دەنيس تەنننىڭ كولىگىن توناماق بولعاندار ءوز ءىسىنىڭ «شەبەرى» - ساتۋشى
ءدال وسى GX460 كولىگىنىڭ ايناسى ءۇشىن وليمپيادا جۇلدەگەرى دەنيس تەن قىرشىنىنان قيىلعان بولاتىن.
ەڭ الدىمەن ءبىز «نيۋ پارتس» اۆتوبولشەكتەر دۇكەنىنىڭ وكىلدەرىنە حابارلاستىق.
«اينانىڭ تەك اينەگى 5 مىڭ تەڭگەدەن باستالادى. ونىڭ ايناسى نومىرلەنبەگەن. نەگىزى ۇرلاماۋ ءۇشىن ارنايى لازەرمەن گراۆيرلەنەدى. سوندا اينانى ەشكىم ۇرلاي المايدى. سەبەبى، ونى ساتسا ەرتەڭ ۇستالىپ قالادى. ەگەر گراۆيروۆكا تۇرسا، وندا ۇرىلار جولاماس ەدى. اينانى 10 مىڭعا گراۆيرلەۋگە بولادى. دەنيستىڭ كولىگىنىڭ ايناسى جالپى جيىنتىعىمەن شامامەن 150 مىڭ تەڭگە تۇرادى. ونى ۇرىلار بازارلاردا 50000 تەڭگەگە ساتىپ جىبەرە الادى»، - دەدى اۆتوبولشەك دۇكەنىنىڭ وكىلى.
سونداي- اق، قازاقپارات ءتىلشىسى الماتىداعى اۆتوبولشەك ساۋدا بازارىندا بولىپ، جاعدايدى ءوز كوزىمەن كورىپ قايتتى.
قايعىلى وقيعادان سوڭ بۇل بازاردا پوليتسيا قىزمەتكەرلەرىنىڭ قاراسى كوبەيگەن. ساۋداگەرلەر دە جانتۇرشىگەرلىك قازانى ءوزارا تالقىلاپ جاتىر.
ساتۋشىلاردىڭ ءبىرى بىزبەن اڭگىمەسىندە كولىك ايناسىن ۇرلاۋ قىلمىسى 10 جىلدان بەرى بار ەكەنىن ايتتى.
«مەن ءوزىم ۇرلانعان زاتتاردى ساتپايمىن. ءبىراق ونى ساتاتىندار كوپ... ونداي ادامدار كەلگەندە بىردەن ايتامىن. جاس كەزىڭدە توقتا، كەيىن وكىنەسىڭ دەيمىن»، - دەدى ساتۋشى.
ال شاحمۇرات ەسىمدى ساۋداگەر اۆتوبولشەك ۇرلاپ ساتۋدىڭ ۇلكەن بيزنەسكە اينالعانىن اتاپ ايتتى.
«بۇل جىگىتتەر وسىلاي وڭاي ولجا تاۋىپ كەلگەن. جۇمىسقا كۇندىز كىرىسكەنىنە قاراعاندا، ولار ناعىز «كاسىبي شەبەر» بولىپ وتىر. ويتكەنى، تەك مىقتىلار عانا كۇندىز بىرنەشە مينۋت ىشىندە اينانى شەشىپ كەتە الادى. ولار ءبىر تۇندە 10 كولىكتىڭ ايناسىن قولدى ەتەدى»، - دەدى شاحمۇرات.
ونىڭ ايتۋىنشا، ۇرىلار بىردەن ۇرلانعان دۇنيەنى تىقپالامايدى.
«ولاردىڭ ءوز كانالدارى بار. تەك سولار ارقىلى كليەنت تابادى. ۇستالعان ۇرىلار كوپ ۋاقىت وتپەي قايتادان «كاسىبىمەن» اينالىسىپ جۇرە بەرەدى»، - دەدى ساتۋشى.
ۇرىلار اينانى 30-40 مىڭ تەڭگەگە ساتىپ جىبەرۋى مۇمكىن. ال ودان ءارى اينا قايتا جاسالىپ، 100 مىڭ تەڭگەگە ساتىلىپ كەتۋى دە عاجاپ ەمەس.
ايتا كەتسەك، قازاقستاندىق مانەرلەپ سىرعاناۋشى دەنيس تەن 19 - شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19 - شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.
2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.
ادام ءولتىرۋ بابىمەن قىلمىستىق ءىس قوزعالدى.
بۇگىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 -جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.
اۆتور: گۇلميرا عوسمانالي