تەرراكوتا اسكەرىن تاماشالاۋشىلاردىڭ سانى ارتتى - شەتەلدەگى قازاق ءتىلدى ب ا ق- قا شولۋ
تۇركيادا تۇرىك الەمى ۇلتتىق سپورت تۇرلەرىنىڭ فەستيۆالى باستالادى - TRT
فەستيۆال ورتاق تۇرىك مادەنيەتىن بولاشاق ۇرپاققا جەتكىزۋ ماقساتىمەن ۇيىمداستىرىلۋدا. تۇركيانىڭ بۋرسا قالاسىندا وتەتىن تۇرىك الەمى ۇلتتىق سپورت تۇرلەرىنىڭ فەستيۆالىنە 20-22 -شىلدە كۇندەرى ارالىعىندا بارلىعى 309 سپورتشى مەن 150 ونەر قايراتكەرلەرى قاتىسادى، دەپ حابارلايدى تۇركيا راديو تەليەۆيزيا پورتالى.
ءۇشىنشى رەت وتكىزىلىپ وتىرعان تۇرىك الەمى ۇلتتىق سپورت تۇرلەرىنىڭ فەستيۆالىنە تۇركيا، قازاقستان، قىرعىزستان، وزبەكستان، ازەربايجان جانە تۇرىكمەنستاننان سپورتشىلار كەلمەك. فەستيۆال تۇرىك حالىقتارىنىڭ كوڭىل بىرلىگى جانە باۋىرلاستىعىن نىعايتۋ، ورتاق تۇرىك مادەنيەتىن بولاشاق ۇرپاققا جەتكىزۋ ماقساتىمەن ۇيىمداستىرىلۋدا.
«20 -شىلدە كۇنگى اشىلۋ سالتاناتىندا مەحتەر توبىنىڭ كونسەرتى، قىلىش- قالقان قويىلىمدارى، ساداق اتۋ، كوكپار تارتۋ ويىندارى وتكىزىلەدى جانە فولكلور كورسەتىلىمى بولادى. 21 شىلدە سەنبى كۇنى ءداستۇرلى ساداق اتۋ جارىستارى، شاباندوز قويىلىمدارى، ۇلتتىق بالالار ويىندارى مەن كۇرەس جارىستارى وتكىزىلەدى. شارا 22 شىلدە جەكسەنبى كۇنى دە جالعاسادى»، - دەپ جازدى تۇركيالىق ب ا ق.
بەيجىڭدە وتەتىن قىسقى وليمپيادا ويىندارىنا جاڭادان 7 جارىس ءتۇرى قوسىلدى - «ورتالىق حالىق راديوسى» (CNR)
حالىقارالىق وليمپيادا كوميتەتى 2022 -جىلى بەيجىڭدە وتەتىن قىسقى وليمپيادا ويىندارىنىڭ تىزىمىنە تاعى 7 جارىس ءتۇرىنىڭ جاڭادان قوسىلعاندىعىن، وسى كەزەكتى سپورت باسەكەسىنە جالپى 109 التىن مەدالدىڭ دوداعا تۇسەتىندىگىن جاريالادى. بۇل تۋرالى اپتا سوڭىندا kazakcnr.com حابارلادى.
«جاڭادان قوسىلعان 7 جارىس ءتۇرى مىنالار: ايەلدەر اراسىنداعى بوبسلەيدەن جارىس، ارالاس كوماندالىق قىسقا ارالىققا كۇش جالعاپ سىرعاناۋ، ارالاس كوماندالىق تۇردەگى شاڭعىمەن ترامپليننەن سەكىرۋ، ەرلەر مەن ايەلدەردىڭ ەركىن فورمادا شاڭعىمەن ترامپليننەن سەكىرۋى، ەركىن فورمادا شاڭعىمەن كەڭىستىكتە ونەر كورسەتۋى مەن توپتىق تۇردەگى جالعىز تاقتالى شاڭعىنىڭ كەدەرگىدەن ءوتۋى قاتارلىلار»، - دەپ جازادى «ورتالىق حالىق راديوسى».
سين شيحۋانديدىڭ تەرراكوتا اسكەرىن تاماشالاۋشىلاردىڭ سانى كۇرت مولايدى - «جەنمين جيباو» (People Daily)
بيىل جازدىق دەمالىس باستالىسىمەن، شانشيدە قىتاي تاريحىنداعى ايگىلى پاتشالارىنىڭ ءبىرى سانالاتىن سين شيحۋانديدىڭ(چين شىحۋاڭ - رەد.) داۋىرىندە جاسالعان تەرراكوتا اسكەرى مۇراجايىن تاماشالاۋشىلاردىڭ سانى كۇرت كوبەيگەن. ءار كۇنگى كورەرمەن سانى ورتا ەسەپپەن 35 مىڭ ادامعا جەتىپ، جىلداعى وسى مەزگىلمەن سالىستىرعاندا 28,3 پايىز ارتىپ، تۋريستەردىڭ لەگى مولايعانىن جازادى People Daily.
