قازاقستاندا جىل باسىنان بەرى قانشا مەملەكەتتىك قىزمەتشى جەمقورلىقپەن ۇستالدى
بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ ۆەدومستۆو القاسىنىڭ كەڭەيتىلگەن وتىرىسىندا ءمالىم ەتتى، دەپ حابارلايدى قازاقپارات ءتىلشىسى.
«بارلىق سالادا جوعارى شەندى لاۋازىمدى تۇلعالاردىڭ قاتىسۋىمەن جەمقورلىقتىڭ جۇيەلى فاكتىلەرى اشكەرەلەندى دەۋگە بولادى. وتكەن جىلدىڭ ىشىندە 700 تۇلعا، سونىڭ ىشىندە 18 رەسپۋبليكالىق، 95 وبلىستىق، 101 قالالىق جانە اۋداندىق دەڭگەيدەگى باسشىلار ۇستالدى. ولاردىڭ ىشىندە ەنەرگەتيكا ۆيتسە-مينيسترلەرى، سىرتقى ساياسي ۆەدومستۆولاردىڭ جاۋاپتى حاتشىلارى، اۋىل شارۋاشىلىعى مينيسترلىگى كوميتەت ءتوراعالارى مەن ورىنباسارلارى، ۇلتتىق كومپانيالاردىڭ توپ-مەنەدجەرلەرى، قۇقىق قورعاۋ ورگاندارىنىڭ باسشىلارى، سونداي-اق ءتۇرلى دەڭگەيدەگى سۋديالار بار»، - دەدى ا. شپەكبايەۆ.
ونىڭ ايتۋىنشا، 2018-جىلدىڭ باسىنان بەرى وڭتۇستىك قازاقستان وبلىستىق جانە الماتى قالالىق مەملەكەتتىك كىرىستەر دەپارتامەنتىنىڭ لاۋازىمدى تۇلعالارى، اقمولا جانە ماڭعىستاۋ وبلىستىق ىشكى ىستەر ورگاندارى قىزمەتكەرلەرىنىڭ قاتىسۋمەن قىلمىستىق توپتار انىقتالعان.
بۇدان بولەك، ا. شپەكبايەۆتىڭ مالىمەتىنشە، اگەنتتىك 300 دەن استام كاسىپكەردىڭ قۇقىعىن قورعاعان. بۇل 2017-جىلعى كورسەتكىشتەن ءۇش ەسە جوعارى.
اگەنتتىك ءتوراعاسى قولدانىلعان شارالاردىڭ ناتيجەسىندە بەكىتىلگەن زالالدىڭ سوماسى 9,7 ميلليارد تەڭگەگە ءوسىپ، 2017-جىلدىڭ ءبىرىنشى جارتى جىلدىعىنان 4 ميلليارد تەڭگەگە ارتىق بولعان. زالالدىڭ وتەلۋى 8,5 ميلليارد تەڭگەنى قۇرادى. بۇل وتكەن جىلدىڭ ءبىرىنشى جارتى جىلدىعىمەن سالىستىرعاندا، 68 پروتسەنتكە جوعارى. تەرگەۋ بارىسىندا كۇدىكتىلەردىڭ 4,6 ميلليارد تەڭگە سوماسىنداعى مۇلكىنە توقتام سالىندى. بۇل بىلتىرعىعا قاراعاندا 4 ەسە كوپ.
سونداي-اق، مەملەكەت باسشىسىنىڭ تاپسىرماسىنا سايكەس، قىلمىستىق پروتسەستى ازايتۋ شارالارى قولدانىلىپ جاتىر. ۇستالۋشىلار مەن قاماۋعا الىنعاندار سانى 2 ەسەگە قىسقارعان.