بۋراباي يۋنەسكو- نىڭ گەوپاركتەر تىزىمىنە ەنۋى مۇمكىن

None
None
  استانا. قازاقپارات - بۋراباي كۋرورتتى ايماعى الداعى جىلى يۋنەسكو- نىڭ عالامدىق گەوپاركتەر تىزىمىنە ەنۋى مۇمكىن. بۇل الەم حالقىن بۋرابايعا نازار اۋدارتىپ عانا قويماي، كورىكتى ولكەگە تۋريستەردىڭ كوپتەپ كەلۋىنە زور سەپتىگىن تيگىزبەك.

 ماسەلەن، بىلتىر قازاقستاننىڭ شۆەيتسارياسىن 800 مىڭنان استام ادام تاماشالاسا، بيىل بۇل كورسەتكىش 900 مىڭنان اسادى دەيدى ەكەن. سەبەبى بۋرابايدى الەمگە تانىتۋ باعىتىندا جاسالىپ جاتقان جۇمىستار قازىر ءوز جەمىسىن بەرە باستادى. رەسەيلىك ەلەنا كرەيتسبەرگ بۋرابايدىڭ اسەم تابيعاتىنا وسىدان 35 جىل بۇرىن ءبىر كورگەننەن عاشىق بولعان. سودان بەرى بۇل ولكەگە ءجيى كەلىپ تۇرۋعا تىرىسادى. ال بيىل ەلەنا بۋرابايعا العاش رەت كەلگەن قۇربىلارىنا جول كورسەتىپ ءجۇر.

 ەلەنا كرەيتسبەرگ، تۋريست /رەسەي/:

- مەن ەڭ ءبىرىنشى رەت مۇندا 1983 -جىلى ستۋدەنت كەزىمدە كەلدىم. مەنى سول كەزدە بۋرابايدىڭ تاماشا تابيعاتى ەرىكسىز باۋراپ الدى. سودان بەرى مىنە قانداي سيقىرى بار ەكەنىن قايدام، جاز شىقسا بولدى وسىندا كەلگىم كەلەدى دە تۇرادى.

ءيا، بۋرابايعا كوبىنەسە وسىنداي تۇراقتى تۋريستەر كوپتەپ كەلەدى. الايدا بۇرىن- سوڭدى بۇل جەردى كورمەگەن، ەستىپ- بىلمەگەن ادامداردى قالاي تارتۋعا بولادى؟ بۇگىندە وسى باعىتتا كوپتەگەن جۇمىستار اتقارىلىپ جاتىر. الەۋمەتتىك جەلىلەردە «VizitAqmola» ، «VizitBurabay» سەكىلدى حەشتەگتەر كوبەيسە، جەرگىلىكتى جەردە كوپتەگەن حالىقارالىق ءىس- شارالار وتكىزىلىپ كەلەدى.

تالعات جامپەيىسوۆ، وبلىستىق تۋريزم باسقارماسى باسشىسىنىڭ ورىنباسارى:

 - بۋراباي كۋرورتتى ايماعىن ودان ءارى تانىتا تۇسۋگە قازىر بيزنەس قۇرىلىمدارى دا قوسىلدى. ماسەلەن، جاقىندا عانا بۋرابايمەن اتتاس بوتەلكەگە قۇيىلعان سۋ وندىرىلە باستادى. ودان بولەك، تۋريزم نىساندارى كۋرورتتى ولكەدەن حابار بەرەتىن كورنەكىلىك اقپاراتتاردى كوبەيتىپ جاتىر. ال ءبىز بۋرابايدى الەۋمەتتىك جەلىلەردە تانىتۋعا كوپ بارىنشا كۇش سالىپ جاتىرمىز.

ال بۋرابايعا يۋنەسكو نە بەرەدى؟ ەگەر كۋرورتتى ايماق اتالعان ۇيىمنىڭ گەوپاركتەر تىزىمىنە قوسىلسا، ولار اڭىز ولكە جايلى مالىمەتتەردى جيناقتاپ، ونىڭ الەمدىك ارەنادا قولجەتىمدى بولۋىن قامتاماسىز ەتپەك. بۇدان بولەك تابيعاتىنىڭ قورعالۋىنا، ءتۋريزمىنىڭ تۇرلەنۋىنە جانە ەڭ باستىسى دۇنيە جۇزىنە تانىمال بولۋىنا جاعداي جاسايدى.

 تالعات جامپەيىسوۆ، وبلىستىق تۋريزم باسقارماسى باسشىسىنىڭ ورىنباسارى:

- ءبىز قازىر يۋنەسكو- نىڭ پاريجدەگى شتاب- پاتەرىنە تاپسىراتىن قۇجاتتاردى دايىنداپ جاتىرمىز. 30 - قاراشاعا دەيىن قاعازداردى ولارعا وتكىزۋىمىز كەرەك. ال كەلەسى جىلى ول جاقتان ارنايى كوميسسيا كەلەدى. سونان سوڭ بارىپ شەشىم شىعادى. ەگەر بۋراباي عالامدىق گەوپارك اتانسا، بۇل، بىرىنشىدەن، وتە ۇلكەن ماڭىزدى مارتەبە. ال بۇل شەتەلدىك تۋريستەردى قىزىقتىرماي قويمايدى. بۇل ءۇشىن قازىر بۋرابايدا بارلىق جاعداي جاسالىپ جاتىر. جولدار جوندەلىپ، ۆەلوسيپەد جولى سالىنۋدا. جاڭا نىساندار دا بوي كوتەرىپ كەلەدى. جالپى بۇگىندە بۋرابايدا كۇنىنە 12 مىڭ ادام دەمالا الاتىن 150 ءقوناقۇي بار. ودان بولەك تابيعات اياسىنداعى شاعىن دەمالىس ورىندارى دا جەتەرلىك.

www.24.kz

سوڭعى جاڭالىقتار