ا ق ش- تان پوشتا ارقىلى الماتى اۋەجايىنا ەسىرتكى جىبەرىلگەن

الماتى. قازاقپارات - الماتىنىڭ حالىقارالىق اۋەجايىندا ا ق ش- تان پوشتامەن جىبەرىلگەن ەسىرتكى زاتتارى انىقتالدى، دەپ حابارلايدى قازاقپارات قالالىق ىشكى ىستەر دەپارتامەنتىنە سىلتەمە جاساپ.

2018-جىلدىڭ 25- ماۋسىمى كۇنى الماتى قالاسى بويىنشا مەملەكەتتىك كىرىستەر دەپارتامەنتىنىڭ «جەتىسۋ» كەدەن بەكەتىنىڭ قىزمەتكەرلەرى حالىقارالىق اۋەجايدا ا ق ش- تان جولدانعان پوشتا جونەلتىلىمىنە نازار اۋدارعان. ول بيىلعى 18- ماۋسىمدا ازامات ن. -نىڭ اتىنا جىبەرىلگەن.

ەكسپرەسس- جۇككە ارنايى تەحنيكالىق قۇرالمەن كەدەندىك باقىلاۋ جۇرگىزۋ بارىسىندا ودان جالپى سالماعى 0,7 كەلىنى قۇرايتىن زات تابىلدى.

انىقتالعان زات وسىمدىك تەكتەس، ءتۇسى جاسىل جانە وزىندىك ءيىسى بار.

«ساراپتامانىڭ قورىتىندىسى بويىنشا ولاردىڭ «گاشيش» جانە «ماريحۋانا» ەكەنى انىقتالدى»، - دەلىنگەن ءى ءى د حابارلاماسىندا.