دەنيس تەننىڭ ءولىمى: كۇدىكتى ارمان قۇدايبەرگەنوۆكە قاتىستى تىڭ مالىمەتتەر بەلگىلى بولدى

قىزىلوردا. قازاقپارات - دەنيس تەننىڭ ولىمىنە ەكىنشى كۇدىكتى ارمان قۇدايبەرگەنوۆكە قاتىستى جاڭا مالىمەتتەر بەلگىلى بولدى.

بۇل تۋرالى قازاقپارات ءتىلشىسى قىزىلوردا وبلىستىق سوتىنىڭ باسپا ءسوز قىزمەتىنە سىلتەمە جاساپ حابارلايدى.

كۇدىكتى ارمان قۇدايبەرگەنوۆ قىزىلوردا وبلىسى بايقوڭىر قالاسىنىڭ تۇرعىنى بۇرىندا دا سوتتى بولعاندىعى انىقتالدى.

«بۇل ازامات 2013 -جىلى سوتتالعان. ول كەزدە كۇدىكتىنىڭ جاسى 17-دە بولعان. تەرگەۋ بارىسىندا ارمان 2012 -جىلدىڭ 9 -جەلتوقسانىندا قاراقشىلىق ارەكەتكە بارعاندىعى دالەلدەنگەن. ياعني، ول تۇندە كوشەدە كەتىپ بارا جاتقان ازاماتتى سوققىعا جىعىپ، ۇيالى تەلەفونىن تارتىپ العان. سوت ۇكىمى بويىنشا ول ءبىر جىلعا باس بوستاندىعىنان شەكتەلگەن بولاتىن، - دەپ مالىمدەدى  قىزىلوردا وبلىستىق سوتىنىڭ باسپا ءسوز قىزمەتى.

ايتا كەتسەك، قازاقستاندىق مانەرلەپ سىرعاناۋشى دەنيس تەن 19 -شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19 -شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.

2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.

ادام ءولتىرۋ بابىمەن قىلمىستىق ءىس قوزعالدى.

بۇگىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 -جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.

سونداي-اق، دەنيس تەننىڭ ولىمىنە كۇدىكتى نۇرالى قياسوۆ كۇزەتپەن المالى اۋداندىق سوتىنا جەتكىزىلگەن.

ال الدىن الا تاراتىلعان اقپارات بويىنشا دەنيس تەننىڭ ءولىمى بويىنشا كۇدىكتى ەكىنشى ادام ارمان قۇدايبەرگەنوۆ ۇستالدى.