شىڭگىلدە ايتىسكەرلەرگە ارنالعان اقىندىق كۋرس باستالدى - شەتەلدەگى قازاق ءتىلدى ب ا ق- قا شولۋ
يران كومانداسى اسكەري ويىنداردى ۇيىمداستىرعان قازاقستانعا العىس ايتتى - «فارس» اقپارات اگەنتتىگى
قازاقستاننىڭ وڭتۇستىگىندەگى «وتار» اسكەري پوليگونىندا «حالىقارالىق اسكەري ويىندار-2018» ءراسىمىنىڭ اشىلۋ سالتاناتى وسى ەلدىڭ قورعانىس ءمينيسترى گەنەرال-پولكوۆنيك ساكەن جاسۇزاقوۆتىڭ قاتىسۋىمەن وتكەنى بەلگىلى. شارادا قازاقستان، رەسەي، يران، ءازىربايجان، ۆەنەسۋەلا، زيمبابۆە، قىرعىزستان، قىتاي، سيريا، تاجىكستان، وزبەكستان مەن بەلارۋس ەلدەرىنىڭ 12 كومانداسىنان قۇرالعان 88 ادام سايىسقا ءتۇستى دەپ جازادى Parstoday اقپارات اگەنتتىگى.
بۇل حالىقارالىق شارادا يير ارمياسىنىڭ ۇشقىشسىز باسقارىلاتىن توپتارى مەن يسلام ريەۆوليۋتسياسى ساقشىلار كورپۋسىنىڭ جاۋىنگەرلەرى سايىسقا ءتۇستى. سونداي-اق، بۇل شارادا قازاقستان قورعانىس ءمينيسترىنىڭ يران ارمياسىنىڭ ۇشقىشسىز ۇشاق كومانداسىنىڭ مۇشەلەرىمەن كەزدەسكەنى تۋرالى حابارلايدى يراندىق ب ا ق.
«قازاقستاننىڭ قورعانىس ءمينيسترى ساكەن جاسۇزاقوۆ حالىقارالىق اسكەري جارىستىڭ ءۇشىنشى كۇنى ۇشقىشسىز ۇشاقتار سايىسى ءوتىپ جاتقان جەرگە كەلىپ، يران كومانداسىنىڭ ۇشۋ قۇرالدارىن كورىپ، يران ارمياسىنىڭ كوماندا مۇشەلەرىمەن كەزدەسىپ، سۇحباتتاسىپ، ولارعا جارىستا ساتتىلىك تىلەدى» دەيدى «فارس» اقپارات اگەنتتىگى.
اقپارات كوزىنىڭ حابارلاۋىنشا، جارىسقا قاتىسۋعا كەلگەن يران كومانداسىنىڭ جەتەكشىسى احماد احمادي بۇل كەزدەسۋدە يراندىق ۇشقىشسىز ۇشاقتاردىڭ ەرەكشەلىكتەرى جايلى ەسەپ بەرىپ، «ارمي-2018» حالىقارالىق اسكەري جارىسىن ۇيىمداستىرعان قازاقستانعا العىس ايتتى.
ي ي ر ارمياسىنىڭ ۇشقىشسىز ۇشاق كومانداسى سايىسقا تولىعىمەن جەرگىلىكتى ءبىلىم نەگىزىندە جوبالانىپ، جاسالعان «سافير» اتتى ۇشقىشسىز ۇشاقپەن قاتىستى دەپ تۇيىندەيدى parstoday.com.
نەمرۋت تاۋى الەمنىڭ ءار تۇكپىرىنەن كەلگەن تۋريستەردى باۋراپ الدى - TRT
تۇركياداعى نەمرۋت تاۋى «كۇننىڭ شىعۋى جانە باتۋىن تاماشالاۋعا ەڭ قولايلى جەر» اتاعىنا يە بولعان، دەپ حابارلايدى تۇركيا راديو تەليەۆيزيا پورتالى. اتالعان اقپارات كوزىنىڭ مالىمەتىنە سۇيەنسەك، ادىياماننىڭ كاحتا اۋدانىنداعى نەمرۋت تاۋى «كۇننىڭ شىعۋىن جانە باتۋىن تاماشالاۋعا ەڭ ىڭعايلى جەر» اتاعىنا يە. سونداي-اق، يۋنەسكونىڭ الەمدىك تىزىمىنە ەنگەن نەمرۋت تاۋىنا دەگەن قىزىعۋشىلىق كۇن سايىن ارتۋدا.
