دەنيس تەننىڭ اقتىق ساپارىندا قوعام قايراتكەرلەرى مەن سپورتشىلار كوڭىل ايتتى
«بۇل كۇنى دەنيستىڭ جاقىندارىنا كوڭىل ايتۋعا دا ءسوز تابۋ قيىن. بۇل ۇلكەن قايعى جانە بارلىعىمىز ءۇشىن ساباق بولدى. مۇنداي قاتەلىككە ەندى جول بەرمەۋ كەرەك. قوش بول جانە ءبىزدى كەشىر، دەنيس»، - دەدى ق ر اقپارات جانە كوممۋنيكاتسيالار ءمينيسترى داۋرەن ابايەۆ سپورتشىمەن قوشتاسۋ راسىمىندە.
قوشتاسۋعا كەلگەن وڭتۇستىك كورەيا رەسپۋبليكاسىنىڭ قازاقستانداعى ەلشىسى كيم دە سيك دەنيس تەننىڭ ءولىمىن قازاقستان ءۇشىن عانا ەمەس، الەمدىك قاۋىمداستىق ءۇشىن ورنى تولماس قايعى دەپ باعالادى. ەلشى دەنيستىڭ تاۋەلسىزدىك ءۇشىن كۇرەسكەن تانىمال كورەي گەنەرالى مين گىن حونىڭ ۇرپاعى ەكەنىن ەسكە سالدى.
«اسىل دوسىمىزدى ەشقاشان ۇمىتپايمىز»، - دەدى ەلشى.
سونىمەن بىرگە، دەنيسپەن قوشتاسۋعا قازاقستانداعى جاپونيا ەلشىسى يتيرو كاۆاباتا دا كەلدى. ول كۇنشىعىس ەلىندەگى تابىنۋشىلارى اتىنان دەنيس تەننىڭ وتباسىنا جانە بارشا قازاقستان حالقىنا كوڭىل ايتتى.
«ءبىزدىڭ حالقىمىز دەنيستىڭ قوس مەملەكەت اراسىنداعى دوستىق قارىم- قاتىناستاردى نىعايتۋىنا قوسقان ۇلەسىن جوعارى باعالايدى. كوپتەگەن جاپوندىق مانەرلەپ سىرعاناۋشىلار قايعىعا ورتاقتاسىپ جاتىر. بۇل قايعىلى حابار جاپونيا ازاماتتارىنا دا اۋىر ءتيدى. دەنيس تەننىڭ تاڭعاجايىپ ونەرى مەن تۇلعالىق كەلبەتى ماڭگى ەسىمىزدە قالادى»، - دەدى ديپلومات.
ودان كەيىن دەنيستىڭ قازاسىنا بايلانىستى قازاقستاندىق بوكسشى دانيار ەلەۋسىنوۆ جانە كونكيمەن جۇگىرۋ سپورتى بويىنشا الەم كۋبوگى (1995) كەزەڭىنىڭ جەڭىمپازى بولعان ۆاديم شاكشابايەۆ ءسوز سويلەدى جانە كوز جاستارىن تىيا الماعان استانالىقتار دەنيس تەندى «كەشىر، قوش بول» سوزدەرىمەن شىعارىپ سالدى.
ايتا كەتەيىك، قازاقستاندىق سپورتشى دەنيس تەن 19 -شىلدە كۇنى پىشاقتان العان جاراقاتتان قايتىس بولدى. سپورتشى كولىگىنىڭ ايناسىن ۇرلاماق بولعان ەكى ادامنىڭ قىلمىسىنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سالعان.
