قازاقستاندىق سپورتشىلار قىتايداعى جارىستا ازا تۇتۋ بەلگىسىن تاعىپ شىقتى

استانا. قازاقپارات - قىتايدىڭ ۋسي قالاسىنداعى سەمسەرلەسۋدەن الەم چەمپيوناتىنا قاتىسىپ جاتقان قازاقستاندىقتار جارىسقا ازا تۇتۋ بەلگىسىن تاعىپ شىقتى، دەپ حابارلايدى قازاقپارات.

«سوچي وليمپياداسىنىڭ قولا جۇلدەگەرى، مانەرلەپ سىرعاناۋشى دەنيس تەننىڭ مەزگىلسىز قازاسى بۇكىل الەم حالقىن اۋىر قايعىعا دۋشار ەتتى. تالانتتى سپورتشى، اياۋلى ۇل، نامىستى وتانداسىمىزدىڭ قازاسىنا بايلانىستى ەل سپورتشىلارى وزدەرى قاتىسىپ جاتقان تۋرنيرلەرگە ازا تۇتۋ بەلگىسىن تاعىپ شىقپاق. قىتايدىڭ ۋسي قالاسىنداعى سەمسەرلەسۋدەن الەم چەمپيوناتىنا قاتىسىپ جاتقان قازاقستاندىق نوياندار جارىسقا ازا تۇتۋ بەلگىسىن تاعىپ شىقتى»، - دەدى ق ر ۇلتتىق وليمپيادالىق كوميتەتىنىڭ باسپا ءسوز قىزمەتىندە.

سونداي- اق اتاپ وتىلگەندەي، ەلىمىزدەگى بارلىق سپورتتىق فەدەراتسيالار وتكىزەتىن رەسمي ءارى رەسمي ەمەس تۋرنيرلەر ءبىر مينۋتتىق ۇنسىزدىكپەن باستالادى.

ايتا كەتەيىك، كەشە قازاقستان پرەمەر- ليگاسىندا ونەر كورسەتەتىن «قايرات» جانە «توبىل» كلۋبتارى ماتچتاعى جەڭىسىن دەنيس تەننىڭ رۋحىنا ارنادى.

 قازاقستاندىق مانەرلەپ سىرعاناۋشى دەنيس تەن 19 -  شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19 - شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.

 2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.

ادام ءولتىرۋ بابىمەن قىلمىستىق ءىس قوزعالدى.

بۇگىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 -جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.

 25 جاسىندا ءومىرى ۇزىلگەن سپورتشىمەن قوشتاسۋ ءراسىمى 21 - شىلدە كۇنى الماتىداعى بالۋان شولاق اتىنداعى سپورت سارايىندا وتەدى. باستالۋى - ساعات 10:00-دە. سونداي- اق ءبىر مەزگىلدەگى قوشتاسۋ ءراسىمى 21 - شىلدە كۇنى استانادا قالاسىنداعى «بارىس- ارەنا» ستاديونىندا وتەدى.

اۆتور: كۇنسۇلتان وتارباي