يسانوۆ كوشەسىنىڭ بويىندا جارىلىس بولدى.
قولدان جاسالعان جارىلعىش زات ىسكە قوسىلىپ كەتكەن، دەپ حابارلايدى قازاقپاراتتىڭ مەنشىكتى ءتىلشىسى.
جەرگىلىكتى ب ا ق وكىلدەرى حابارلاعانداي، جارىلىس رەسەيلىك كاسىپكەر الەكساندر گايدۋكوۆقا قاستاندىق جاساۋ ماقساتىندا كەڭسەسى ورنالاسقان ءۇيدىڭ اۋلاسىندا ۇيىمداستىرىلعان. جارىلعىش زاتتى كاسىپكەردىڭ اۆتوكولىگىنىڭ ماڭىنداعى اعاش بۇتاقتارىنىڭ اراسىنا تىعىپ قويعان. گايدۋكوۆتىڭ بىلەكتەرى مەن سانى ازداپ جارالانعان.
تەرگەۋ امالدارى جۇرگىزىلىپ جاتىر.
جارىلىستىڭ بولعان ءساتى الەۋمەتتىك جەلىلەردە جاريالاندى.
بۇعان دەيىن، 2016 -جىلدىڭ ءساۋىر ايىندا، الەكساندر گايدۋكوۆقا وق اتىلىپ، قاستاندىق جاسالعان ەدى. قىلمىس سول كۇيى اشىلعان جوق.