ايدوس ۇكىباي: پرەزيدەنت دەنيس تەننىڭ وتباسىنا قوڭىراۋ شالىپ، كوڭىل ايتتى

استانا. قازاقپارات - قازاقستان پرەزيدەنتىنىڭ باسپا ءسوز حاتشىسى ايدوس ۇكىباي قازاقپارات تىلشىسىنە بەلگىلى سپورتشى دەنيس تەننىڭ قازاسىن ەلباسىنىڭ قالاي قابىلداعانى تۋرالى ايتىپ بەردى.

ونىڭ ايتۋىنشا، نۇرسۇلتان نازاربايەۆ دەرەۋ باس پروكۋرور مەن ىشكى ىستەر مينيسترىنە سپورتشىنىڭ قازاسى تۋرالى قىلمىستىق ءىستى ەرەكشە باقىلاۋعا الۋدى تاپسىرعان بولاتىن.

«مەملەكەت باسشىسى جاس ءارى تالانتتى، قازاقستان مەن الەمنىڭ سۇيىسپەنشىلىگىنە بولەنىپ ۇلگەرگەن، بولاشاعىنان زور ءۇمىت كۇتتىرگەن دەنيس تەننىڭ باقيلىق بولۋىن اۋىر قايعىمەن جانە زور كۇيزەلىسپەن قابىلدادى. پرەزيدەنت قازاقستاندا مانەرلەپ سىرعاناۋدىڭ نەگىزىن قالاعان جانە ەلىمىزدەگى سپورتتىڭ دامۋىنا زور ۇلەس قوسقان دەنيستىڭ جاقىندارى مەن تۋىستارىنا كوڭىل ايتۋ جەدەلحاتىن جىبەردى»، - دەدى ايدوس ۇكىباي.

سونىمەن بىرگە، نۇرسۇلتان نازاربايەۆ جاستارعا ۇلگى بولا بىلگەن تاماشا ۇلدى، ءوز ەلىنىڭ ناعىز پاتريوتىن تاربيەلەپ وسىرگەن دەنيس تەننىڭ اتا- اناسىنا قوڭىراۋ شالىپ، كوڭىل ايتقان.

«مەملەكەت باسشىسى دەنيستىڭ مەزگىلسىز دۇنيەدەن ءوتۋى - جاقىندارى مەن تۋىستارى ءۇشىن عانا ەمەس، تۇتاس مەملەكەت ءۇشىن ورنى تولماس قازا ەكەنىن جەتكىزدى. مانەرلەپ سىرعاناۋشىنىڭ اتا- اناسىنا كوڭىل ايتا وتىرىپ، پرەزيدەنت قىلمىسكەرلەردىڭ جازاسىز قالمايتىنىن باسا ايتتى»، - دەدى ەلباسىنىڭ ءباسپاسوز حاتشىسى ايدوس ۇكىباي.

 ايتا كەتسەك، قازاقستاندىق مانەرلەپ سىرعاناۋشى دەنيس تەن 19 - شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19 - شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.

 2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.

ادام ءولتىرۋ بابىمەن قىلمىستىق ءىس قوزعالدى.

بۇگىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 -جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.

اۆتور: ايجان سەرىكجان قىزى