قازاقستاندا الداعى ءۇش كۇندە جاڭبىر جاۋىپ، كۇن سالقىندايدى

استانا. قازاقپارات - سينوپتيكتەر 21-23- شىلدە كۇندەرىنىڭ اۋا رايى بولجامىن ۇسىندى، دەپ حابارلايدى «قازگيدرومەت» ر م ك.

«قازاقستاننىڭ سولتۇستىك-شىعىس جانە شىعىس وبلىستارىنا جوعارعى تسيكلون جىلجىپ، وسى ايماقتاردا جەكسەنبى جانە دۇيسەنبى كۇندەرى جاڭبىر جاۋىپ، كەي جەرلەرگە بۇرشاق تۇسەدى. كۇشتى جەل سوعىپ، اۋا تەمپەراتۋراسى تومەندەيدى»، - دەلىنگەن حابارلامادا.

وسى تسيكلون رەسپۋبليكانىڭ سولتۇستىك، ورتالىق، وڭتۇستىك جانە وڭتۇستىك-شىعىس وبلىستارىنداعى اۋا رايىنا ىقپال ەتەدى.

«مۇندا كەي جەرلەردە نايزاعاي ويناپ، بۇرشاق تۇسەدى. وتكىنشى جاڭبىر جاۋىپ، جىلدامدىعى 15...23 م/س بولاتىن جەل سوعۋى مۇمكىن. اۋا تەمپەراتۋراسى سولتۇستىكتە جانە ورتالىقتا ادەتتەگىدەن 2... 3 گرادۋسقا تومەن بولادى. سونداي-اق، رەسپۋبليكانىڭ وڭتۇستىك-شىعىس جانە باتىس بولىگىندە اپتاپ ىستىق باسىلادى»، - دەلىنگەن حابارلامادا.