نۇر وتان پارتياسىنىڭ وكىلدەرى دەنيس تەندى ءبىر مينۋت ۇنسىزدىكپەن ەسكە الدى
ساپار بارىسىندا ول پارتيا وبلىستىق فيليالىنىڭ كونفەرەنسياسىنا قاتىستى. كونفەرەنسيا جۇمىسى قاپيادا قازا تاپقان داڭقتى سپورتشى، مانەرلەپ سىرعاناۋدان سوچي وليمپياداسىنىڭ قولا جۇلدەگەرى، الەم چەمپيوناتى، ازيا ويىندارى سياقتى ءدۇبىرلى دودالاردا ەل نامىسىن ابىرويمەن قورعاعان سپورت شەبەرى، «نۇر وتان» پارتياسىنىڭ مۇشەسى دەنيس تەندى ەسكە الۋ ءۇشىن ءبىر مينۋت ۇنسىزدىكپەن باستالدى.
اتالعان جيىندا پارتيا قىزمەتىن جاڭعىرتۋ اياسىندا قولعا الىنعان جاڭا جوبالار مەن ەلباسى الدىمىزعا قويعان مىندەتتەردىڭ وڭىردە جۇزەگە اسىرىلۋ بارىسى پىسىقتالدى. سونداي-اق جاڭادان قۇرىلعان وبلىستاعى پارتيا فيليالىنىڭ ءتوراعاسى سايلاندى.
تۇركىستان - بارشا تۇركى الەمى كيە تۇتاتىن قاسيەتتى مەكەن. ۇزاق جىل قازاق حاندىعىنىڭ استاناسى بولىپ، ەل ىرگەسىنىڭ بەكي تۇسۋىنە دە ۇلكەن ۇلەسىن قوستى. كۇنى بۇگىنگە دەيىن ەلىمىزدىڭ رۋحاني استاناسى بولىپ كەلگەن شاھارعا ەلباسىمىز ءوزىنىڭ تاريحي شەشىمىمەن جاڭا مارتەبە بەرىپ، ۇلكەن جاۋاپكەرشىلىك جۇكتەپ وتىر.
مەملەكەت باسشىسىنىڭ جارلىعىنان كەيىن وڭىردە قىزۋ جۇمىس باستالىپ، بارلىق مەملەكەتتىك ورگاندار مەن ساياسي كۇشتەر جاڭا وبلىستاعى ءىس-ارەكەتتەرىن جاڭا باعىتتا ءوربىتۋدى باستاپ كەتتى. سوعان وراي «نۇر وتان» پارتياسى دا پارتيا وبلىستىق فيليالىنىڭ الدىندا تۇرعان ماقسات- مىندەتتەردى ايقىنداپ، ەرەكشە ەكپىنمەن ىسكە كىرىسۋدە. كونفەرەنتسيادا پارتيا ءتوراعاسىنىڭ ءبىرىنشى ورىنباسارى تۇركىستاننىڭ تاريحىمىزدا الار ورنى ەرەكشە ەكەنىنە نازار اۋدارىپ، ەلباسىنىڭ وڭىرگە ۇلكەن ءۇمىت ارتىپ وتىرعانىن ايتتى.
«تۇركىستان ەلباسى ساياساتىنىڭ ارقاسىندا دامۋدىڭ جاڭا كەزەڭىنە اياق باسىپ وتىر. بۇل تاريحي شەشىم اتا- بابالارىمىز باستاپ كەتكەن ىرگەلى ءىستىڭ لايىقتى جالعاسى جانە قالانىڭ ءوسىپ- وركەندەۋىنە وڭ اسەرىن تيگىزەتىن ماڭىزدى قادام ەكەنى ءسوزسىز. وسىلايشا مەملەكەت باسشىسى تۇركىستاننىڭ قايتادان تۇلەپ، جاڭعىرىپ، ەل دامۋىنا ءوز ۇلەسىن قوساتىن ورتالىققا اينالۋىنا داڭعىل جول اشىپ بەردى»، - دەدى ماۋلەن اشىمبايەۆ.
جيىن بارىسىندا كونفەرەنسيا دەلەگاتتارىنىڭ ماقۇلداۋىمەن وبلىس اكىمى جانسەيىت تۇيمەبايەۆ «نۇر وتان» پارتياسى تۇركىستان وبلىستىق فيليالىنىڭ ءتوراعاسى بولىپ سايلاندى. ماۋلەن اشىمبايەۆ وبلىس اكىمىنىڭ بۇل قىزمەتتى دە ابىرويمەن اتقاراتىنىنا سەنىم ءبىلدىرىپ، ءتوراعالىق كۋالىگىن سالتاناتتى جاعدايدا تاپسىردى.
«تۇركىستان بولاشاقتا بارشا تۇركى الەمىنىڭ ناعىز ورتالىعىنا اينالىپ، بۇرىنعى اتاق- داڭقىن قايتا يەمدەنەدى دەپ سەنەمىز. قازىردىڭ وزىندە كوپتەگەن يگى باستامالار قولعا الىنۋدا. بولاشاقتا وسى جۇمىستاردىڭ بارلىعىن جانسەيىت قانسەيىت ۇلى تىڭعىلىقتى اتقاراتىنىنا ەشقانداي كۇمانىمىز جوق»، - دەدى پارتيا ءتوراعاسىنىڭ ءبىرىنشى ورىنباسارى.
سونداي-اق كونفەرەنتسيادا پارتيا ساياسي كەڭەسىنىڭ كەڭەيتىلگەن وتىرىسىندا ەلباسى ايقىنداپ بەرگەن جاڭا مىندەتتەردى ورىنداۋدىڭ ءتيىمدى تەتىكتەرى جان- جاقتى تالقىلاندى. ودان بولەك، مەملەكەت باسشىسى ماقۇلداعان جاڭا پارتيالىق جوبالاردى تۇركىستان وبلىسىندا ءتيىمدى جۇزەگە اسىرۋ بارىسى كەڭىنەن ءسوز بولدى. وسى باعىتتا ءوڭىردىڭ الدىندا تۇرعان باسىم- باعىتتارعا نازار اۋدارعان ماۋلەن اشىمبايەۆ اتالعان جۇمىستاردىڭ ءتيىمدى تەتىكتەرىنە توقتالىپ ءوتتى.
وسى رەتتە جيىندا پارتيانىڭ تۇركىستان وبلىستىق فيليالى ساياسي كەڭەسىنىڭ، تەكسەرۋ- باقىلاۋ كوميسسياسىنىڭ جانە ساياسي كەڭەس بيۋروسىنىڭ قۇرامى بەكىتىلگەنىن دە اتاپ وتكەن ءجون. سونىمەن قاتار پارتيا ءتوراعاسىنىڭ ءبىرىنشى ورىنباسارى وبلىسقا ساپارى بارىسىندا قوجا احمەت ياسساۋي كەسەنەسىنە بارىپ، تاريحي كەشەننىڭ بارشا تۇركى الەمى ءۇشىن ماڭىزى زور ەكەنىن اتاپ ءوتتى.