«تەرراكوت اسكەرى» - شيان قالاسىنداعى سين شيحۋاندي يمپەراتورىنىڭ كەسەنەسى جانىنداعى تولىق ولشەمى ساقتالعان 8099 قىتاي جاۋىنگەرىنىڭ جانە ولاردىڭ اتتارىنىڭ مۇسىندەرى قابىرىنىڭ جالپىلاما اتاۋى. ايتا كەتۋ كەرەك، سين شيحۋاندي، ين چجەن (ب. ز. ب. 258 - 210) - سين پاتشالىعىنىڭ بيلەۋشىسى. قىتايدىڭ ەڭ تانىمال يمپەراتورى. 22 جاسىندا بيلىككە كەلگەن ول بىتىراڭقىلىقتا ءومىر سۇرگەن قىتاي جەرىن ءبىر ورتالىققا باعىندىرۋ جولىندا كۇرەس جۇرگىزدى. ب. ز. ب. 221 ج. قىتايداعى 6 پاتشالىقتى وزىنە باعىندىرعان ۇلى بيلەۋشى سين شيحۋاندي - «سيننىڭ ءبىرىنشى يمپەراتورى» دەگەن اتپەن ءبىر ورتالىققا باعىنعان ءبىرتۇتاس قىتاي مەملەكەتىن قۇرۋشى. بۇل سول زامانداعى اسا ۇلكەن مەملەكەت ەدى. سين شيحۋاندي قاتاڭ تارتىپكە، شەكسىز بيلىككە نەگىزدەلگەن امىرشىلدىك جۇيە ەنگىزگەن قىتاي پاتشاسى.
قازاقستان كولىكتەرىنە سۇرانىس ارتتى - TRT
«قازاقستاندا جاسالعان» ماركالى كولىكتەرگە رەسەي، قىتاي، تاجىكستاندا سۇرانىس ارتتى. بۇل قازاقستانداعى وتاندىق ماشينا جاساۋ زاۋىتتارىنىڭ جۇمىس اۋقىمىن كەڭەيتىپ، ەكسپورتتىق الەۋەتىنىڭ ارتۋىنا ىقپال ەتتى. بۇنداي اقپاراتتى وسى اپتادا تۇركيا راديو تەلەۆيزيا پورتالى جاريالاعان.
سوڭعى 6 ايدا قازاقستاننىڭ ماشينا جاساۋ وندىرىسىندە ەكى پايىزعا دامۋ بايقالعانىن جازادى اتالعان تۇركيالىق اقپارات كوزى. «قازاقستاندىق اۆتوبيزنەس قاۋىمداستىعى 2018 -جىلدىڭ العاشقى التى ايىندا كولىكتىڭ بارلىق ءتۇرى بويىنشا جالپى سانى 14 مىڭ 660 كولىك قۇرالى قۇراستىرىلعانىن مالىمدەدى. ەلدىڭ ەڭ ماڭىزدى 6 ماشينا قۇراستىرۋ زاۋىتىندا 13 مىڭ 725 جەڭىل اۆتوكولىك، 486 كاماز، 153 اۆتوبۋس جانە باسقا دا كولىك قۇرالىنىڭ شىعارىلعانى حابارلاندى. قازاقستاننىڭ كولىك قۇراستىرۋ زاۋىتتارىنىڭ كوشىن قوستانايداعى «سارىارقا اۆتو پروم» باستاپ تۇر. بۇل جەردە جارتى جىل ىشىندە 5 مىڭ 297 كولىك جاسالىپ، ەل جانە شەتەل نارىعىنا ساتىلعان»، - دەپ تۇيىندەيدى تۇركيالىق ب ا ق.
پرەمەر- مينيستر سەل اپاتى زاردابىمەن كۇرەسۋگە تاپسىرما بەردى - KAZNEWS
19 -شىلدەدە موڭعوليا پرەمەر- ءمينيسترى ۋ. ءحۇرەلسۇح ەلدىڭ بىرنەشە ولكەلەرىندە بولعان سەل اپاتىنا بايلانىستى مەملەكەتتىك توتەنشە جاعدايلار كوميسسياسى وتىرىسىن وتكىزىپ، ايماقتا بولىپ جاتقان وقيعادان اقپارات الدى. بۇل تۋرالى موڭعوليالىق kaznews.mn اقپاراتتىق پورتالى حابارلادى.
