ەلباسى شىمكەنت قالاسىنان سەنات دەپۋتاتتارىن سايلاۋ تۋرالى جارلىققا قول قويدى

استانا. قازاقپارات - ەلباسى شىمكەنت قالاسىنان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋدى تاعايىنداۋ تۋرالى جارلىققا قول قويدى، دەپ حابارلايدى اقوردانىڭ باسپا ءسوز قىزمەتى. قازاقپارات جارلىقتىڭ تولىق ءماتىنىن جاريالايدى.

شىمكەنت قالاسىنان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋدى تاعايىنداۋ تۋرالى

قازاقستان رەسپۋبليكاسى كونستيتۋتسياسىنىڭ 44-بابى 2) تارماقشاسىنا، 50-بابى 2-تارماعىنا، «قازاقستان رەسپۋبليكاسىنداعى سايلاۋ تۋرالى» 1995 -جىلعى 28 -قىركۇيەكتەگى قازاقستان رەسپۋبليكاسى كونستيتۋتسيالىق زاڭىنىڭ 69-بابى 1-تارماعىنىڭ 2) تارماقشاسىنا، 129-بابىنا جانە «قازاقستان رەسپۋبليكاسىنىڭ اكىمشىلىك- اۋماقتىق قۇرىلىسىنىڭ كەيبىر ماسەلەلەرى تۋرالى» قازاقستان رەسپۋبليكاسى پرەزيدەنتىنىڭ 2018 -جىلعى 19 -ماۋسىمداعى № 702 -جارلىعىنا سايكەس قاۋلى ەتەمىن:

1. 2018 -جىلعى 5 -قازانعا شىمكەنت قالاسىنان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋ تاعايىندالسىن.

2. داۋىس بەرۋدى وتكىزۋ، سايلاۋ قورىتىندىلارىن جانە قازاقستان رەسپۋبليكاسى پارلامەنتى سەناتى دەپۋتاتتارىنىڭ وكىلەتتىك مەرزىمىن ايقىنداۋ «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 129-بابىنا سايكەس جۇزەگە اسىرىلاتىن بولىپ بەلگىلەنسىن.

3. قازاقستان رەسپۋبليكاسىنىڭ ۇكىمەتى، شىمكەنت قالاسىنىڭ اكىمى شىمكەنت قالاسىنان قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋدى ۇيىمداستىرۋشىلىق، ماتەريالدىق- تەحنيكالىق جانە قارجىلىق قامتاماسىز ەتۋ جونىندەگى شارالاردى قابىلداسىن.

4. وسى جارلىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ پرەزيدەنتى ن. نازاربايەۆ

 استانا، اقوردا، 2018 -جىلعى 9 -تامىز

 №731