تەرگەۋشى مەن كەدەنشىنىڭ ۇيىنەن ميلليونداعان تەڭگەنىڭ پاراسى تابىلدى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى قىتايلىق تاۋارلاردى وتكىزگەنى ءۇشىن پارا العانداردى ۇستادى، دەپ حابارلايدى قازاقپارات ءتىلشىسى.

اگەنتتىكتىڭ رەسمي وكىلى نۇرلان جاحيننىڭ ايتۋىنشا، شىعىس قازاقستان وبلىسى بويىنشا مەملەكەتتىك كىرىستەر دەپارتامەنتىنىڭ قىزمەتكەرلەرى پارامەن ۇستالعان. ولار ەكى جىل بويى زاڭسىز سىياقى الىپ كەلگەن. ءبىر كاسىپكەر 2016-2018 -جىلدار ارالىعىندا قىتايدان تاۋار تاسىعان. سونىڭ ءبارىن كەدەرگىسىز اكەلگەنى ءۇشىن ەكونوميكالىق قىلمىستاردى تەرگەۋ قىزمەتىنىڭ اسا ماڭىزدى ىستەر بويىنشا اعا وفيسەرىنە جانە مايقاپشاعاي كەدەن بەكەتىنىڭ باس مامانىنا جالپى سوماسى 40 مىڭ ا ق ش دوللارى كولەمىندەگى پارانى جۇيەلى تۇردە بەرىپ وتىردى.

«كۇدىكتىلەردىڭ كەڭسەلەرى، تۇرعىلىقتى جەرلەرى مەن كولىكتەرىن ءتىنتۋ كەزىندە 13 ميلليون تەڭگەدەن استام شەتەل ۆاليۋتاسى انىقتالدى. قازىرگى كەزدە ءۇش ادام قاماۋعا الىندى. تەرگەۋ شارالارى ءجۇرىپ جاتىر»، - دەدى ن. جاحين استانادا وتكەن باسپا ءسوز ءماسليحاتىندا.