دەنيس تەندى ءولتىردى دەگەن كۇدىكتى بۇعان دەيىن ءۇش رەت ءىستى بولعان

تاراز. قازاقپارات - قازاقستاندىق بەلگىلى مانەرلەپ سىرعاناۋشى دەنيس تەندى ءولتىردى دەگەن كۇدىكپەن ۇستالعانداردىڭ بىرىنە قاتىستى كەيبىر مالىمەتتەر انىقتالدى، دەپ حابارلايدى قازاقپارات ءتىلشىسى.

ق ر ءى ءى م- ءنىڭ باسپا ءسوز قىزمەتى كۇدىكتىلەردىڭ ءبىرى ۇستالىپ، ۋاقىتشا ۇستاۋ يزولياتورىنا قامالعانىن ءمالىم ەتكەن بولاتىن.

كۇدىكتى، 1994 -جىلى جامبىل وبلىسىندا تۋعان نۇرالى قياسوۆ ءوزىنىڭ جاساعان قىلمىسىن مويىندادى.

انىقتالعانداي، مەركى اۋىلىندا تۋعان 24 جاستاعى نۇرالى قياسوۆتى 2017 -جىلى قۇقىق قورعاۋ ورگاندارى ءۇش رەت جاۋاپقا تارتقان.

اتاپ ايتقاندا، وتكەن جىلدىڭ قاڭتارىندا ول ماس كۇيىندە اۆتوكولىك باسقارعانى ءۇشىن ۇستالىپ، سۋديا راحات رازاقوۆتىڭ توراعالىعىمەن مەركى سوتى ونى ءۇش جىلعا جۇرگىزۋشى كۋالىگىنەن ايىرعان: «قياسوۆ نۇرالى داۋلەتبەك ۇلى 2017 -جىلعى 14 - قاڭتار كۇنى تاڭەرتەڭ ساعات 07:38-دە جامبىل وبلىسىنىڭ مەركى اۋىلىندا «مازدا 626» ماركالى ماشينانى ماس كۇيىندە جۇرگىزگەن. 31 - قاڭتاردا مەركى اۋداندىق سوتىنىڭ قاۋلىسىمەن ءۇش جىل مەرزىمگە جۇرگىزۋشى قۇقىعىنان ايىرىلعان»، - دەلىنگەن ق ر جوعارعى سوتىنىڭ «سوت كابينەتى» سايتىندا. بۇل رەتتە، ونىڭ سوت وتىرىسىنا قاتىسپاعانى جانە كەلمەۋىنىڭ سەبەبىن تۇسىندىرمەگەنى اتاپ وتىلگەن.

ناۋرىز ايىندا مەركى اۋداندىق سوتىنىڭ سۋدياسى اباي داۋرەنبەكوۆتىڭ توراعالىعىمەن تاعى ءبىر سوت وتىرىسى ءوتتى. ۇرلىققا قاتىستى قىلمىستىق ءىس بويىنشا سوت تالقىلاۋلارى ءبىر اي بويى ءجۇردى.

سوتتالۋشىعا ماشينا اككۋمۋلياتورى مەن ماگنيتوفونىن قولدى ەتتى دەگەن ەكى ۇرلىق دەرەگى بويىنشا ايىپ تاعىلدى: «2017 -جىلعى 17 - اقپان كۇنى تۇنگى ساعات 02:30 شاماسىندا د. قياسوۆ مەركىدە اۋىلداسى ا. باينازاروۆپەن بىرگە كوشەدە كەلە جاتقان. «اۋدي-80» اۆتوماشيناسىن كورىپ، ەشكىم جوقتا اۆتوموبيلدىڭ الدىڭعى تەرەزەسىن سىندىرىپ، 14 مىڭ تەڭگە تۇراتىن DVD- پلەەردى، 2 مىڭ تەڭگە تۇراتىن ماگنيتوفوندى العان. سودان كەيىن اۆتوماشينانىڭ كاپوتىن اشىپ، 8 مىڭ تەڭگە تۇراتىن اككۋمۋلياتورىن ۇرلاعان. جالپى ماتەريالدىق زالال 24 مىڭ تەڭگەنى قۇرادى. بۇدان سوڭ ول اۋىلداسىمەن بىرگە وقيعا ورنىنان ءىزىن سۋىتقان»، - دەلىنگەن ءىس ماتەريالدارىندا.

ءبىراق سوتتا تاراپتار كەلتىرىلگەن زياندى وتەۋ تۋرالى كەلىسىمگە كەلىپ، جابىرلەنۋشىلەر ۇرىنى كەشىرگەندىكتەن، سوت ونى بوستاندىعىنان ايىرماي، اكىمشىلىك جازامەن شەكتەلگەن.

2017 -جىلى نۇرالى قياسوۆ شاعىن نەسيە ۇيىمىنا قارىزى بويىنشا ءۇشىنشى رەت سوت تالقىلاۋىنا تارتىلعان. قياسوۆ 144 مىڭ تەڭگەدەن استام سوما بەرەشەك بولعان.

16 - قازاندا مەركى اۋداندىق سوتىنىڭ سۋدياسى ەركىن كەنبايەۆ «KMF (ك م ف)» شاعىن نەسيە ۇيىمى» ج ش س- ءنىڭ ن. د. قياسوۆقا قاتىستى نەسيەسىنىڭ، مەملەكەتتىك باجدىڭ، سوت شىعىندارىن تولەۋ تۋرالى تالاپ ارىزىن قاراپ»، «... وسى تالاپ ارىز بويىنشا ازاماتتىق ءىس قوزعاۋ تۋرالى» شەشىم شىعارعان. ال 2018 -جىلدىڭ 8 - قاڭتارىندا ءىس ارحيۆكە جىبەرىلگەن.

ەسكە سالا كەتەيىك، مانەرلەپ سىرعاناۋشى دەنيس تەن 19 - شىلدە كۇنى ءتۇس كەزىندە پىشاق جاراقاتىمەن اۋرۋحاناعا جەتكىزىلدى. الماتى ءى ءى د مالىمەتىنشە، بەلگىسىز ادامدار سپورتشىنىڭ ماشيناسىنىڭ ايناسىن ۇرلاماق بولىپ، سانىنا پىشاق سۇعىپ العان. زارداپ شەگۋشى 3 ليتر قان جوعالتتى. دارىگەرلەر ونىڭ جاعدايىن وتە اۋىر دەپ باعالاعان. ارتىنشا، ق ر دەنساۋلىق ساقتاۋ مينيسترلىگىنىڭ باسپا ءسوز حاتشىسى ەرنار اكىمقۇلوۆ سپورتشىنىڭ قايتىس بولعانىن مالىمدەدى.

دەنيس تەندى ءولتىردى دەگەن كۇدىككە ىلىنگەن ەكىنشى ادام - 1994 -جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.