استانادا مەكتەپ فورماسىن اتا-انالار وزدەرى تاڭدايدى

استانا. قازاقپارات - قازىرگى تاڭدا دۇكەندەردە تاڭداۋ وتە كوپ. مەكتەپ فورماسىن كەز كەلگەن جەردەن الۋعا بولادى.

ەڭ باستىسى، ءتۇسى مەن ستيلى بىردەي بولۋى قاجەت، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

ەگەر مەكتەپ فورماسىن جەتكىزۋشى مەردىگەر ساتىپ الۋدى ماجبۇرلەگەن جاعدايدا ءبىلىم باسقارماسىنا شاعىمدانۋ قاجەت.

استانالىق ۆەدومستۆو وقۋشىلاردىڭ كيىم ستاندارتى قانداي بولاتىنىن ايتتى. مەكتەپ فورماسىنىڭ ۇلگىسى كلاسسيكالىق ستيلدە، ءتۇسى - قوڭىر-كوك.

ەر بالالار كيەتىن مەكتەپ فورماسىنا:

پيدجاك، جەلەتكە، شالبار، اق ءتۇستى سالتاناتتى جەيدە، كۇندەلىكتى اق جەيدە، (قىس مەزگىلىندە: تريكوتاجدى جيلەت، اق ۆودولازكا). ەر بالالارعا ارنالعان شالباردىڭ تىگىسى كەڭ جانە ۇزىندىعى اياقتىڭ توبىعىن جاۋىپ تۇرادى. ەڭ از دەگەندە ۇسىنىلعانى: جەيدە، جەلەتكە مەن شالبار.

قىز بالاعا ارنالعان مەكتەپ فورماسىنا كىرەتىندەر:

پيدجاك، جەلەتكە، بەلدەمشە، شالبار، كلاسسيكالىق اق كوفتا، سارافان (قىس مەزگىلىندە: تريكوتاج جەلەتكە، اق ۆودولازكا) . قىزدارعا ارنالعان شالبار كەڭ تىگىلگەن، ال ۇزىندىعى اياقتىڭ توبىعىن جاۋىپ تۇرادى. بەلدەمشەنىڭ ۇزىندىعى كەڭسەگە ارنالعان، تىزەدەن 5 س م جوعارى بولماۋى كەرەك.

ۆەدومستۆو مەكتەپ فورماسىنا ءدىني جانە ءتۇرلى كونفەسسيالارعا ءتان ۇلگىلەردى ەنگىزۋگە بولمايتىنىن ايتا كەتتى.

سونىمەن قاتار، مەكتەپ فورماسىندا ورتا ءبىلىم بەرۋ ۇيىمىن ەرەكشەلەپ تۇراتىن بەلگىلەر بولادى (ەمبلەما، جاپسىرما ت. ب. ). ولار كيىمنىڭ جوعارى جاعىنا ورنالاسادى نەمەسە اكسەسسۋارلار (پيدجاك، جەلەتكە). ەمبلەمانىڭ ەسكيزىن مەكتەپتەن نەمەسە مەكتەپتىڭ سايتىنان الۋعا بولادى.

مەكتەپ فورماسىنىڭ تالابى بويىنشا سىنعان فۋرنيتۋراسى بار اكسەسسۋار مەن كيىمدەردى الىپ تاستايدى.

مەكتەپ فورماسىنا توزبايتىن، انتيباكتەرياعا قارسى، انتيميكروبقا قارسى، انتيستاتيكالىق قاسيەتكە يە جارتىلاي ءجۇن جانە ماقتا ماتاسى قولدانىلدى. ياعني قۇرامىندا كيىم مىجىلىپ كەتپەسى ءۇشىن %75-85 تابيعي ماتاسى بار (ماقتا، ءجۇن جانە باسقاسى) جانە %15-25 سينتەتيكالىق قوسپا قوسىلعان.

«قازىر دۇكەندەردە تاڭداۋ وتە كوپ. ارينە مەكتەپ فورماسىن كەز كەلگەن جەردەن الۋعا بولادى جانە ەشكىم شەكتەمەيدى. باستىسى، ءتۇسى مەن ستيلى بىردەي بولۋى قاجەت»، - دەلىنگەن ءبىلىم باسقارماسىنىڭ حابارلاماسىندا.

مەكتەپ فورماسىن تەك ءبىر تاۋار وندىرۋشىدەن ساتىپ الۋعا ماجبۇرلەگەن جاعدايدا دەرەۋ ءبىلىم باسقارماسىنا مىنا تەلەفون نومەرلەرى بويىنشا 556853، 556883، 556873 حابارلاسۋ قاجەت نەمەسە 109 نومەرىنە.