پەتروپاۆلدىڭ بازارىنداعى الاپات ءورت ءسوندىرىلدى

پەتروپاۆل. قازاقپارات - پەتروپاۆلداعى «قىزىلجار» كوممۋنالدىق بازارىندا بولعان ءورت ءسوندىرىلدى.

ونىڭ جالىنى 600 شارشى مەتر اۋداندى شارپىدى، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، ءورتتى سوندىرۋگە جالپى 70 ادام جانە 21 تەحنيكا جۇمىلدىرىلعان.

ءورت سوندىرۋشىلەر جەتكەنشە عيماراتتان 90 ادام ەۆاكۋاتسيالانعان. قۇربان بولعاندار جوق، ەشكىم زارداپ شەكپەگەن.

وقىس وقيعا تۋرالى حابار ءورت ءسوندىرۋ بولىمشەسىنە بۇگىن تاڭعى 10:00-دەر شاماسىندا كەلىپ تۇسكەن.

ءورت كوممۋنالدىق بازار عيماراتىنىڭ ساۋدا دۇڭگىرشىكتەرى ورنالاسقان ەكىنشى قاباتىندا تۇتانعان.

«ءورت تۋرالى حابار مەيلىنشە كەش بەرىلگەن دەۋگە نەگىز بار. ويتكەنى قىزمەتكەرلەر جەتكەنشە عيماراتتىڭ ءبىرشاما بولىگىن جالىن شارپىپ ۇلگەرگەن. ءقاۋىپتىڭ وتە جوعارى - ءۇشىنشى دەڭگەيى جاريالاندى. ءورتتى سوندىرۋگە سقو تجد باستىعى راميل كامالوۆ باسشىلىق ەتتى»، - دەپ ءمالىم ەتتى باسپا ءسوز قىزمەتى.

وقيعانىڭ ءمان-جايى تەكسەرىلىپ جاتىر.