وڭتۇستىك شىعىس انادولىنىڭ تۋريستىك ورىندارىنىڭ ءبىرى - ادىيامانداعى نەمرۋت تاۋى جەرگىلىكتى عانا ەمەس، الەمنىڭ ءار تۇكپىرىنەن كەلەتىن تۋريستەردى وزىنە ايىرىقشا باۋراعان. ايتا كەتكەن ءجون، بۇل تاۋ تاريحتاعى ەڭ بايىرعى ەلدى مەكەندەردىڭ ءبىرى سانالادى ەكەن.
«ۇلتتىق پارك الاڭى رەتىندە قورعاۋعا الىنعان ايماقتا كەرەمەت تاريحي ەڭبەكتەرمەن قاتار 2 مىڭ 150 مەتر بيىكتىكتەگى نەمرۋت تاۋىنا گەرمانيا، امەريكا قۇراما شتاتتارى، يزرايل، ارمەنيا جانە جاپونيا سىندى ەلدەرمەن قاتار تۇركيانىڭ ءتورت بۇرىشىنان كۇن سايىن كەم دەگەندە 2 مىڭ تۋريست كەلۋدە» دەپ جازادى تۇركيالىق ب ا ق.
قىتايدا ايتىسكەرلەرگە ارنالعان اقىندىق كۋرس باستالدى - تيانشاننەت
اقىندار ايتىسى سىندى ماتەريالدىق ەمەس مادەني مۇرانى قورعاۋ، ارداقتاۋ، اقىندار ايتىسىنىڭ مۇراگەرلەرىن باۋلۋ، تاربيەلەۋدى ماقسات ەتكەن ىلە قازاق اۆتونميالىق وبلىسىنىڭ تانىمال اقىندارىنا ارنالعان كۋرس 25- شىلدە كۇنى «اقىندار مەكەنى» دەپ اتالعان قىتايدىڭ شىڭگىل اۋدانىندا باستالدى.
ايتا كەتكەن ءجون، شىڭگىل اۋدانىنىڭ «اقىندار مەكەنى» اتالۋىنىڭ وزىندىك سەبەبى بار. بۇل اۋداندا ساناۋلى جىل بۇرىن ومىردەن وتكەن، قىتاي قازاقتارى اراسىندا ايتىسكەرلىك ونەردىڭ كوش باستاۋشىسى بولعان ايگىلى ايتىسكەر اقىن قۇرمانبەك زەيتىنعازى ۇلىنان باستاپ، كوپتەگەن جىر ساڭلاقتارى كۇللى ەلگە تانىلعان بولاتىن. بەيرەسمي دەرەكتەر بويىنشا شىڭگىل اۋدانىنان ايماق، وبلىس قانا ەمەس، بۇكىل شىڭجان ولكەلىك دارەجەلى ايتىستارعا قاتىسىپ جۇرگەن اقىنداردىڭ سانى 40 تان استام ەكەن.
سونىڭ قۇرمەتىنە اتالعان اۋداننان ءبىر اۋىلعا «اقىندار مەكەنى» دەگەن اتاق بەرگەن كورىنەدى. بۇل جولعى كۋرسقا شىنجاڭ كوركەمونەر زەرتتەۋ ورتالىعى، ىلە قازاق وبلىستىق مادەنيەت- كوركەمونەر زەرتتەۋ ورتالىعى، التاي ايماقتىق مادەنيەت سارايى سىندى ونەر وردالارىنان كەلگەن 12 وقىمىستى مامان، التاي ايماعىنىڭ اۋدان-قالالارىنان تاڭدالعان 31 ۇزدىك اقىن، ساباق بەرەتىن وقىتۋشىلار قاتىناستى.
