قازاقستان مەن وزبەكستان ارمياسى بىرلەسكەن وقۋ-جاتتىعۋدىڭ سوڭعى كەزەڭىن وتكىزدى
جاتتىعۋلار «فوريش» وقىتۋ ورتالىعىنىڭ بازاسىندا ءوتتى، دەپ حابارلايدى قازاقپارات قازاقستاننىڭ قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
وقۋلار بارىسىندا قازاقستان مەن وزبەكستاننىڭ ارنايى وپەراتسيالار كۇشتەرىنىڭ بولىمشەلەرى ارنايى بارلاۋدى جۇرگىزۋ، شارتتى تۇردە تاۋداعى قىستاقتا جاسىرىنعان زاڭسىز قارۋلانعان توپتى بۇعاتتاپ، كوزىن جويۋ بويىنشا تاپسىرمالاردى ورىندادى. سونداي-اق جاقىنداپ كەلە جاتقان رەزەرۆتەردى اۆياتسيامەن جانە ارتيللەريانىڭ وقتارىمەن جويۋ جۇرگىزىلدى.
«ەرىك دالا» بىرلەسكەن ارنايى-تاكتيكالىق وقۋىنىڭ قورىتىندىسى بويىنشا قازاقستان مەن وزبەكستاننىڭ ارنايى وپەراتسيالار كۇشتەرىنىڭ بولىمشەلەرىنىڭ الدىنا قويىلعان مىندەتتەر ءساتتى ورىندالدى. قازاق-وزبەك بىرلەسكەن وقۋلارىنىڭ ماقساتىنا قول جەتكىزىلدى.
مۇنداي وقۋ-جاتتىعۋلار تۇراقتى تۇردە وتكىزىلىپ تۇراتىنى كوزدەلۋدە.
ەسكە سالايىق، بۇعان دەيىن «ەرىك دالا» بىرلەسكەن ارنايى-تاكتيكالىق وقۋ-جاتتىعۋىنىڭ سوڭعى كەزەڭىنىڭ بەلسەندى فازاسى قازاقستاندا ءوتىپ، وعان وزبەكستان رەسپۋبليكاسى قورعانىس ۆەدومستۆوسىنىڭ باسشىسى ابدۋسالوم ازيزوۆ باستاعان اتالمىش ەلدىڭ اسكەري دەلەگاتسياسى قاتىسقان ەدى.