جەمقورلىققا قارسى كۇرەس: اگەنتتىك ءوز تاكتيكاسىن وزگەرتتى
سىبايلاس جەمقورلىققا قارسى ساياسات دەپارتامەنتىنىڭ ديرەكتورى دانيار سابىربايەۆتىڭ ايتۋىنشا، بۇگىندە حالىق كوپ نارسەنى جەمقورلىق دەپ قابىلدايدى.
الايدا زاڭ بويىنشا كەيبىر ارەكەتتەر ونداي ساناتقا جاتپايدى. ماسەلەن، ءبىر ادام ۆوكزالعا بارىپ، بيلەت تابا الماسا، ونى ءوز ەركىمەن دەلدالداردان ساتىپ الادى.
ارتىنان «بۇل - تازا جەمقورلىق» دەيدى. الايدا زاڭعا سايكەس، ول ەكى ادامنىڭ اراسىنداعى قارىم-قاتىناس قانا جانە سىبايلاس جەمقورلىق بولىپ سانالمايدى. بۇدان بولەك، مەكتەپ ديرەكتورى اقشا جيناسا، حالىق ونى دا جەمقورلىققا جاتقىزادى.
«شىن مانىندە، ول جەمقورلىق ەمەس. ءبىز وسىنى ءۇش جىل بويى ءتۇسىندىرىپ كەلدىك. ءبىراق ەشتەڭە شىقپادى. سول سەبەپتى ءوز تاكتيكامىزدى وزگەرتتىك. ەندى، ءبىز زاڭ بويىنشا جەمقورلىقتىڭ انىقتاماسىنا قارامايمىز. حالىق جەمقورلىق دەسە، تەكسەرىسكە كىرىسەمىز. قازىر كوللەدجدەردى، تەمىرجول ۆوكزالدارىن تەكسەرىپ جاتقانىمىز دا سودان. الداعى ۋاقىتتا باسقا دا ۇيىمدارعا بارامىز. بۇرىن ولار ءبىزدى جاقىنداتپاي جۇرسە، ەندىگى كەزەكتە ولاي بولمايدى. ءبىز حالىقتىڭ «تاپسىرىسى» بويىنشا جۇمىس ىستەيمىز»، - دەدى د. سابىربايەۆ استانادا وتكەن جيىندا.
ونىڭ ايتۋىنشا، سىبايلاس جەمقورلىقپەن كۇرەس شارالارىنا قوعامنىڭ ءوزى - ەل ازاماتتارى اتسالىسپاسا، وسى سالاداعى جۇمىستىڭ ناتيجەسى بولمايدى.
«ءبارى ويلايدى، جەمقورلىقتى مەملەكەتتىڭ كۇشىمەن عانا جەڭۋگە بولادى. ءوزىمىزدىڭ اگەنتتىك، تەرگەۋ قىزمەتتەرى جانە تاعى باسقا ورگاندار كۇرەسۋى ءتيىس دەگەن پىكىر بار. استە ولاي ەمەس. حالىق وسى جۇمىسقا نەعۇرلىم كوپ ارالاسسا، جەمقورلىقتىڭ دەڭگەيى دە سوعۇرلىم تومەن بولادى. ءبىزدىڭ جۇمىسىمىز دا ءتيىمدى بولادى. حالىق جەمقورلىقتى جويۋعا ءوزى مۇددەلى بولۋى قاجەت. وكىنىشكە قاراي، قوعامنىڭ مىقتى ۇستانىمى جوق. ماسەلەن، ءدال قازىر ءبارىمىز جەمقورلىققا قارسىمىز دەپ ايتساق تا، ەرتەڭ دارىگەر تۋعان-تۋىسىمىزعا جاقسى قاراسىن دەگەن نيەتپەن زاڭسىز اقشا بەرۋگە دايىن تۇرامىز. دەمەك، سول كەزدە جەمقورلىققا قاتىستى ۇستانىمىمىز وزگەرەدى. سوندىقتان ەڭ الدىمەن جالپى مۇددەنى جەكە مۇددەدەن جوعارى قويۋ قاجەت. ال جەكە سۇراقتاردى شەشكەندە سول جالپى مۇددەنى ويلاۋىمىز ءجون. سوندا عانا جەمقورلىق سالاسىنداعى جاعداي، حالىقتىڭ ساناسى وزگەرەدى. ءبىز وسى ماسەلەگە نەگىزگى باسىمدىق بەرىپ كەلەمىز»، - دەپ اتاپ كورسەتتى د. سابىربايەۆ.