ءسىزدىڭ رەاكسياڭىز - ءسىزدىڭ دەنساۋلىعىڭىز

 استانا. قازاقپارات - كەيدە ادامداردىڭ كوپشىلىگىنە جان تىنىشتىعى جەتىسپەيدى. كوپ نارسەگە تالاپ قويماي، بەيجاي قاراپ ۇيرەنسەك، اۋىرتپالىقتاردى باستان وڭاي وتكىزەر ەدىك.

قانداي جاعداي بولسا دا، ءوزىن بايسالدى ۇستاي الاتىن ادام وتە قىزۋ ارەكەتتەنەتىن ادامعا قاراعاندا ءومىردىڭ نەگاتيۆتى زاردابىنان قۇتىلا الادى. ءوزىڭىزدى جانە جاقىندارىڭىزدى قورعاۋ ءۇشىن ۇستامدى جانە بايسالدى بولىپ ۇيرەنۋ كەرەك. ونى كەز كەلگەن جاستا يگەرۋگە بولادى. بارلىق اۋرۋ جۇيكەدەن تۋادى دەگەندى ءجيى ەستيمىز. ادامنىڭ سابىرلى بولۋى تەك پسيحولوگيالىق ەمەس، سونىمەن قاتار فيزيكالىق دەنساۋلىعىنا دە بايلانىستى ماسەلەلەردەن قورعايدى. ءاردايىم اشۋلانۋ، جەك كورۋشىلىك جانە ايقاي پسيحيكاعا جاقسى اسەر ەتۋى مۇمكىن ەمەس. كەيدە ايقايلاۋ -  جينالعان اۋىرتپالىقتى شىعارىپ جىبەرۋدىڭ جالعىز ءادىسى. ءبىراق ايقايىڭىزعا اينالاداعىلار ءبىرتۇرلى قاراۋى مۇمكىن. سوندىقتان ونداي جاعدايعا جەتكىزبەگەن دۇرىس.

ءار نارسەنى ۋايىمداماڭىز ادامدار ۋايىمدايتىن نارسەنىڭ بارلىعى بىردەي سونشا قاۋىپتى ەمەس. ارينە، كوپشىلىك نەلىكتەن بىردەن سابىرعا كەلە المايتىنىنىڭ بىرنەشە سەبەبىن ايتىپ اقتالۋى مۇمكىن. اقشانىڭ جەتىسپەۋى، جەكە ومىرىندەگى پروبلەمالار، جۇمىستاعى قيىندىقتار، جاڭالىقتا ايتىلىپ جاتقان جامان نارسەلەر جانە باسقا دا جاعىمسىزدىقتار ءومىردى ۋلايدى. ءسوزسىز، ولاردان قۇتىلۋ قيىن. ول ءۇشىن شىدامدى بولىپ، تىرىسۋ كەرەك. ادامنىڭ قانشالىقتى اشۋلانعانىنا، جۇيكەسىن قۇرتقانىنا بايلانىستى ول ماسەلەلەر سونشالىقتى جىلدام شەشىلەدى دەپ كىم ايتتى؟ ! ءتىپتى، كەرىسىنشە، ول قانشالىقتى اشۋشاڭ بولسا، كەدەرگىنى شەشۋ سونشالىقتى قيىنداي تۇسەدى. سەبەبى اشۋ ۇستىندە ادامدار دۇرىس شەشىمدى بايقامايدى، كەڭەستى تىڭدامايدى جانە كومەك سۇراي المايدى. ولار تەك وزدەرىن جانە جانىنداعىلاردى شارشاتادى، كۇشى مەن قۋاتىن جوعالتادى. ادامدا ەنەرگيا شەكسىز، ول وزىنە دەگەن ۇقىپتى قاتىناستى جانە قالپىنا كەلۋ ءۇشىن ۋاقىتتى كەرەك ەتەدى. ءبىراق مۇنداي قاتتى سەزىمدەر ونى تەز جوعالتادى. سوڭىندا بار اقپاراتتى ساراپتاۋعا ەشتەڭە قالمايدى. سوندىقتان، ەستە ساقتاڭىز، بايسالدى بولۋ تەك دەنساۋلىققا ەمەس، قيىن سۇراقتاردى وڭاي شەشۋگە دە كومەكتەسەدى.

وزىڭىزگە ۋاقىت ءبولىڭىز ول 15 مينۋت بولسا دا تەك سىزگە ارنالۋى كەرەك. جۇمىس كوپ بولسا دا، قوڭىراۋدان، سويلەسۋدەن باس تارتىڭىز، ەشكىمگە كەدەرگى كەلتىرمەيتىن جەرگە كەتىڭىز. مۇنداي 15 مينۋت اپتاسىنا 1-2 رەت ەمەس، كۇندە بولعانى جاقسى. ول ۋاقىتتى وزىڭىزگە ارناڭىز، ول مۇمكىن ەمەس سەكىلدى كورىنۋى مۇمكىن. ءبىراق ءان تىڭداعاندا، كىتاپ وقىعاندا نەمەسە تەلەديدار قاراپ وتىرعاندا دا ءوز- وزىڭىزبەن بولۋعا بولادى. باستىسى، سىرتقى قوزدىرعىشتاردان قۇتىلۋدى ۇيرەنۋ كەرەك. ادام تولى اۆتوبۋستاعى كوڭىل كۇيى جوق جولاۋشىنىڭ نەمەسە كورشىلەس ماشيناداعى جۇرگىزۋشىنىڭ ايعايى ءسىزدى الاڭداتپاۋى كەرەك. ومىرىڭىزگە ماڭىزى جوق ادامدارعا ءمان بەرمەۋگە ۇيرەنگەن ءجون.

