ءبىرىنشى سىنىپ وقۋشىلارىنا كۇندىزگى ۇيقىنى ۇيىمداستىرۋ كەرەك - جانداربەك بەكشين
«وقۋشىلاردىڭ كۇن رەجىمى ماسەلەسىنە نازار اۋدارعىم كەلەدى. ارينە، مەكتەپكە باراتىن ۋاقىتتا، بالالاردى كۇن رەجىمىن ورىنداۋعا دايىنداۋىمىز كەرەك»، - دەدى باس سانيتارلىق دارىگەر ورتالىق كوممۋنيكاتسيالار قىزمەتىندە.
رەجىم دەگەن ۇعىمعا ءىس- قيمىلدىڭ، دەمالۋدىڭ جانە تاماقتانۋدىڭ بارلىق تۇرلەرىن تاۋلىك بويى ۇيىمداستىرۋ جانە ءبولۋ كىرەدى. كەز كەلگەن رەتسىزدىك بالانىڭ دەنساۋلىعىنا، ياعني كوڭىل- كۇيىنە، ساباق ۇلگەرىمىنە اسەر ەتەدى. اتاپ ايتقاندا، وقۋشىنىڭ دەنساۋلىعىنا ۇيقى، تاماقتانۋ جانە قوزعالىس بەلسەندىلىگىنىڭ ىقپالى زور.
«بالانىڭ جاس ەرەكشەلىگىنە قاراي ۇيقىسى قانۋى كەرەك. وقۋشىلار ءۇشىن تۇنگى ۇيقىنىڭ شامالانعان نورماسىنا توقتالساق، 1-4-سىنىپتاردا 10-10,5 ساعاتتى، 4-7-سىنىپتاردا - 9,5-10 ساعاتتى، 8-9-سىنىپتاردا - 9-9,5 ساعاتتى، سونداي-اق 10-11-سىنىپتاردا - 8-9-ساعاتتى قۇراۋى كەرەك»، - دەدى ول.
ج. بەكشيننىڭ سوزىنە قاراعاندا، وقۋشىلارعا ەمتيحان الدىندا، باقىلاۋ جۇمىسىنىڭ الدىندا جانە باسقا دا اقىل- وي جۇكتەمەسى كەزىندە ادەتتەگى ۇيقى ۋاقىتىن (كەمىندە 1 ساعاتقا) ۇزارتۋ كوزدەلگەن.
«ءبىرىنشى سىنىپ وقۋشىلارىنا مۇمكىندىگىنشە كۇندىزگى ۇيقىنى (2 ساعاتقا سوزىلاتىن) ۇيىمداستىرۋ ۇسىنىلادى»، - دەپ ناقتىلادى ول.
بەلگىلى بولعانداي، 2-2,5 ساعاتقا ەرتە ويانىپ، ۇيقىسى قانبايتىن بالالاردىڭ ساباقتاعى بەلسەندىلىگىنىڭ دەڭگەيى 30 پايىزعا تومەندەيدى.