جالاعاش مۇراجايىندا جامبىل جابايەۆتىڭ دومبىراسى ساقتاۋلى
ءمالىم بولعانداي، اتالمىش دومبىرانىڭ مۇراجاي تورىندە تۇرعانىنا بيىل 12 جىلعا جۋىقتاعان. ونى جىر الىبى - جامبىلدىڭ ءوزى تارتقان ەكەن.
1927 -جىلى الماتى وبلىسىندا دۇنيەگە كەلگەن ءالىمقۇل اعامىز اتاسى - جامبىلدىڭ تاربيەسىن كورىپ وسەدى. ءوزى دە بەرىدە ايتىسقا ءتۇسىپ، تالاي جىر دودالارىندا ءسوز باسەكەسىنە تۇسەدى. ولاردىڭ قاتارىندا ماناپ كوكەنوۆ، نادەجدا لۋشنيكوۆا سىندى ءسوز زەرگەرلەرى بار. اتاسى جامبىل مەن قازاقتىڭ كوپتەگەن اقىن-جىراۋلارىنا ارناۋ جازعان. جارتى عاسىردان استام مادەنيەت سالاسىندا جەمىستى قىزمەت جاساعان ول، 2015 -جىلى دۇنيەدەن وزدى.
«بۇل دومبىرانى 1982 -جىلى ءالىمقۇل جامبىلوۆ عالىم-فولكلورتانۋشى ماردان بايدىلدايەۆقا سىيعا تارتقان. سول جىلى قىزىلوردا وبلىسى قارماقشى اۋدانىندا رەسپۋبليكالىق ايتىس وتكەن ەكەن. دومبىرا ءبىزدىڭ مۇراجايعا 2006 -جىلى قابىلداندى. ونى ماردان بايدىلدايەۆتىڭ قىزى جانات بايدىلدايەۆا وتكىزدى. دومبىرانىڭ شاناعى قاتتى اعاشتان شابىلعان. اتاسى تارتقان دومبىرا شاناعىنان باسقا بولىكتەرىنىڭ بارلىعىن ءالىمقۇل جامبىلوۆ قايتا قالپىنا كەلتىرگەن ەكەن»، - دەدى جالاعاش اۋداندىق مۋزەيىنىڭ عىلىمي قىزمەتكەرى مارات اقمىرزا ۇلى.
دومبىرا جەتىسۋلىق ۇلگىدە جاسالعان. شاناعى ۇزىن، بەسبۇرىشتى. مويىنتۇعىر جاعى سۇيىرلەۋ. تۇيمەتۇعىر جاعى ءتورتبۇرىشتى. ەكى ءبۇيىرى تۇيمەتۇعىر تۇسىنان باستاپ جوعارىلاي ءسال كەڭەيە كەلە، دىبىس ويىعى تۇسىنا ءبىر ەلىدەي جەتپەستەن مويىنتۇعىرىنا قاراي تارىلا تۇسكەن. موينى جىڭىشكە ءارى ۇزىنداۋ. ارقاسى ۇشكىرلى دوڭەستەۋ بولىپ كەلگەن. شاناعىنىڭ بەتى قاراعايمەن، ال قاپسىرما بەتى جۇقا تاقتايشامەن جابىلعان. دىبىس ويىعى ادام شىناشاعىنىڭ ۇشى سيارلىقتاي. باستىرىعى مەن تۇپكى تيەگى جوق. مويىنىنىڭ سىرتى جۇمىرلانىپ، بەتى ەڭگىشتەلىپ تەگىستەلگەن. مويىن مەن شاناقتىڭ ورتاسىندا، ياعني دومبىرانىڭ ساعاسىندا جىڭىشكە تەمىر جاپسىرىلىپ تۇيىندەلگەن. قۇلاق تەسىكتەرى قوس شەكتىڭ ارا قاشىقتىعىنا ىڭعايلانىپ، ءسال عانا قيعاشتاۋ تەسىلگەن.
مۋزەيدىڭ نەگىزگى قورىندا №761 سانىمەن تىركەلگەن بۇل دومبىرانىڭ قۇندىلىعى ەرەكشە جوعارى ەكەنى ءسوزسىز.