 ەسكەرتۋ بەرىڭىز دورەكى ارەكەتكە بىردەن اشۋ شاقىرۋدىڭ ءمانى جوق. ءبىراق ادەيى ىستەگەن بولسا، بەتىنە كەتپەس ءۇشىن ەسكەرتۋ جاساعان جەتكىلىكتى. ول ادام ويلاماعان جەردەن، بايقاۋسىزدان ىستەگەن بولۋى دا مۇمكىن. ءاردايىم جۇيكەڭىزگە تيەتىن نارسەلەردەن قۇتىلىڭىز وي- ورىسىمەن ەرەكشەلەنەتىن ادامداردان قۇتىلىڭىز. تاتۋ بولۋ ءۇشىن نە ىستەسەڭىز دە، قانشا تىرىسساڭىز دا كەلىسپەسە، تابيعاتقا قارسى تۇرا المايسىز. سوندىقتان، ونىمەن سويلەسۋدى، مۇمكىندىك بولسا، كورىسۋدى توقتاتىڭىز. جۇيكەڭىزگە تيەتىن باعدارلامانى قاراماڭىز، ونداي اقپاراتتى كورمەڭىز جانە جاعىمسىز پىكىرلەردى وقىماڭىز.

ءسىزدىڭ رەاكسياڭىز -  ءسىزدىڭ دەنساۋلىعىڭىز! بارلىعىن وزگەرتۋ مۇمكىن ەمەس، ءبىراق وعان دەگەن قاتىناسىڭىزدى وزگەرتۋگە بولادى. بىرەۋ جۇيكەڭىزگە تيسە، ونى كۇلكىلى جاعدايدا ەلەستەتىڭىز نەمەسە ونىڭ قاتىسى بار كۇلكىلى وقيعانى ەسكە الىڭىز. ادەتتە، نارازىلىق ءبارىن شىنداپ قابىلداعاننان بولادى. ومىرىڭىزگە ءازىلدىڭ ءبىر بولىگىن قوسىڭىز. كۇلكى ءومىردى ۇزارتادى. ناعىز قايعىنىڭ قاسىندا بىرەۋدىڭ ءبىرتۇرلى ارەكەتى تىپتەن ءمان بەرۋگە تۇرمايدى. مۇنىڭ اقشا جەتىسپەۋىنە دە، اراقاتىناستاعى پروبلەماعا دا بايلانىسى بار. ۋاقىتتى ۋايىمداۋعا ەمەس، جاعدايدى تۇزەۋگە، جول ىزدەۋگە ارناڭىز. سوندىقتان ومىردەگى قيىندىقتارعا جەڭۋ كەرەك بەلەس رەتىندە قاراڭىز. باستىسى -  سەنۋ! بارلىعىنا كۇشىڭىز جەتەتىنىنە سەنىڭىز. قولىڭىزدان ەشتەڭە كەلمەسە، قيىندىقتارمەن كۇرەسە الماساڭىز، وسى كۇنگە دەيىن جەتەر مە ەدىڭىز؟ ! ياعني، اشۋلانۋعا سەبەپ جوق. وزىڭىزگە كەرەك ۋاقىتتا بايسالدى جانە جيناقى بولا الاتىنىڭىزدى دالەلدەڭىز. ال قالعانىنىڭ ءبارى ءسىز ءۇشىن ۇساق- تۇيەك، ماعىناسى جوق.

 الەمنىڭ بارلىق ماسەلەسىن شەشۋگە تىرىسپاڭىز. مىندەتتى تۇردە ۇيقىڭىزدى قاندىرىڭىز، سەريال قاراۋدان باس تارتىڭىز. شارشاعان جۇيكە جۇيەسى اۋىرتپالىقپەن كۇرەسۋى قيىن. ارينە، سىزگە راقات سىيلايتىن سپورت تۇرىمەن اينالىسىڭىز. اراسىندا وزىڭىزگە كوڭىل كوتەرەتىن دەمالىس جاريالاڭىز. بۇرىنعىعا قاراعاندا سابىرلى بولا تۇسسەڭىز، اينالاڭىزدا ءبارى قيىن ءارى كۇيگەلەك ەمەس ەكەنىنە تاڭعالا قارايسىز. ولاردىڭ اراسىنان قۋانتاتىن جانە سەنىم بەرەتىن زاتتار كوپ ەكەندىگىن كورەسىز.

Massaget.kz