كۋبانىڭ نەگىزگى زاڭىنا وزگەرتۋلەر ەنگىزىلەدى

استانا. قازاقپارات- كۋبا حالىق بيلىگى ۇلتتىق اسسامبلەياسى كونستيتۋتسيانى وزگەرتۋگە نەگىزدەلگەن رەفورمانى ماقۇلدادى. بۇقارالىق اقپارات قۇرالدارىنىڭ مالىمدەۋىنشە، داۋىس بەرۋگە قاتىسۋشىلار قۇجاتتى ءبىراۋىزدان قابىلدادى.

 ەندى 13 - تامىز بەن 15 - قاراشا ارالىعىندا بۇكىل حالىقتىق رەفەرەندۋم كەزىندە تالقىعا تۇسەدى. ونىڭ قاي كەزدە وتەتىنى ازىرگە ناقتىلانعان جوق، ءبىراق وسى جىلدىڭ سوڭىنا دەيىن بولادى دەپ جوسپارلانعان.

مەملەكەتتىڭ نەگىزگى زاڭىنا ەنگىزىلەتىن وزگەرتۋلەر قاتارىندا جەكەمەنشىك ماسەلەسى، پرەزيدەنت پەن پرەمەر- مينيستر لاۋازىمىنا تاڭداۋدى جۇرگىزۋ، ءبىرجىنىستى وتباسىن قۇرۋ مەن مەملەكەتتىك ۇيىم باسشىسى قىزمەتىندە وتىرۋ ۋاقىتىن شەكتەۋ ماسەلەلەرىنە قاتىستى بولادى.

ايتا كەتۋ كەرەك، 1976 -جىلى قابىلدانعان كونستيتۋتسيانى قوعامداعى ساياسي جانە ەكونوميكالىق وزگەرىستەرگە بايلانىستى جاڭارتۋ قاجەتتىلىگى تۋىندادى.

 ميگەل دياس- كانەل، كۋبانىڭ مەملكەتتىك كەڭەس ءتوراعاسى:

 - بۇكىل حالىقتىق رەفەرەندۋم كەزىندە كۋبانىڭ ءار تۇرعىنى ءوز ويىن ەركىن ايتا الادى. حالىقتىڭ تاڭداۋىنا نەگىزدەلىپ، مەملەكەتتىك قۇجاتقا وزگەرتۋلەر ەنگىزىلەدى. كونستيتۋتسيانى ءبارىمىز بىرگە جاڭارتامىز. سەبەبى ول ەلدىڭ بولاشاعىن ايقىندايدى.

ەستەرىڭىزگە سالا كەتەيىك، 2018 - جىلدىڭ ساۋىر ايىندا كۋبا مەملەكەتتىك كەڭەسىنىڭ ءتوراعاسى بولىپ ميگەل دياس- كانەل سايلانعان بولاتىن.

كۋبا كونستيتۋتسياسىنا سايكەس، مەملەكەتتىك كەڭەستىڭ ءتوراعاسى مەملەكەت جانە ۇكىمەت باسشىسى بولىپ سانالادى جانە بەس جىلدىق مەرزىمگە سايلانادى.

جوعارعى مەملەكەتتىك لاۋازىمعا جايعاسقان 57 جاستاعى دياس- كانەل، 2008 -جىلدان بەرى وسى لاۋازىمدا وتىرعان 86 جاستاعى راۋل كاسترونىڭ ورنىن باستى. بۇل قىزمەتكە باسقا كانديداتتار قارالمادى.

2013 -جىلدان باستاپ دياس- كانەل مەملەكەتتىك كەڭەس ءتوراعاسىنىڭ ءبىرىنشى ورىنباسارى جانە كۋبا مينيسترلەر كەڭەسىنىڭ ءتوراعاسى، ياعني كۋبانىڭ بيلىك يەرارحياسىنداعى ەكىنشى ادام بولدى.

سونىمەن قاتار، راۋل كاسترو، كەم دەگەندە 2021 -جىلعا دەيىن ەلدەگى جالعىز رەسمي ساياسي ۇيىم - كۋبا كوممۋنيستىك پارتياسى باسشىلىعىندا قالا بەرەدى جانە سول ارقىلى شەشىم قابىلداۋ ىستەرىنە ىقپالىن جۇرگىزە الادى.

www.24.kz