قازاقستاندىقتار مەدەۋ مۇز ايدىنىندا دەنيس تەنگە ەسكەرتكىش ورناتپاق

الماتى. قازاقپارات - قازاقستاندىقتار مەدەۋ مۇز ايدىنىندا بەلگىلى سپورتشى، مانەرلەپ سىرعاناۋشى دەنيس تەننىڭ ەسكەرتكىشىن ورناتپاق.

قازىر الەۋمەتتىك جەلىدە وسى ماقساتتا كراۋندفاندينگ الاڭى قۇرىلدى، دەپ حابارلايدى قازاقپارات ءتىلشىسى.

مۇنداي باستامانى الماتى تۇرعىنى ازيزا وتەگەنوۆا فەيسبۋك جەلىسىندە كوتەردى.

«ءبىز دەنيس ءۇشىن نە ىستەي الامىز؟ مەنىڭ قولىمنان كراۋندفاندينگ قورىن اشۋ عانا كەلەدى. دەنيس الماتى تاريحىندا قالۋى كەرەك. باسقاشا بولۋى مۇمكىن ەمەس. جۇرەگىمىزدى قايعى باستى. جاس. ادەمى. تالانتتى! ونى ەسكە الىپ وتىراتىن، ماڭگىلىك جادىمىزدا قالدىراتىن ورىن كەرەك. ول بۇل قۇرمەتكە لايىق! ءبىز ونى ساقتاپ قالا المادىق! حالقىمىز ءبارىمىز جابىلىپ، دەنيسكە مەدەۋدە ەسكەرتكىش ورناتايىق!»، - دەدى ازيزا ۋتەگەنوۆا.

ونىڭ بۇل باستاماسىن مەدەۋ مۇز ايدىنىنىڭ باسشىلىعى دا قولدادى.

بۇگىن كراۋنفاندينگ الاڭى اشىلدى. قازاقستاندىقتار ورتاق شوتقا ەرىكتى تۇردە قارجى جيناي باستادى.

ەسكە سالا كەتەيىك، قايعىلى وقيعا قۇرمانعازى مەن بايسەيىتوۆ كوشەلەرىنىڭ قيىلىسىندا تۇسكى ساعات 15:00 دەر شاماسىندا بولعان ەدى.

سپورتشى كولىگىنىڭ ايناسىن ۇرلاپ بارا جاتقان ەكى ادامنىڭ ۇستىنەن تۇسكەن. ەكى ارادا باستالعان جانجالدىڭ ناتيجەسىندە الگى ادامدار دەنيس تەندى پىشاقتاپ كەتكەن.

كەشە تۇسكى 15:00 دەر شاماسىندا بەلگىلى سپورتشى دەنيس تەن اۋرۋحاناعا پىشاق جاراقاتىمەن تۇسكەن بولاتىن.

دارىگەرلەر كلينيكالىق ولىممەن تۇسكەن سپورتشىنى 2,5 ساعات بويى رەانيماتسيالىق شارالار جاساپ، امان الىپ قالا المادى.

دەنيس تەن كوپ قان جوعالتۋ سەبەپتى كوز جۇمدى.

اۆتور: گۇلميرا عوسمانالي