باستاۋىش سىنىپ وقۋشىلارىنا ارنالعان سومكەلەر قانداي بولۋى ءتيىس

استانا. قازاقپارات -  ق ر د س م قوعامدىق دەنساۋلىق ساقتاۋ كوميتەتىنىڭ ءتوراعاسى جانداربەك بەكشين وقۋشىلارعا ارنالعان مەكتەپ سومكەلەرىنىڭ ستاندارتى تۋرالى ايتىپ بەردى، حابارلايدى قازاقپارات.

 «مەكتەپ سومكەسىن نەمەسە ريۋكزاكتى تاڭداۋ كەزىندە ءتيىستى تالاپتاردى ساقتاۋ قاجەت. ءبىرىنشى كەزەكتە بالانىڭ ومىرتقاسى مەن يىعىنا سالماق تۇسىرمەيتىندەي سومكەنىڭ بەرىك قۇرىلىمى بولۋى ءتيىس. سونىمەن قاتار سومكەنىڭ يىقباۋلارى جالپاق ءارى جۇمساق ماتەريالدان تىگىلۋى كەرەك. سومكەنىڭ ولشەمى مەن سالماعى بالانىڭ بويى مەن جاسىنا سايكەس كەلگەنى ءجون. ريۋكزاگتىڭ بوس كۇيىندەگى سالماعى 1 كەلىدەن اسپاۋى قاجەت»، - دەپ ءتۇسىندىردى ج. بەكشين.

 ونىڭ سوزىنە قاراعاندا، 1-4 - سىنىپ وقۋشىلارى ءۇشىن ءاربىر كىتاپتىڭ سالماعى 300 گرامنان، 5-6 - سىنىپتارعا - 400، 7-9 - سىنىپتارعا 500 گرامنان جانە ودان جوعارى سىنىپتار ءۇشىن 600 گرامنان اسپاۋى كەرەك.

«ءبىز وقۋلىق سالماعى ماسەلەسىن ۇنەمى باقىلاۋدا ۇستاپ كەلەمىز. وتكەن جىلى 86 وقۋلىققا قاتىستى ساراپتاما جۇرگىزدىك جانە ونىڭ ەكەۋىنىڭ سالماعى گيگيەنالىق نورماتيۆتەرگە سايكەس كەلمەدى. سايكەسىنشە، اتالعان ۇلگىلەرگە سانيتارلىق- ەپيدەميولوگيالىق ساراپتاما جۇرگىزىلمەگەنى، سونداي- اق ولاردا سانيتارلىق قورىتىندىنىڭ جوق ەكەنى انىقتالدى. وسى ورايدا وقۋلىقتار سالماعىن رەتكە كەلتىرۋ بويىنشا نۇسقاما بەرىلدى»، - دەدى ول.

سونداي- اق ج. بەكشين كىتاپتار سالماعى شامادان تىس اۋىر بولسا، وندا سكوليوز، وستەوحوندروز جانە باسقا دا ىلەسپە اۋرۋلار بەلەڭ الۋى مۇمكىن ەكەنىن اتاپ ءوتتى.

بەلگىلى بولعانداي، ىشىندەگى زاتتارمەن بىرگە مەكتەپ سومكەسىنىڭ سالماعى بالانىڭ جالپى سالماعىنىڭ ەڭ كوپ دەگەن 10 پايىزىن قۇراۋى ءتيىس.

اۆتور: رۋسلان عابباسوۆ