استاناداعى ەسىل وزەنىنىڭ «قاندى وزەن» ەكەنى راس پا؟

None
None
استانا. قازاقپارات- بيىلعى جاز ماۋسىمى استانالىقتار ءۇشىن، «تىنىش ءوتتى» دەسەك قاتەلەسەرمىز. وعان دالەل، قالاداعى تەك ءبىر عانا ەسىل وزەنىندە 15 بىردەي ادام سۋعا باتىپ، اجال قۇشتى.

ەلوردانىڭ ەكىگە ءبولىپ، شاھارعا ءسان- سالتانات بەرىپ تۇرعان ەركە ەسىلدىڭ «قاندى وزەن» ەكەنى راس پا؟

استانادا بيىلعى جاز ماۋسىمىندا 15 بىردەي ادام قالاداعى ەسىل وزەنىنە باتىپ اجال قۇشقان. وكىنىشتىسى اجالى سۋدان بولعان تۇرعىنداردىڭ 9 ى ورىمدەي جاس جەتكىنشەكتەر بولىپ وتىر. استانالىقتار ەسىلدىڭ اعىنى باياۋ، «جۋاس» وزەن ەكەنىن العا تارتۋدا. ايتۋلارىنشا، ءبىر جازدا «قاندى وزەن» اتانعان ەسىلدە بۇرىن- سوڭدى مۇنداي وقيعالار بولىپ كورمەپتى.

«وتكەندە جاڭالىقتاردان ەستىپ، تاڭ قالدىق. ءبارى سول جاۋاپكەرشىلىكتىڭ تومەندىگىنەن، اتا- انالاردىڭ بالالارعا دۇرىس قاراماۋىنان بولىپ وتىر دەپ ويلايمىن. ءبىر جاعىنان جازاتايىم وقيعا بولعان سوڭ، نە ايتاسىڭ؟ ءوزىم جەرگىلىكتى اقمولالىقپىن، قوياندىدا تۇرامىن. ەسىلدى «قاندى وزەن» دەپ ايتۋعا اۋزىم بارمايدى، قۇداي بەتىن ارى قىلسىن»، - دەيدى جەرگىلىكتى تۇرعىنداردىڭ ءبىرى.

سونىمەن بىرگە استانالىقتار اسىرەسە جاز ۋاقىتىندا بالالارعا ساق بولۋ قاجەتتىگىن العا تارتتى.

«وتكەندە 4 بىردەي ءجاسوسپىرىمنىڭ دەنەسىن ەسىلدەن الىپ شىقتى دەگەندى ەستىدىم. قايعىلى جاعداي، اتا- انالارىنا قۇداي سابىر بەرسىن. سوسىن كىلەم جۋىپ وتىرعان كەلىنشەك سۋعا كەتتى دەپ جاتتى. سونىڭ ءبارى جاۋاپكەرشىلىكتىڭ تومەندىگىنەن، سۋعا قالاي بولسا سولاي قاراۋدان بولىپ تۇر عوي.

ەسىل «قاندى» وزەن ەمەس. ونىڭ اعىسى باياۋ، يىرىمدەرى دە سونداي تەرەڭ ەمەس. تەك ابايسىزدا ورىن العان اجال بولىپ تۇر. ايتپەسە، وزەننەن قىس بويى بالىق اۋلاپ شىعامىز، ونداي وزەن دەپ ويلامايمىن. مىسالى شىعىستاعى ەرتىس سونداي قاندى وزەن بولۋى مۇمكىن، سەبەبى ول ۇلكەن وزەن، بىزدەن باستاپ سوناۋ قىتايعا دەيىن سوزىلىپ جاتىر. بىزدىكى ونىڭ جانىندا شاعىن وزەن، تەك سۋدىڭ ماڭىنا بارعاندا «بيسميلليا» دەپ ءجۇرۋ كەرەك شىعار»، - دەپ ءوز ويلارىن ورتاعا سالدى ەلوردالىقتار.

بۇگىندە قالانىڭ قاق ورتاسىنداعى وزەن بويىنا توتەنشە جاعدايلار دەپارتامەنتىنىڭ باستاماسىمەن ءتۇرلى ەسكەرتۋلەر دە تولىپ تۇر. الايدا، مۇنىڭ ءوزى «ابايسىزدا كەلگەن اجالدى» تۇساۋ بولا الماي وتىر.

NUR. KZ

سوڭعى جاڭالىقتار