اتالعان اقپارات كوزىنىڭ دەرەگىنە سۇيەنسەك، 11-18 -شىلدە ارالىعىندا ەلدىڭ كوپتەگەن ولكەلەرىندە نوسەر جاڭبىر جاۋىپ، ايماقتارعا جانە ۇلانباتىر قالا ورتالىعىندا سەل ءجۇرىپ، ازاماتتار مەرت بولىپ، اۆتوجول، ەلەكتر جۇيەلەرى بۇزىلىپ، مەكەمەلەر مەن شارۋاشىلىق بىرلىكتەر زارداپ شەككەن.
بۇل جينالىستا وڭىرلەردە بولعان توتەنشە وقيعاعا بايلانىستى موڭعول ەلىنىڭ توتەنشە جاعدايلار باس باسقارماسى باسشىسىنىڭ ءبىرىنشى ورىنباسارى، بريگادالىق گەنەرال گ. اريۋنبۋيان اقپارات بەردى.
«بايان-ولگەي ايماعى ولگەي سۇمىن ورتالىعىنىڭ بارلىق 8 ىقشام اۋدانىنىڭ 530 وتباسى، 2500 دەن استام ازاماتى سەل اپاتىنان زارداپ شەگىپ، 3 ادام جاراقاتتانىپ، تۇرعىن ۇيلەر مەن مەكەمەلەر عيماراتى قيرادى. قازىرگى تاڭدا، ازاماتتاردى قاۋىپسىز ورتاعا كوشىرۋ، ۋاقىتشا باسپانامەن قامتاماسىز ەتۋ، قاجەتتى كومەكتەر كورسەتىلۋدە»، - دەلىنگەن اقپاراتتا.
سونداي-اق، ۇلانباتىر قالاسىنىڭ ءبايانزۇرح اۋدانىندا 17 -شىلدەدە سەل ءجۇرىپ 2 ازامات مەرت بولىپ، شارۋاشىلىق بىرلىكتەر عيماراتى مەن ازاماتتاردىڭ ۇيلەرى سۋ استىندا قالعانى دا ايتىلدى.
kaznews.mn اقپاراتتىق پورتالىندا جازىلعان دەرەكتەرگە سۇيەنسەك، ءتوۆ ايماعى زۋۋنمود سۇمىنىندا 16-17 شىلدەدە ۇزدىكسىز جاۋعان جاڭبىر سەلگە ۇلاسىپ، لاس سۋ قۇبىرلارى مەن بوگەتتەر جارىلىپ، 28 وتباسىنىڭ باسپاناسىن سۋ باسقان.
ءتوۆ ايماعى بورنۋۋر سۇمىنىندا 16 -شىلدەدە سەل ءجۇرىپ 70 وتباسىنىڭ اۋلاسى، ءۇيى، 10 شارۋاشىلىق بىرلىك عيماراتى مەن جەرتولەلەرىن سۋ باسىپ، اتالعان اۋماقتاعى «شاۆارتاي» كوپىرى قۇلاپ، سۇمىن ورتالىعىنداعى 0.6 شاقىرىم اۆتوجول بۇزىلعان.
ءسۇحبااتار ايماعىندا 7 ءتۇرعىنۇي، 2 اۆتوكولىك، ءمونححاان سۇمىنىنان 44 ك م، ايماق ورتالىعىنان 150-200 ك م قاشىقتىقتاعى اۆتوجول بۇزىلعان. موڭعوليانىڭ توتەنشە جاعدايلار باسقارماسى بايان-ولگي ايماعىندا بولعان تابيعي اپاتتان كەلگەن شىعىنداردى ەسەپتەگەن.
«قازىرگى جاعدايمەن ۇزدىكسىز جاۋعان نوسەر جاڭبىردىڭ كەسىرىنەن بولعان شىعىن كولەمى 10 ميلليارد توگروگ ($4065040) - تى قۇراپ وتىر. بۇل 2016 -جىلعى تابيعي اپاتتان 5 ەسەگە كوپ» دەپ جازادى kaznews.mn.
بايان- ولگەي ايماعىندا نوسەر جاڭبىر سالدارىنان سۋ باسقان ءۇيدىڭ سانى 530 عا جەتكەنى دە ايتىلدى.
ت ج ب باسىلىمعا جاريالاعان دەرەگىنە قاراساق، بايان-ولگەي ايماعىنىڭ ولگەي قالاسىندا سۋ تاسقىنىنا قارسى 30 شاقىرىمدىق بوگەت سالىنادى. بۇل تۋرالى موڭعوليانىڭ توتەنشە جاعدايلار باس باسقارماسىنىڭ وكىلدەرى مالىمدەگەن ەكەن.
