تۇركىستان وبلىسىندا جازۋشى دۋلات يسابەكوۆتىڭ كىتاپحاناسى اشىلدى
كىتاپحانانىڭ اشىلۋ سالتاناتىندا ق ر جازۋشىلار وداعىنىڭ مۇشەلەرى، ەلىمىزگە تانىمال اقىن-جازۋشىلار مەن زيالى قاۋىم وكىلدەرى ءسوز سويلەپ، زاڭعار قالامگەردى قۋانىشىمەن قۇتتىقتادى. اتاپ ايتساق، ەركىنبەك تۇرىسوۆ، بەكسۇلتان نۇرجەكەيەۆ، مارحابات بايعۇت، قۇلبەك ەرگوبەك، قاسىمحان بەگمانوۆ، قازىبەك يسا جانە وزگە دە قالامگەرلەر جىلى لەبىزدەرىن ارنادى. كىتاپحانا ءارى مۇراجاي رەتىندە سالىنعان ۇيدە دۋلات يسابەكوۆتىڭ كىتاپتارى مەن ءتۇرلى ماراپاتتارى، ءومىرى مەن شىعارماشىلىعىنان سىر شەرتەتىن زاتتار قويىلعان.
جازۋشىنىڭ جۇمىس ىستەيتىن جانە دەمالاتىن بولمەلەرى دە تالاپقا ساي. سونىمەن قاتار، قازاق جانە الەم جازۋشىلارى مەن اقىندارىنىڭ كىتاپتارى بار. جالپى سانى 2500 كىتاپتى جازۋشىنىڭ ءوزى تارتۋ ەتكەن. الداعى ۋاقىتتا بۇل كىتاپحانا الەمنىڭ ادەبيەت جاۋھارلارىمەن تولىعادى.
ەلباسىنىڭ «رۋحاني جاڭعىرۋ» باعدارلاماسى شەڭبەرىندە قولعا الىنعان ءىس-شاراعا ەل اعالارى مەن وقىرمان قاۋىم ريزاشىلىعىن ءبىلدىردى. ەندى بۇل كىتاپحانادان تەك ورداباسى اۋدانىنىڭ تۇرعىندارى عانا ەمەس، وسى اۋدانعا كەلگەن قوناقتار دا رۋحاني قازىنا الىپ، تانىمدارىن كەڭەيتەدى.
جيىن سوڭىندا دۋلات يسابەكوۆ وزىنە قۇرمەت كورسەتكەن جەرلەستەرى مەن وقىرمان قاۋىمعا، وبلىس باسشىلىعىنا العىسىن ايتىپ، قازاق ادەبيەتىنە ۇلەس قوسا بەرەتىنىن جەتكىزدى. وسى شىعارماشىلىق ۇيىندە ءتۇرلى شىعارمالارىن جالعاستىراتىنىن ايتتى.
