استانالىقتار جۇمىستى موبيلدىك قوسىمشا ارقىلى تابا الادى

استانا. قازاقپارات - ەندى استانالىقتار Smart Astana موبيلدىك قوسىمشاسىنىڭ كومەگىمەن جۇمىس بەرۋشىلەر ۇسىنعان بوس ورىنداردى ونلاين كورىپ، ولاردى تاڭداي الادى.

بۇل تۋرالى ەلوردا اكىمدىگىنىڭ رەسمي سايتىندا ءمالىم ەتىلدى، دەپ حابارلايدى قازاقپارات.

Smart Astana تەگىن موبيلدىك قوسىمشاسى ونلاين رەجيمدە ءبىر مەزەتتە بىرنەشە وپەراتسيانى جۇزەگە اسىرۋعا مۇمكىندىك بەرەدى.

قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتىنشە، وندا ۇسىنىلعان 10 ايداردا قىزمەتتىڭ 70-تەن استام ءتۇرى قولجەتىمدى. بۇدان بىلاي اتالمىش قوسىمشا ارقىلى ەلورداداعى بوس جۇمىس ورىندارىن تابۋعا بولادى. باعدارلاما enbek.kz ەلەكتروندى پورتالىمەن بايلانىستا قىزمەت اتقارادى. وزەكتى دەگەن بوس جۇمىس ورىندارى مۇندا دا كۇندەلىكتى جاڭارتىلىپ تۇرادى.

ايتا كەتەيىك، Smart Astana قوسىمشاسىن Apple Store جانە Play Market-تە جۇكتەپ الۋعا بولادى. وسى ۋاقىتقا دەيىن قوسىمشانى 120 مىڭ ادام جۇكتەگەن.