ءتاتتى نەمەرەنىڭ ءتاتتى قىلىعى
شىر ەتىپ دۇنيەگە كەلىسىمەن انسىنان ءبولىپ الىپ ءوز باۋىرىنا باسىپ، قاسىنان ءبىر ەلى تاستاماي جۇرەتىن اجەسىن ول اناسىنان بەتەر جاقسى كورەتىن.
ونىڭ ءتىلىنىڭ ەرتە شىعىپ، ساناپ- وقۋدى ەرتە ۇيرەنگەنى دە وسى اجەسىنىڭ ارقاسى ەدى. ەگىن سالىپ، مال شارۋالاپ جۇرسە دە سۇلتاندى قاسىنان الىستاتپاي، ەڭبەككە دە باۋلىعان. وسىلايشا سۇلتان بەس جاسىندا ناعىز جىگىت بوپ شىعا كەلدى. سوڭعى كۇندەرى قارتايعان اجەگە اۋرۋ جابىسىپ، مازاسى كەتە باستادى.
دارىگەر جازىپ بەرگەن اشى دارىگە تاۋەلدى بولدى. قالاماسا دا ءماجبۇر بولعان ءدارىسىن ىشكەن سايىن «اھ، اشىسىن- اي!» دەگەن ءسوزىن قاسىنان ايىرىلمايتىن سۇلتان ۇنەمى ەستىپ، اشى ءدارىنى قۇددى ءوزى ىشكەندەي قينالىپ قالاتىن.
ەرتەسىنە: - اجە، ءدارىڭدى ءىشتىڭ بە؟ - دەدى سۇلتان اجەسىنە ادەتتەگىدەن وزگەشە جايدارى ۇنمەن. نەمەرەسىنىڭ «اجە، سول ءدارىنى ىشپەي-اق قويساڭ بولماي ما؟» دەگەن ءسوزىن كۇندە ەستىپ ۇيرەنىپ قالعان اجەنىڭ قۇلاعى سۇلتاننىڭ مىنا ءسوزىن جاتىرقاعانداي بولدى. ەپتەپ باسىپ اس ۇيگە كەلگەن اجە شىنى ىدىسقا سۋىن قۇيىپ ازىرلەگەنشە، سۇلتان سورەدەن ءدارى سالىنعان قۇتىنى ءوزى الىپ، كۇلىمدەپ تۇرىپ اجەسىنە ۇسىندى. نەمەرەسىنىڭ بۇل ءىسى تاعى دا ادەتتەگىدەن وزگەشە بولدى. قۇتىنىڭ قاقپاعىن اشىپ، الاقانىنا توڭەكەرگەنى سول-اق ەدى، ىشىنەن دارىمەن بىرگە اق ۇنتاق توگىلە كەتتى. مۇندايدى كۇتپەگەن اجە نەمەرەسىنە سۇراۋلى جۇزبەن قارادى.
- اجە، سەن اشى ءدارى ىشپەسىن دەپ ىشىنە قانت ارالاستىرىپ قويدىم، - دەدى سۇلتان ەزۋىن ويۋداي ورالتىپ، - ەندى سەن «اھ، اشىسىن- اي» دەپ ايتپايتىن بولاسىڭ!