بۇل جۇپتى بولەك ەلەستەتۋ مۇمكىن ەمەس: شىمكەنتتىك قىز بەن جىلاننىڭ دوستىعى تۋرالى
ءدال وسى ەرەكشە قابىلەتىمەن كوزگە تۇسكەن جاس ونەرپازعا رەسەي، وزبەكستان، قىتاي، تۇرىكمەنستان سيركىنەن شاقىرتۋ ءتۇسىپ وتىر. الايدا قازاقتىڭ سيرك ونەرىن دامىتۋدى كوزدەيتىن قارشاداي قىز ءوز ەلىندە دە بيىك شىڭدى باعىندىرۋدى كوزدەيدى.
تۋعالى اكەسى ءابدىمۇتالى مەن اناسى كامشاتتىڭ ءتۇرلى جىرتقىش جان-جانۋارلاردى، ونىڭ ىشىندە ادۋىندى دا ايبارلى ايۋلاردى باپتاعانىن كورىپ وسكەن ايزادا وتباسىلىق يگى ءداستۇردى جالعاستىرىپ، دارىپتەۋدە. كىشكەنە كۇنىنەن وسىنداي جىرتقىشتارعا ەتەنە بولىپ وسكەن ول سيرك ونەرىندە قولعا ۇيرەنۋى وڭاي ايۋدى ەمەس، ودان دا قيىن دا كۇردەلى جىلانمەن جۇمىس جاساۋدى تاڭداعان. ەڭ العاش 5 جاسىندا «كەشا» ەسىمدى جىلانىمەن مانەجگە شىعىپ، ءتۇرلى گيمناستيكالىق ءىس-قيمىلدار جاساعان. سول كەزدەن باستاپ، كۇنى بۇگىنگە دەيىن سۇيىكتى جانۋارىنان ءبىر ەلى اجىراماي، كورەرمەن كوزايىمىنا اينالۋدا.
«كەشا مەن ايزادا تابيعات انانىڭ ەكى بولەك جاراتىلىسى. دەيتۇرعانمەن ولاردىڭ اراسىنداعى تىلسىم ءبىر ەنەرگەتيكا، ايرىقشا ماحاببات بارى كورەرمەنگە بىردەن سەزىلەدى. ءاردايىم تەك بىرگە ونەر كورسەتەتىن بۇل جۇپتى ەكى بولەك ەلەستەتۋ دە مۇمكىن ەمەس»، - دەيدى ايزادانىڭ اناسى. ءتىپتى، كەشا يەسىن وزگە دە سيرك ارتىستەرىنەن قىزعاناتىن ساتتەرى بولادى ەكەن.
جەتى جاسار سارى البينوس تۇقىمىنان تارايتىن كەشا ايزاداعا باۋىر باسقانى سونشالىق، ەكەۋى بىرگە ءبىر بولمەدە ۇيىقتاي بەرەدى. بالا كەزىنەن ۇيىندە مايمىل، ايۋ كورىپ وسكەن ايزاداعا ارينە بۇل قورقىنىشتى ەمەس.
ايزادا ابدىبەك - نەگىزىنەن اۋە گيمناستيكاسىمەن اينالىسادى. ونىڭ سيركتەگى باستى قىزمەتى دە وسى. اتا-اناسى قىزدارىنىڭ ءدال وسى باعىتقا دەگەن ەرەكشە قىزىعۋشىلىعى مەن قارىم-قابىلەتىن بايقاپ، تاشكەنت سيركىنىڭ تانىمال ءارتىسى كاميلا حامەتوۆادان ارنايى باتا الىپ، ونىڭ ءبىر قۇرالىن ىرىمداپ سۇراتىپ تا العان. ىرىمشىل قازاقتىڭ اق تىلەگى ايقىن ماقساتقا اينالىپ كەلەدى. سەبەبى، بۇگىنگى تاڭدا قازاقستاندا اۋەدە ەركىن قالىقتاپ ونەر كورسەتەتىن ساۋساقپەن سانارلىق ارتىستەردىڭ ەڭ جاسى ايزادا. ول وسى جولدا وزىندىك قولتاڭبالارى بار، تانىمال سيرك جۇلدىزدارى ازىلبەك بولاتوۆ پەن ەرلى-زايىپتى جۇمات، قورلان جانمۇرزايەۆتاردان دا ساباق العان.
اۋە گيمناستيكاسىمەن قاتار، ءبىر عانا جىلانىمەن شەكتەلىپ قالماي، تۇيە، قولتىراۋىنمەن دە ونەر كورسەتەدى. بالا تۇرماق، ۇلكەندەر جۇرەكسىنەتىن ءبىر توننالىق قولتىراۋىننىڭ قولتىعىنا كىرىپ، اۋزىنان شىعاتىن جاس ونەرپازدىڭ بويىندا ەرەكشە دارىن مەن قابىلەت بار. ماماندار اۋەدە ەركىن قالىقتاپ، جەردە ەڭ جىرتقىش سانالاتىن جان-جانۋارلارمەن تەز ءتىل تابىساتىن بالانىڭ بولاشاعى زور دەگەندى ايتادى. ول ءوز الدىنا - قازاق سيرك ونەرىن الەمدىك ارەنادا تانىتۋدى دا ماقسات ەتىپ قويعان.
الداعى ۋاقىتتا، جاس ونەرپاز تۇيە مەن جىلاندى ساباقتاستىرا ۇزدىك ءبىر ءنومىر ازىرلەپ ەلىمىزدىڭ بارلىق ايماقتارىن گاسترولدىك ساپارمەن ارالاپ قايتپاق نيەتتە ەكەن. ەكىنىڭ ءبىرى تاڭداي بەرمەيتىن ەرەكشە ماماندىقتى ايرىقشا ونەرىمەن ۇشتاستىرىپ جۇرگەن جاس ونەرپازعا جان-جاقتى قولداۋ قاجەت. ويتكەنى، ايزاداعا قازىردىڭ وزىندە وزگە ەلدەن قول سوزىپ، كوز تاستاپ جۇرگەندەر كوپ ەكەن.