«بايان-ولگەي ايماعىندا 14-16 -شىلدەدە جاۋعان نوسەر جاڭبىردىڭ سالدارىنان 530 ءۇي 2500 گە جۋىق ادام زارداپ شەگىپ، 1566 گە جۋىق ادام قاۋىپسىز ورىندارعا جەتكىزىلىپ وتىر. قازىرگى جاعدايمەن 5 شاقىرىمدىق بوگەت سالىنىپ، 300 مەتر ارىق تارتىلىپ وتىر. 30 شاقىرىمدىق بوگەت سالۋعا ۇستىمىزدەگى جىلى 670 ميلليون توگروگ بيۋدجەتكە وتىرعان بولسا، كەلەر جىلى 5 ميلليارد توگروگ جۇمسالماق»، - دەيدى موڭعوليالىق باق.
بولعان جاعداي تۋرالى اقپاراتتاردى تىڭداعاننان كەيىن موڭعوليا پرەمەر-ءمينيسترى ۋ. ءحۇرەلسۇح بىرنەشە مىندەتتەر مەن باعىتتار بەردى. تابيعي اپات كەزىندە ادام مەرت بولۋ، ماتەريالدىق شىعىندارعا ۇشىراۋدان الدىن الىپ جۇمىس ىستەۋدى توتەنشە جاعدايلار كوميسسياسى مۇشەلەرى مەن باسقارۋشىلارىنا تاپسىردى.
پرەمەر-مينيستر سەل اپاتى بولعان بايان- ولگيي ايماعىنا كومەك رەتىندە مەملەكەتتىك قوردان 80 كيىز ءۇي، اۋىز سۋ مەن ارام سۋ تاسىمالدايتىن جانە مەديتسينالىق اۆتوكولىكتەر، بۋلدوزەر جىبەرەتىن ايتقان. سونداي-اق، اتالعان ايماققا سۋ تاسقىنى بوگەتىن سالۋ جۇمىسىنا قازىرگى تاڭدا تەندەر جاريالانعان ساتىدا جۇرگەنىن حابارلادى.
بەس ەل باسشىلارى كاسپي تەڭىزىنىڭ قۇقىقتىق مارتەبەسىن انىقتاماق - «فارس» اقپارات اگەنتتىگى
كاسپي جاعالاۋىنداعى بەس ەل باسشىلارىنىڭ ءسامميتى تامىزدىڭ 12 -كۇنى اقتاۋ قالاسىندا وتەدى، دەپ حابارلايدى parstoday اقپارات اگەنتتىگى.
اتالعان اقپارات اگەنتتىگىنىڭ مالىمەتى بويىنشا، بەس مەملەكەت ديپلوماتيالىق كانالدار ارقىلى سامميتكە قاتىسۋعا دايىن ەكەندىكتەرىن راستادى.
«كاسپيي جاعالاۋىنداعى ەلدەر باسشىلارىنىڭ اقتاۋدا وتەتىن بەسىنشى سامميتىندە كاسپيي تەڭىزىنىڭ قۇقىقتىق مارتەبەسى تۋرالى قۇجاتقا قول قويىلادى. كاسپيي تەڭىزىنىڭ قۇقىقتىق مارتەبەسىن انىقتاۋ - اتالمىش تەڭىز جاعالاۋىنداعى مەملەكەتتەردىڭ نەگىزگى ماسەلەسى. كاسپيي جاعالاۋىنداعى مەملەكەتتەر بۇل تاقىرىپقا قاتىستى وسى ۋاقىتقا دەيىن 4 سامميت پەن 51 جۇمىس توبىنىڭ وتىرىسىن وتكىزدى» دەپ جازادى يراندىق ب ا ق.
تاۋەكەلشىلدەر حۋاشان تاۋىندا - «ورتالىق حالىق راديوسى» (CNR)
قىتايدىڭ شانشي ولكەسى حۋاياڭ قالاسى، حۋاشان تاۋىنىڭ وڭتۇستىك شىڭىندا ورنالاسقان «حۋاشانداعى 1-قاتەر» اتتى جالاما قۇزداعى كوپىر كوپشىلىكتى وزىنە باۋراۋدا دەپ جازادى قىتايلىق تانىمال اقپاراتتىق پورتال kazakcnr.com.
اتالعان اقپارات كوزىنىڭ دەرەگىنە سۇيەنسەك، بۇل بيىك تاۋ شىڭىنىڭ قاپتالىن قازا ورناتىلعان كوپىر ەكەن. قۇلاما قۇزدى جالعاستىرعان شارباق كوپىرلەردى ءجۇرىپ ءوتۋ - تاۋەكەلشىل تۋريستەردى وزىنە ايىرىقشا باۋراعان كورىنەدى.
اۆتور: بەيسەن سۇلتان ۇلى