ەلوردادا ساۋدا ورنىنىڭ قۇنى قانشا
«بىزدە «1000 ورىن» باعدارلاماسى بويىنشا جىلىنا 1 شارشى مەترگە - 20 مىڭ تەڭگە تاريف بەكىتىلگەن. ەگەر كاسىپكەر ءبىزدىڭ باعدارلاما بويىنشا اۋماعى 10 شارشى مەتردى قۇرايتىن دۇڭگىرشەك ورناتاتىن بولسا، وندا جىلىنا 200 مىڭ تەڭگە نەمەسە ايىنا 18 مىڭ تەڭگەدەن تولەيدى. ماسەلەن، كاسىپكەر گۇل ساتاتىن بولسا جانە ونىڭ ءبىر اپتالىق تابىسى 200-300 مىڭ تەڭگەنى قۇراسا، ايىنا 1 ميلليون تەڭگە كىرىس الادى دەگەن ءسوز. دەمەك، وعان ايىنا 18 مىڭ تەڭگە تولەپ تۇرۋ تۇك ەمەس. بۇل باعانى كوتەرە المايمىز، بارلىق باعا بەكىتىلگەن» ، - دەدى «استانا ا ك ك» ا ق باسقارما ءتوراعاسى نۇرلان جاقىپوۆ جۋرناليستەردىڭ ساۋالىنا وراي.
سونىمەن قاتار ول بايقاۋعا قاتىسۋ تەتىكتەرىن دە جان- جاقتى ايتىپ بەردى.
«ءبىز قالاي جۇمىس ىستەيمىز؟ قىزىعۋشىلىق تانىتقان تۇلعا الەۋمەتتىك- كاسىپكەرلىك كورپوراتسياسىنا كەلىپ، بەلگىلى ءبىر كوشە قيىلىسىندا گازەت نەمەسە جەمىس- جيدەك پەن كوكونىس ساتۋ ءۇشىن دۇڭگىرشەك ورناتقىسى كەلەتىنىن ايتادى. وسىدان كەيىن ءبىز بارلىق وتىنىمدەردى جيناقتاپ، ولاردى بۇل ماسەلە كەلىسىلەتىن ساۋلەت باسقارماسىنا جىبەرەمىز. مۇنىڭ بارلىعى اكىمدىكتەگى مۇددەلى ورگاندار تاراپىنان بەكىتىلگەننەن كەيىن بىزگە كوشە ساۋداسىنا ارنالعان دۇڭگىرشەكتەردى قويۋعا بولاتىن ورىندار كەلەدى. سونان سوڭ ءبىز كونكۋرس جاريالاپ، ماسەلەن ورىن تۋرالى حابارلاندىرۋدى «سمارت استانا» ، اكىمدىك، «اتامەكەن» ۇكپ جانە ا ك ك سايتارىنا ورنالاستىرامىز» ، - دەدى كورپوراتسيا وكىلى.
وسى رەتتە نۇرلان جاقىپوۆ ءبىر ورىنعا تورتتەن استام ادام قىزىعۋشىلىق تانىتاتىن بولسا، وندا اۋكسيون جۇرگىزىلەتىندىگىن ايتتى.
«اۋكسيون اياسىندا كىم ۇلكەن سوما ۇسىنسا، سول جەڭىسكە جەتەدى جانە بۇل ءبىر رەتتىك تولەم بولادى. سودان كەيىن جەڭىسكە جەتكەن ادام دا جىلىنا 200 مىڭ تەڭگە تولەيتىن بولادى» ، - دەدى ول.