ساباق باستاۋدىڭ سالتاناتتى شاراسىن شىڭگىل اۋداندىق مادەنيەت، دەنە تاربيەسى مەكەمەسى پارتگرۋپپاسىنىڭ حاتشىسى ياۋ رىنۋىن باسقاردى. اۋداندىق پارتكومنىڭ تۇراقتى مۇشەسى مۇرات ءمۇتار ۇلى ءسوز سويلەپ، بۇل كۋرستىڭ ءمان-ماڭىزى تۋرالى توقتالىپ، كۋرسانتتارعا اقىندىقتى جاقسىلاپ يگەرىپ، ساباقتى مۇقيات تىڭداپ، وزدەرىن ۇزبەي شىڭداپ، ايتىس مۇراسىن جالعايتىن ۇزدىك اقىندار ۇيىمىن قۇرۋعا قۇلشىنۋلارىن تالاپ ەتتى. ول سوزىندە ايتىس اقىندارىنا مەملەكەتتىك باعىت-ساياساتتارىمەن حالىقتى سۋسىنداتىپ، ۇلتتىق مادەنيەت الدىنداعى بورىشىن ادال اتقارۋعا شاقىرعان دەپ جازادى قىتايلىق ب ا ق.
«بۇل كۋرستىڭ ماقساتى - زاماناۋي وركەنيەتتى جەتەكشى ەتىپ، وزىق ۇلتتىق مادەنيەتتى قورعاۋ، وعان مۇراگەرلىك ەتۋ، دامىتۋ، ساياساتتى دارىپتەيتىن، تارتىپكە باعىناتىن، قاعيدانى تۇسىنەتىن مادەنيەت تاراتۋشىلاردان بولۋ. كۋرسقا شىڭگىل اۋدانىنان 15 اقىن قاتىناستى، مۇنداعى ماقسات - اۋدانىمىزدىڭ مادەنيەت دارىندىلارىن باۋلۋ»، - دەيدى بۇل جولعى كۋرستىڭ اشىلۋ سالتاناتىندا اۋداندىق مادەنيەت، دەنەتاربيە مەكەمەسى پارتگرۋپپاسىنىڭ حاتشىسى ياۋ رىنۋىن.
ايتا كەتۋ كەرەك، بىرنەشە رەت حالىقارالىق ايتىسقا ءتۇسىپ، جۇلدەلەر الىپ، قازاقستاندىقتارعا دا تانىلىپ ۇلگەرگەن اتالعان اۋداننىڭ تۋمالارى، تانىمال ايتىسكەرلەر جاميعا داۋلەت قىزى مەن ۇلاربەك ميناتقان ۇلى دا بۇل جولعى كۋرسقا قاتىسىپ جاتىر.
اۋەسقوي سۋرەتشى 10 جىل سالعان سۋرەتىن كورەرمەندەرگە ۇسىندى - تيانشاننەت
شىلدە ايىنىڭ سوڭعى كۇندەرى حىبەي ولكەلىك مۇراجايىندا ءاۋسقوي سۋرەتشى ياۋ شۋلۇڭ ءوزى ەلىكتەپ سىزعان قابىرعا سۋرەتىن كورەرمەندەرگە تانىستىردى. بۇل تۋرالى وسى اپتادا kazakh.ts.cn اقپاراتتىق پورتالى حابارلاعان بولاتىن. حالىق اراسىنان شىققان اۋەسقوي سۋرەتشى ياۋ شۋلۇڭ بالا كۇنىندە اكەسىنە ەرىپ، حىبەي ولكەسى شىجياجۋاڭ قالاسىنداعى پيلۋ بۇتحاناسىن تاماشالايدى. سول كەزدەن-اق پيلۋ بۇتحاناسىنداعى قابىرعا سۋرەتكە قاتتى قىزىققان ول 2006 -جىلدان باستاپ وسى سۋرەتتى سالا باستاعان.
10 جىل زەر سالا قۇلشىنۋ ارقىلى 200 شارشى مەترلىك قابىرعا سۋرەتتى بۇرىنعى سالىستىرماسى بويىنشا قايتادان قاعازعا سىزىپ شىققان.
تيبەتتەگى ات بايگەسى - تيانشاننەت
29- شىلدە كۇنى تيبەتتىڭ الي اۋدانى شى چۋانحى قالاشىعىندا تيبەتتەر اراسىندا ۇلتتىق ات سپورتى تۇرلەرىنەن جارىس ءوتتى. «حادا ءىلۋ»، «شاي ءىلۋ»، «ات ۇستىندە ساداق اتۋ»، «ات ونەرى ويىنى» سياقتى ات ۇستىندەگى ءارتۇرلى سپورتتىق جارىستار وتكەن. «اتالعان شارادا 150 شاباندوز باعىن سىناپ، ات سپورتىن 20 مىڭنان استام كورەرمەن تاماشالادى» دەپ جازادى kazakh.ts.cn.
اۆتور: بەيسەن سۇلتان